Apostolmi 4
4
Peter ngò John Pama Jewmi Hoho Zülo
1Achinemiqo eno achineki khemi shou captain ngò Sadduceemiqo ishi Peter ngò John pama no timiqo pütsa ake dolo no pama lau ighi. 2Panongu ye shishe amloideve, kughengu apostolmi pama no timiqo vilo Jisü akìthí lono xülethughive keu eno kithimi xülethughive nikeu ghili pesü asheshu ae. 3Panongu no Peter ngò John pama küghaluve, eno avelau shive kehu, thoghiu tsalà tomo ke kutólo akughuki lo sǘve. 4Ikemu timi khunoqo no akükütsü tsà chilu keno pülüluve; ikehu pülüluve kemi kikihi ye qhethonhe pungu kutólo ikughive.
5Tishiwo thoghiu ayekipemi, kichimi, eno ayeza kükütsümiqo Jerusalem lo kuhokumqoe. 6Achinetou Annas tilehi ae, eno Caiaphas, John, Alexander ngò kütami achinetou kibolomiqo ghí tilehi ae. 7Panongu no Peter ngò John panongu zülo sawo qhi no pama vilo ishi iniju: “Kiu küká momu kiu je lono nongu ye hipau shilu ani kea?”
8Ikehu Peter no Aghungú Kimthe no chhitoi shi püzü panoqo vilo pi: “Timi shou ayekipemi eno layemiqo! 9Tsalá ishí apukhu kinitave keu lau küpüqhiyi keu kümlà pephe piyeve keu eno pa ye kíshi no shipivive keno iniju nike ningu kusü aghí aye, 10hi ithilo, nongu Israelmi kümtsü: Hiye Nazareth nó ghami Jisü Khristo khuu nongu no yedave kemu Alhou no akìthí lono xüputhuve keno pa je lono timi hipau ye viluve no nongu zülo puthugho ani. 11Jisü ye
“ ‘nongu aki kishimiqo no milive keu tuqu
hu no atsükupu tuqu shivae.’#4:11 Leshe 118:22
12Xakulu ye khuu lau nomu ithulu chemoe, kughengu atsütsǘ qholo ningu timi jeli pelo xakulu ithulu penike aje kütau kiumu tsüpe püamoe.”
13Kughou panongu no Peter ngò John pama mulo kumto ithulu eno pama ye akiphiki lo wujumo kemi, inapügha timiqo paphi ipikeu ithive keno panongu ye akichiqhive no pama ye Jisü gholo ache kena ipi kimchiluve. 14Ikemu pama gholo timi shipivive keu puthugho akeu ithulu no panongu ye kiumu pimlave. 15Ike panongu no pama pelo Jewmi Hoho zülo no ipeve penike azah tsüve, eno tisheno panongu dolo no küptsae. 16Panongu dolo ishi ighiju ae, “Ningu ye timi hi pama pesü kiu shiveni kea? Jerusalem lo xüküami kümtsü no pama no paküta keu amichipu kümlà shive keu ithivae, eno ningu ye tipau lachileve mülae. 17Ikemu hipau vehu timiqo dolo alau veküpha pemo nike ningu ye panongu pelo hinguno hilau ye Jisü je pesü kütami pütsa pemove nike pikichivenie.”
18Tisheno panongu no itaghi alou pama kusü eno pama vilo khilemu Jisü je lono kütsü momu shika kevilo pi azah tsüve. 19Ikemu Peter ngò John pama no khochile, “Alhou nhekithe lo khikhiu no achipi kea: Nongu gholu keu no keo, pa gholu keu no kea? Nongu no küghathajulo. 20Ningu ghengu ye ningu no kiu ithulu eno chilu keno tipau ghili pimo keu shimlae.”
21Panongu no pama kichi kümsà kitheve no pama phe puwuve. Panongu ye kíshi hi pama ghime kepu keno xakütha shimlave, kughengu kiu shive keno tipau ghenguno timi kümtsü no Alhou sheqhe ake. 22Kughengu timi khuu akümzapushi shipivive keno pa ye ampe lhobidi shou shive no ake.
Küpülümiqo no Inikhu
23Peter ngò John pama ye kuqhopheve kethiu idechilesü panow timiqo lau wuve eno achinetou ngò kichimiqo no pama vilo kiu pi keno kümtsü pesü panongu vilo lhepiyeve. 24Kughou panongu no hi chilu keno, panongu küqha no ighamuku Alhou vilo akighini shi. Panongu no hitoi inikhu, “Akughushu Mipeu, atsütsǘ, ayeghi, azüghi eno tipaqo lo akeu kümtsü nono mülà ke. 25Nono Aghungú Kimthe vechewo oqeu, eno ningu papù David kichí lono ishi pi:
“ ‘Kushiye shiyeqo ye muqhumüza ani kea?
eno kushiye timiqo ye adou lono kuchughu cheni kea?
26Ayeghi lo kükami
eno ayekipemiqo no hekütsü kuhokumqo pe aghili kutò no
Ampeu
eno pa no nukishe keu mujochile ke.’#4:26 Leshe 2:1,2
27Kuchou no Herod ngò Pontius Pilate pama no Jewkumomiqo ngò Israel timi hipau phughi lo akemiqo sasü aqoshi kusho no kuchughu püzü nono nukisheve keu Akimthe qeu Jisü mujochile ke. 28Panongu no oküká eno opulou lono azünatha ghi kiu shimoayesa keno xatha pe püakeu tipau shike. 29Ampeu, itehi panongu no ningu kichi akeu jutsülo eno oqemiqo pelo amlo kumtoshi otsa pilu pelo. 30Oqeu akimtheu Jisü je vechewo shikipivi eno akümzapu ngò amichipu kümlà shilu penike ow chhopuwo tsülo.”
31Panongu no akighini shive kethiu, khilehi panongu no kuho akeno tipau-a süküthae. Eno panongu kümtsü Aghungú Kimthe no chhitoive no amlo kumtoshi Alhou tsape shie.
Küpülümiqo no Panonguw Küakini Pesü Küsaje
32Küpülümiqo kümtsü amlo eno akükümsü lakhi shie. Khunomu pa no kiu pighi aghí keno tiye paw kepi pükhamoe, ikemu panongu no kiu aghí keno kümtsü pesü aqǘ shi küsaje ke. 33Apostolmiqo no aküka kumto lono tamo no Ampeu Jisü xülethughive keu shepe shi. Eno Alhouʼw küpükini no ighono akumtoshi panongu kümtsü gholo akümlà shikeu 34vechewo panongu dolo khiumu kumlhomi shivemoe. Kughengu ado kümtsü lo khunoqo no ayeghi momu aki pighi akeno tipaqo jeve eno jelu keu pisa pesü ighino 35apostolmiqo pukhuphi lo qhi, eno tiye avehupu shi akemiqo lau kijétsü ake.
36Levi laghami Cyprus lono ighi keu Joseph khuu Apostolmi no Barnabas ipi ku cheni keno (hipau kiqi ye shikumtokütsüu nopu), 37pa no alu pighi achekeu jeve püzü pisa pesü apostolmiqo pukhuphi lo qhitsüe.
ప్రస్తుతం ఎంపిక చేయబడింది:
Apostolmi 4: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
