Apostolmi 17
17
Thessalonica lo
1Kughou Paul eno pa küsàmiqo no Amphipolis ngò Apollonia phu vechesü ighi keno panongu no Thessalonica lo Jewmiʼw synagog akeu lo ighi. 2Thosülo pa no shi chekeu toi, Paul no synagog lo wu no Sabbath tsalà küthü kutólo Kuchoyesü lono timiqo sasü küptsa-kiqiju, 3eno Messiah ye imé moayesave keu eno akìthí lono xülethuve keu ghili phukideküdai pesü hepho-piye tsü. Paul no, “Hi Jisü khuu pesü ino nongu vilo piani keno pa ye Messiah ke,” ipie. 4Panoqo gholo Jewmi khami ye vethaluve no Paul ngò Silas pama gholo küqhaluve, titoi Greekmi Alhou sümsa chekemi kutomo eno totimi ajekipimi khami ghí tishiluve.
5Ikemu Jewmi kütamiqo ye anheshuve; eno alhikishi-a qhalo lahilaza chekemi khami ku kumqo püzü aloji hekütsü no aphughi qhalo hekibide huthuve. Panongu no akimighi shi wu püzü Jason ki süholuve no Paul ngò Silas pama phusawo aqoaho zülo sawu niye shi. 6Ikemu kughou panongu no pama phumlave keno Jason ngò küpülümiqo khami sünhe sasü tipau phughi lo ayekipemiqo zülo saighi no ishi ighamuku: “Ayeghiqha kümtsü lo aküpüna xukutho akemi timi hipaqo hilau ighi ani, 7eno Jason no panoqo pelo pa ki lo ngo pe anie. Panongu kümtsü no akükau kütau lakhi Jisü ipikeu ani ipi püzü Caesarʼw xakütha zakütsü lachile anie.” 8Kughou panongu no hi chilu keno, tile aqokitikhi akeqo ngò aphughi lo ayekipemiqo ye kübangüve. 9Tisheno panongu no Jason ngò kütamiqo shou asüchuve no phepuwuve.
Berea lo
10Putho shive kemtsa küpülümiqo no Berea lo Paul ngò Silas pama puwuve. Pama no ti tolu kelo Jewmiʼw synagog lo iloe. 11Jewmi Berea lo achekeqo ye Thessalonica lo Jewmi akemiqo nguno akükümsü qhaqhilei ke, kughengu panongu no ighono khekulhoshi akükütsü tsà ikhilu tsü eno Paul no pikeu tsaqo hu kuchou kemo keno tsalakipetsü Kuchoyesü phukideküdaju ae. 12Tishikehu, kutomo no pülüluve, Greekmi totimi akimchimiqo ngò Greekmi kipitimiqo kutomo ishi no pülüluve.
13Ikemu kughou Jewmi Thessalonica lo akemiqo no Paul no Alhou tsà pesü Berea lo kütsü ani ipi chilu keno, panongu khami no tilau ghí wu no timiqo shikughutho eno aküpüna shipe niye panongu xukuthoe. 14Küpülümiqo no akimighi shi azüghi küdau Paul puwuve, ikemu Silas ngò Timothy pama ye Berea lo ngove. 15Paul sawo phewu kemi no Athens kutólo wu eno panongu ye Paul no Silas ngò Timothy pama vilo tolukivi thaqhü kighithe pa gholo ighilo pikeu kichekütsü sütsa pesü cheve.
Athens Lo
16Paul no Athens lono Silas ngò Timothy pama ngokhe akelo aphughi tipau lo asü-atu julho no chhitoi akeu ithulu püzü ighono amloküsa shive. 17Ikehu pa no synagog lo Jewmi ngò Alhou sükümsami Greekmi, eno tsalakipe alhikishi-a lo ighi kemiqo sasü küptsa-kiqiju ache. 18Ikelo Epicureami kükütsü pape kemi eno Stoic#17:18 Epicureami eno Stoicmi ye Athens phughi lo phikuthove kemi amqo kini achekeqo ke. phukuthomi khami no pa sasü kighe thuve. Khami no ishi pi, “Tsathipa hipau ye kiu pi niye shiju ani kea?” Kütami khami no ishi pi, “Pa ye inami lhou ghili pi aghí kepu toi anie.” Panongu no hitoi pikeu ye Paul no Jisü tsakiviu eno xülekuthu ghili pikeu ghenguno ke. 19Tisheno panongu no Paul sasü Areopagus lo kumqo akemi zülo saighi no pi, “Akükütsü hi akithé nono pisü ighi akeu ye kiu keno ningu pelo ithi penima? 20Nono peighi akeu kükümsü ghola ni kìní lo pakütashi chilu anie, eno tipaqo kiqi ye kiu keno ningu ye ithinishi anie.” 21(Kughengu Athenmiqo kümtsü eno inami tile küghüna ache kemiqo ye kütau kiumu shimo püzü akükümsü ghola anile shi ipeghi akeqo ghili küptsa eno iní keu lono panongu do puwove acheke.)
22Paul no Areopagus küküptsa mütá lo puthugho no pi: “O Athenmiqo! Ino ju ke nongu ye alaghi thowkha lo ighono achineye gihu achenie. 23Kughengu ino iqho-iqi püzü nongu no mülá akeu julhoqo ju kelo akümlá-khache-a lakhi lo ye ishi yèpukupüa ghí keu ino ithulue:
Aju kümthau Lhou Lau.
Nongu no mülá acheni kemu nongu ye mütha no acheni tighenguno ino nongu vilo hipau ghili asheshu niye anie.
24“Alhou khuu no ayeghiqha eno tile akeu kümtsü lho keno pa no kungugha eno ayeghi Mipeu ke eno pa ye timi u no mülà puku keu chineki lo ngo chemoe. 25Momu pa ye kiuala avehupu shi aghí kepu toi timi u no pa ghini shi akepu kiumu kühae. Tikumo no pa ampi no aküxü ngò atuthu eno thowkha thime pesü timi kümtsü tsüke. 26Pa no timi lakhi lau no shiyeqo kümtsü lhoe, eno tipaqo pelo ayeghiqha kuchopu lo küghünalu pe ke; panongu pelo ado khikuto akepu eno alughi khipau kutólo küghüna kepu keno pa ampi no kimchipheve tsüe. 27Alhou no hitoi shikeu ye panongu pelo pa phuju eno pa lau kupunukhoi ighino pa phulu peniye kehue, tishimu Alhou ye ningu khuu lau nomu putosü anike kumoe. 28‘Kughengu ningu ye pa gholo no xüani eno ithalu ani eno ninguhi anike.’ Nonguw leshe-kiyemi khami no pikeu toi, ‘Ningu ye pa nuli-kughukomi ke.’
29“Ningu ye Alhou nuli-kughukomi ke ghenguno ningu ye ithukümlau Lhou ye shuna momu ghükayi momu atu pesü timi süqekithi no shitsa shi mülà keu julho toi küghashi kümsü kepu kumoe. 30Khaghi mütha keu ghuloki lo ye Alhou no jukümghaleve tsüche, ikemu itehi ye pa no aqha kuchopu lo timi kümtsü vilo amlo pebide penike azah tsü ani. 31Kughengu Alhou no timi lakhi süküsü shipepüa keu vechewo ayeghiqha shou amikucho lono küghatha nikeu tsalà lakhi püghüpe püanie. Hipau pülülu penike timi kümtsü lau tsü akeu shi ghi pa no akìthí lono pa xüputhuve ke.”
32Kughou kithimi xülethu keu tsà panongu no chilu keno, khami no pa junuqhi, ikemu khami no ishi pi, “Ningu ye hipau vehu itaghi olau no chilu nishi anie.” 33Tilehi, Paul ye aküküptsa-a qhive no wuve. 34Timi khami ye pülüluve eno Paul papemi shive. Paul papemi shiluve kemi gholo Areopagus lo kihimpemi lakhi Dionysius ipikeu ngò totimi Damaris ipikeu eno kütami kutomo ghí ae.
ప్రస్తుతం ఎంపిక చేయబడింది:
Apostolmi 17: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
