Apostolmi 22
22
1“Athiküzümi eno apùnoqo, itehi ye iw sükusho tsà inijulo.”
2Kughou pa no Arameami tsau no panoqo pütsa keu chilu keno panongu ye shishe iqünheive.
Ikelo Paul no pi: 3“Ni ye Jewmi ke, Cilicia lo Tarsus phughi lono punú kemi, ikemu aphughi hipau lono saputhu ke. Ni ye Gamaliel qholo no phi kemi eno tsaqütsalei ni pù-asüqo yeza lo qokiphe luve kemi. Ishí nongu no shi akeu toi ni ghí Alhou ghenguno ighono minemighei chekemi ke. 4Alaghi hipau pape chekemiqo no thimo ke kutólo ino kijipüsa che, kipitimi ngò totimi kinikujo kügha pesü akughuki lo vesüve che. 5Achinetou ngò Jewmi Hoho lo akemi kümtsü no hipau thopi shitsülu nani. Damascus lo panongu mülà küqha chekemi lau yèsü yè keu kutólo ni ye panongu lau no khulue, eno timi tipaqo akughumi shi sasü Jerusalem lo ighino ghimeqhi niye tilau wuche ke.
6“Ino Damascus kupunú ighi kelo, puchomghü ghuloki lo, paikhavi atsütsǘ lono vüqai keu küvü lakhi no isümxa pe yeluve. 7Ni ye ayeghi lo ilu iqive eno asütsa lakhi no ivilo ishi pikeu chilu, ‘Saul! Saul! no ye kushiye ni kijipüsa ani kea?’
8“ ‘Ampeu no ye khuu kea?’ ipi ino iniju.
“Pa no khochile, ‘Ni ye nono kijipüsa akeu Nazareth nó ghami Jisü ke.’ 9Igholo chekemiqo ye aküvü ithulue, ikemu panongu ye ipütsa akeu sütsa hu ye vethalumoe.
10“ ‘Ampeu, ni ye kiu shini kea?’ ipi ino iniju.
“Ampeu no pi, ‘Ithulo,’ eno ‘Damascus lo ilolo. Tilau no opichepüa keu kümtsü pesü ovilo pitsü nani ke.’ 11Igholo chekemiqo no a-u no isünhe pesü isasü Damascus lo ilo, kughengu aküvü küká hu no inhethi kighicheve tsüke.
12“Timi lakhi Ananias ipikeu no isasü kusho nike ighi. Pa ye amlokütsü shi ayeza pelu chekemi eno Jewmi tile xüküami kümtsü no akiqheu lono gihu chekemi ke. 13Pa no iphivilo puthugho no pi, ‘Athiküzüu Saul, onhethi tsükholu lo!’ Tipa mütsa no ni ye pa ithulu.
14“Tishi no pa no pi: ‘Ningu pù-asüqo Lhou no okishelu keu ye pa pulou ithilu eno Achipiumikuchou hu ithulu eno pa kichí lono pikeu tsaqo chilu peniye ke. 15Nono ithulu eno chilu keu pesü no timi kümtsü lau paw thopi shitsü nani. 16No ye itehi kiu ngokhe ani kea? Ithulo eno pa jeku ghi baptiz shive no oxinéqo qhuvelo.’
17“Kughou ino Jerusalem lo ideighi no achineki lo inikhu akeno, ni ye atsüu-asamou müthave 18eno Ampeu ithulu no pa no ivilo pi ‘Papashilo! Mütazü Jerusalem qhivelo, kughengu timi hile akemiqo ye nono ishepe shikeu ikhilutsümo nani ke.’
19“Ino ishi khochile, ‘Ampeu, ino synagog lakhi lono lakhi lo wu no opülü chekemiqo heqhi eno akughu shive chekeu timi hipaqo no ithi anike. 20Eno kughou Stephen no opülü keu ghenguno pìthíve keu jì pele akeno, ni ye tile puthugho no puloküqha tsü ake eno pa heqhipithí akemiqo tiphimini jukuto tsü ake.’
21“Tishi no Ampeu no ivilo, ‘Chevelo; ino aghache lo Jewkumomiqo lau opuwu nani ke,’ ipi.”
Paul, Rommi Aghakütsami
22Paul no hi pi ake kutólo timiqo ye pa tsà iní ae. Tisheno panongu no ighamuku kuloghu no pi, “Pa pìthívelo! Pa ye xü küzüpu kumoe!”
23Panongu no ighamuku püzü panoqo phimini kuthó piye no ayeghimukhu epe kunguu vepuku akelo 24zatsüu no Paul sasü ghüshimi kungoki lo wuve penike azah tsüve. Akighí kipili pesü pa heqhi no timiqo ye kushiye hitoi pa lau ighamuku akeno kideküdai iniju no phupheluve penike zatsüu no kichevetsü. 25Panongu no pa heqhi niye tshü akelo Paul no aqhe shou zatsüu tile puthugho akeu vilo pi, “Rommi aghakütsami khuu akipimí mu phuphe müla keu heqhi nikeu hiye oghenguno ayeza lo achipi keshea?”
26Kughou aqhe shou zatsüu no hi chilu keno, pa no zatsüu lau wu no hitoi pìthive. “No ye kíshivenia kea? Timi hipau ye Rommi aghakütsamie.”
27Zatsüu no Paul lau wu no iniju, “Ivilo pilo, no ye Rommi aghakütsami keshea?”
“Iyei, ni ye Rommi aghakütsami ke,” ipi pa no khochile.
28Ikelo zatsüu no pi, “Ni ye Rommi aghakütsami shini ke ghenguno ghüka kutomo tsüke.”
“Ikemu ni ye aghakütsami lakhi shi punúe,” ipi Paul no khochile.
29Khunoqo no chixechilei pa iniju niye kutò akeno züikhavi tsüghüve. Paul ye Rommi aghakütsami lakhi keghi ayikichhe no tshüve keu vethaluve no zatsüu ghí aloqhi müsàve.
Paul no Jewmi Hoho Zülo wu
30Jewmi ye kughengu no Paul nguku ani keno zatsüu ye mütsüqhei phupheju nishive. Ikehu tishiwo thoghiu pa no Paul kuqhopheve no achinetou ngò Jewmi Hoho lo kihiküsümi kümtsü kumqo penike azah tsüve. Tisheno pa no Paul sasü ighino panongu zülo puthugho pe.
ప్రస్తుతం ఎంపిక చేయబడింది:
Apostolmi 22: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
