John 21
21
Jisü eno Akümzapushi Akha Khalu keu
1Tipathiu Jisü no Galilee#21:1 Greek tsà lo ye Tiberius ipi ani. züghi phivilo itaghi pa khopemiqo lau ipeghi. Hipa ghola lono pephe piye: 2Simon Peter, Thomas (Didymus#21:2 Greek tsà lono Thomas eno Arameami tsà lono Didymus ipi akeu pama kinikujo kiqi ye kümtsa punú keu ipi ani. ipi chekeu), Galilee lo Cana lono ighi keu Nathanael, Zebedee nu James ngò John, eno akhopemi kütami kini panongu kümtsa ngo ae. 3Simon Peter no panongu vilo, “Ni ye akha khau nike wuchea,” ipi kelo panongu no, “Ningu ghí ogholo wunie,” ipi. Ike panongu no wu püzü ashuka lo ilo, ikemu panongu ye tipau jì kiumu khamlave.
4Inaqhe itheno Jisü ye azü mükü lo puthugho ae, ikemu akhopemiqo ye tiye Jisü kepi mütha no ae.
5Jisü no panongu vilo pi, “Aküsàmiqo, nongu ye akha lakhimu khalu miphi keshea?”
“Khalu miphie,” ipi panongu no khochile.
6Jisü no pi, “Nongu khame pe ashuka ajeu küdau vesülo eno nongu no akha hami ithulu nanie.” Kughou panongu no tishi keno, panongu ye akha kutomo khalu keu ghenguno akhame sünhekide mülave.
7Jisü no kimiye chekeu khopeu hu no Peter vilo pi, “Hiye Ampeu ke!” Pa no, “Hiye Ampeu ke,” ipikeu chilu kemtsa Simon Peter no paw hekuuphi pesü pa phi küzüluve (kughengu pa ye aphì xave no ake) eno azü lo ilhe ilove. 8Akhopemi kütamiqo ghí ashuka gholo no akhame lo akha chhitoi sünhe pesü ighi, kughengu panongu ye azü mükü lono aunhekipishe 300 qhalo ake.#21:8 Momu meter 90 toi keu. 9Kughou panongu no azü mükü lo ighi keno, amìyi chukighei iqü akeu shou akha ngò asho hami aghí keu ithulu.
10Jisü no panongu vilo pi, “Nongu no itehi akha khalu keu khami peighilo.” 11Ike Simon Peter no ashuka lo idewo mili iku püzü akhame azü mükü lo sünhe pesü ighi. Akha kijè 153 hu no akhame chhitoi ake, ikemu akha tishi kutomo akeghi akhame ye ixüvemoe. 12Jisü no panongu vilo pi, “Ighino müzüvekütha chulo.” Ike akhopemiqo khumu pa vilo, “No ye khuu kea?” ipi inijuni keumu shimoe, kughengu pa ye Ampeu kepi panongu no ithi ake. 13Jisü no ighino asho ikhilu püzü panongu tsüe, eno titoi akha ghí panongu tsüe. 14Jisü ye akìthí lono xüputhuve kethiu hino aküthüu shi pa khopemiqo lau ipeghi.
Jisü no Peter Sasüchile
15Kughou panongu no chuqhive keno, Jisü no Simon Peter vilo pi, “John nu Simon, no ye thime hipaqo nguno alau ikimiye chenima?”
Simon no pi, “Iyei, Ampeu, ino okimiye chekeu nono ithi anie.”
Jisü no pi, “Iw ambetiqo lojí lo.”
16Itaghi Jisü no pi, “John nu Simon, no ye ikimiye chenima?”
Pa no khochile, “Iyei, Ampeu, ino okimiye chekeu nono ithi anie.”
Jisü no pi, “Iw ambeqo tucho-mujolo.”
17Ghuthu aküthüu Jisü no pa vilo pi, “John nu Simon, no ye ikimiye chenima?”
Jisü no ghuthu aküthüu ghi, “No ye ikimiye chenima?” ipi iniju keu lo Peter ye alosüve. Pa no pi, “Ampeu, nono thowkha kümtsü ithi anie; ino okimiye akeu nono ithi anie.”
Jisü no pi, “Iw ambeqo lojí lo. 18Ino kuchou tsà nongu vilo pìní, kughou nongu no alhothe shiche keno nongu ye nongu kutoshi tiphimini pepu no nongu no wunishi keu-a lo wuche; ikemu kughou nongu no kitemi shiveni keno nongu ye nongu u chhope ngo püzü kütami no nongu ghili kutotsü nani eno nongu no wuni shimo keu-a lo sawu nani.” 19Jisü no hi pikeu ye Peter ye kiu ghola lono thive no Alhou juküvüpu shitsü nani keno tipau kichetsü ake. Ti pive kethiu pa no Peter vilo pi, “Ipapelo!”
20Peter no kughowo ju kelo Jisü no kimiye chekeu akhopeu hu panongu pape chekeu ithulu. (Hiye aghulhu chu akelo Jisü thikhau mungupe no, “Ampeu, khuu no opesü thechu shi niye ani kea?” ipi iniju keu ke.) 21Kughou Peter no pa ithulu keno, pa no iniju, “Ampeu, pa ye kíshi nani kea?”
22Jisü no khochile, “Tsalá ino ideighimo ke kutólo pa pelo xüaghi penishi aye, no ye kiu shilopi kepu ania? No ye ipape moayesae.” 23Hi ghenguno, akhopeu hipau ye thimo nani ipi küpülümiqo dolo uyewu tsà kügha wove. Ikemu Jisü ye pa ye thivemo nani ipi pimoe; Jisü ye, “Tsalá ino ideighimo ke kutólo pa pelo xüaghi penishi aye, no ye kiu shilopi kepu ania?” ipikeu likhi pike.
24Thime hipaqo thopi shi eno yèpeqhi keu ye akhopeu hipau ke. Paw thopi ye kuchou kepi ningu no ithi anie.
25Jisü ye thime kütau ghí kutomo shike. Tsalá tipaqo kümtsü yèpe qhike aye, ino kümsüju kelo ayeghiqha kupuju mu ti kaku yèpeqhi keqo qhikhamla nani.
ప్రస్తుతం ఎంపిక చేయబడింది:
John 21: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
