Apostolmi 20
20
Macedonia ngò Greece lo
1Muqhumüza akeu tave kethiu, Paul no küpülümiqo ku kumqo no panoqo shikumtove tsü püzü akivishi alo ipive no pa ye Macedonia lo wu niye cheve. 2Pa no tipa qhalo kicheghüzü shi wu püzü timiqo lau shikumto keu tsà kutomo pitsü, eno ashekha lo Greece lo ighive no 3pa ye tilehi aqhi küthü ngove. Pa no zükilu lono Syria lo wu niye kutò akelo Jewmi khami no pa pìthíve niye kuchughu pe aghí keu ghenguno pa ye Macedonia küdau no idewove nike kughuluve. 4Berea lono ighi keu Pyrrhus nu Sopater, Thessalonica lono ighi keu Aristarchus ngò Secundus pama, Derbe lono ighi keu Gaius eno Asia bocho lo ache kemi Timothy, Tychicus ngò Trophimus ishi no Paul gholo wue. 5Timi hipaqo no nizüu no wu no Troas lo nikhe aghí pe ke. 6Ikemu Kholaqhi sümo keu Sho Tiqhitini#20:6 Hechekulu ghulhu shelo atsala 7 kholaqhi sümo keu sho pesü aghulhu shiche: tipau pesü kholaqhi sümo keu sho pinedo ipi ani. tsalà tove kethiu ningu ye zükilu lono Philippi lo wuve eno atsala pungu thiu no Troas lo panoqo gholo sülu, eno tilehi ningu atsala tsünì ngove.
Troas lo Eutychus Akìthí lono Xüputhuve
7Apine tsalà atüghiu lo ningu no asho süpho chu#20:7 Momu Ampeu Ghulhu chu niye kuposhu nike kumqoe. niye kuhokumqoe. Paul no timiqo sasü küptsa ae, eno pa ye tishiwo thoghiu wuve nikeu shi akehu zübumta kutólo küptsa ae. 8Ningu no kunguu küptsa akeu chebo lo akulu kutomo küyiqü pepüae. 9Eutychus ipikeu apumi lakhi ye alashe mütsü lo iqa ake. Paul no ado kushuwa atsapia kehu, Eutychus ye cheyi zühuve. Pa ye zücheive kehu aki jolha aküthüu lono ayeghi lo ilu iqive eno pa khapeqhelu kelo thive aghí. 10Paul no aqhou iqi püzü pa no apumi hu valuve, eno pa u pesü pa vape no panoqo vilo pi, “Müsà kevilo, pa ye xü aphie!” 11Tisheno pa no itaghi aki jolha kunguu iku püzü kuposhukulu ghulhu küsaje chuve. Tsüthomo ke kutólo pa no atsapia püzü tisheno pa ye cheve. 12Timiqo no apumi hu thayi aki lo sasü wove eno shishe panongu mulokiqi shive.
Paul no Ephesiami Kichimiqo Kinive
13Ningu ye zükilu lo ikuve eno azüu no Assos tove nike ghenguno wuve, tilau no Paul xapuluve niye wuche ke. Pa no hitoi pekithi pepüa, kughengu pa ye apukhu lono alà chesü tilehi ighive niye shi ake. 14Kughou pa no ningu sasü Assos lo kusholu keno, ningu no pa xapuluve no Mitylene lo wuve. 15Tishiwo thoghiu ningu ye Assos lono wuve eno Chios ghüngü tolu. Eno tipa tsalà thiu ningu ye Samos kathasü wuve eno itaghi tishiwo thoghiu no Miletus tolu. 16Paul ye Ephesus vechesü wuve no mighisü Asia yeghi bocho lo ado peve ngomove no tokulupu shi aye Pentecost tsalà tomphi lono Jerusalem toluve niye shi ake.
17Paul no Miletus lono Ephesus kukuhou lo kichimiqo pelo ighino pa sasü kusholu penike aghinimi puwu. 18Kughou panongu no ighi keno, Paul no panongu vilo pi, “Ino Asia bocho lo ighike tsalà atüghiu lono itehi kutólo kíshi nongu gholo xü acheni keno nongu ampi no ithi ani. 19Ilachile chekemi Jewmi no amqü jeli shi no paküta keu shi ipeju ake dolo ghí ni ye anhezüpiji mütshaivü Ampeu qe acheke. 20Nongu no ithi anike ni ye nongu kuphukulupu ghenguno kütsü nikeu lo kiumu süchilevemo ke ikemu mìshí zülo eno aki-aki lo ilo no nongu shika ke. 21Ni ye Jewmi ngò Greekmiqo kinikujo vilo ghí panongu ye Alhou lau xaideighi no amlo pebideve püzü ningu Mipeu Jisü shou pülübe moayesa kepi shukiphe shive tsüae.
22“Eno itehi ye ilau kiu shive niye kutò ani keno mütha kemu Aghungú Kimthe no tsüikhomo piakeu kiqi lono ni ye tilau Jerusalem lo wucheni. 23Ino ithi akeu ye aphughi kümtsü lo akughu shini keu eno shiluküsa chekeu pesü Aghungú Kimthe no ikütüghü anie. 24Tishimu ighengu ye iküxü pesü ameküa shi kümsü chemoe, ikimiji ye Alhouʼw küpükini tsakiviu pesü ashepe shini keu kümlapù saje khikhi Ampeu Jisü no itsü keno tipau mülà kupuve no ashetove niye po cheni.
25“Ino ithi anie, nongu khunoqo gholo ino Alhou kükaqha ghili pesü asheshu ache keno, hinguno hilau ye khilemu iju ithulu kithemove nani. 26Tighenguno ino ishí tsalà lono nongu vilo shukiphe shi ani, nongu gholo khukhumu pühave aye ikipimi kiumu kühae. 27Kughengu ni ye Alhou pulou kümtsü pesü nongu vilo pikülha nikeu lo süchile pepüamoe. 28Nongu likhi nongu jukutolo eno Aghungú Kimthe no nongu pelo jukükütsüu shipe nike qhipüa kemiqo kümtsü jukutolo. Alhouʼw akukuhou khemiqo shilo, tiye pa likhi pa jì no qhüpe püani ke. 29Ino ithi akeu ye ino wuve kethiu tüngtügha yiküsaqo no nongu dolo iloghive nani eno küpülümiqo ghüzakhave nani. 30Nongu likhi nongu gholo no kuchou tuchighiveni kemi ghí ipeghive no küpülümiqo müsü sasü panoqo pape wuve penikeu shi nani. 31Ikehu nolikhi nongu jukuto alo! Ino anhezüpiji ampe küthü kutólo tamo no putho-pucho nongu lakhi-khi pikichi achekeu kümsülulo.
32“Itehi ino nongu pesü Alhou eno paw küpükini tsà lau kulhuqhive tsü ani, tino nongu xaqhelu nani eno shikimtheve kemiqo kümtsü gholo nongu mheghi ighílu pe nani. 33Ni ye khuuw ghükayi, shuna momu tiphimini mu jumine pepüamoe. 34Nongu ampi no ithi anie, i-u no mülàitha no ilikhi ivehupu eno igholo chekemiqo vehupu kümtsü shitsü acheke. 35Ino shikeu kümtsü lo shishe aghimeshi mülà püzü miqemilei kemi kuphu moayesae ipi nongu piye ke, eno Ampeu Jisü ampi no hitoi pipüa keu tsà kümsülu akepue, ‘Tsükeu no lukeu nguno akümghapue.’ ”
36Kughou Paul no atsa pitave keno, pa no panongu kümtsü gholo qhoqhünhe pe akighini shie. 37Panongu no pa valuve eno pa müma no kümtsü qau khave. 38Paul no pikeu tsà gholo kütau kümtsü nguno panongu ye pa sasü khilemu kushokilelu mae pikeu hu no panongu muloghime shive. Tisheno, panongu no zükilu kutólo Paul sawo pheve.
ప్రస్తుతం ఎంపిక చేయబడింది:
Apostolmi 20: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
