SENESI 49
49
Tapuaki a Sakopo ki ona foha
1Nee paui leva e Sakopo ona foha, o ui: Koutou fakatahitahi mai. Pea e au fakaha atu kia koutou te mea ae ka hoko anai kia koutou i te u temi ki amuli.
2Koutou fakatahitahi mai kia au, pea koutou fakalogo mai kia au, nai foha o Sakopo!
Koutou fakalogo ki takotou tamai ko Iselaele!
3Lupeni, ko koe ko toku foha uluaki,
Ko toku malohi pea ko te u uluaki fua o toku malohi.
E ke fakalaka i ou tehina i te mamalu mo te malohi;
4Ko he tafe malohi ia koe, kae e mole ke mau anai te uluaki tuulaga,
Koteuhi nee ke kake ki te moeaga o tau tamai,
Pea nee ke ulihi toku moeaga i tau kake ki ai.
5Ko Simeone mo Levi e tautehina;
Ko ana heleta ko te u mea gaue o te fakapo.
6Ke aua naa kau toku laumalie ki ana fono fakafufu.
Ke aua naa fakatahi toku laumalie ki ana fakatahiga,
Koteuhi nee na matematehi ni tagata i tona iita,
Pea nee na tuutuusi te u vae o te u pipi i tona agakovi.
7Ke malaia tona itaita, koteuhi nee kovi osi ona ita!
Ke malaia tona itaita, koteuhi nee fakapo ia!
Koia e au fakavaevae anai naua i te fenua o Sakopo,
Pea e au veteki anai naua i te fenua o Iselaele.
8Ko Suta, e ke tali anai te u fakavikiviki o ou tehina;
E hili anai tou nima ki te muliulu o ou fili;
E tulolo anai te u foha o tau tamai i ou mua.
9Ko Suta ko toku foha, e ke hage ko he laione mui.
E ke hau mai te matea, oi sioku foha!
E ina peluki ona vae o moe o hage ko he laione tagata,
O hage ko he laione fafine: ko ai anai ka ina toe lagai ia ia ki oluga?
10E mole fakamamao anai te pale fakahau ia Suta,
Pea mo te tokotoko fakaaliki maia nima o tona hakoga,
O kaku ki te aho ae e ha ai anai te Silo (ae e tonu ke ina mau ia ia),
Pea e fakalogo anai kia ia te hahai fuli.
11E ina hai anai tana asino ki te vite,
Pea mo te uhi o tana asino fafine ki te tafito vite lelei.
E ina fo anai tona kofu i te vino,
Pea mo tona pulupulu i te toto o te fua o te vite.
12E kukula ona mata i te vino,
Pea e hihina ona nifo i te hua huhu.
13Ko Sapulone, e nofo anai ia ia i te matatai,
E nofo anai ia ia i te taulaga o te u vaka,
Pea e kaku anai tona kele ki Sitone.
14Ko Isakale ko he asino malohi,
Ae e moe i te u fale manu.
15E sio ia ia e lelei te kogamea ae nee malolo ai,
Pea e lelei te fenua ki te nofo.
Koia nee ina tali ai leva ke hili he amoga ki tona fugauma,
Pea mo te totogi o he tukuhau.
16Ko Tane, e ina fakamaaui anai tana hahai,
Koteuhi ko ia ko he tahi o te famili o Iselaele.
17E hage anai ia Tane ko he gata i te ala,
Ko he gata kona i he ala lauveliveli,
Ae e ina uusi te u ponai vae o te u hosi,
Ke to ai ki muli te tagata ae e heka i oluga.
18E au falala ki te Eteleno, ko toku tokoni!
19Ko Kate, e ohofi anai ia ia e ni kau tagata kaihaa,
Kae e ina toe ohofi anai natou, pea e ina toe kapu anai natou.
20Ko Asele, e ina fakatupu anai he meakai lelei osi,
Pea e ina teuteui anai te u meakai fakaeteete a te u hau.
21Ko Nefetali, ko he tao fafine vao ia ia e mauli faifaitaliha,
Pea e ina fai ni palalau logo lelei.
22Ko Sosefo, ko te huli aia o he fuu akau fua.
Te huli o he fuu akau fua ia tafa o he matapuna vai;
E malaga anai ona vaa i te fuga kaupa.
23Nee fakatagai ia ia e ni tagata fainahau,
Pea nee natou nahaui ia ia aki anatou nahau, pea nee natou kapu ia ia i tonatou fehia.
24Kae nee tuu malohi aipe tana nahau,
Pea nee fakamalohii ona nima
E te u nima o te Atua malohi o Sakopo:
Koia ae nee liliu ai ia ia ko te tagata tauhi manu, mo te utu o Iselaele.
25Ko te gaue ia ia a te Atua o tau tamai,
Ae e tokoni anai kia koe.
Ko te gaue aia a te Mafimafi, ae e tapuaki anai kia koe,
Ki te u tapuakina o te atu lagi i oluga,
Ki te u tapuakina o te vai i lalo,
Ki te u tapuakina o te u huhu mo te fatu o te fafine.
26E fakalaka te u tapuakina o tau tamai
I te u tapuaki o aku tamai,
O kaku ki te u tumutumu o te u mouga heegata.
Ke hifo te u tapuaki aena ki te ulu o Sosefo,
Ki te tumutumu o te ulu o te aliki o ona tehina!
27Ko Pesamino ko he lupo fekai ae e ina hae.
I te uhu, e ina kai tana meakai,
Pea ko te afiafi, e ina vae tona koloa o te tau.
28Ko natou fuli aena, nee tupu mai ai te u famili e hogofulu ma lua o Iselaele. Pea ko te u palalau aia, nee tuku kia natou e tanatou tamai, i tana tapuaki kia natou. Nee ina tuku tana tapuaki ki te tagata taki toko tahi.
Mate mo te tanu o Sakopo
29Pea nee ina tuku leva kia natou te fakatotonu aeni: Ka au alu anai ki taku hahai; ke koutou tanu au i te tanuma o aku tamai, i te ana ae e tuu i te gaueaga a te tagata Eti ko Efelone, 30i te ana o Makepela, ae e ovi ki Mamele, i te fenua o Kanaane. Nee totogi te gaueaga aia e Apalahamo ki te tagata Eti ko Efelone, ke liliu ko tona tanuma. 31Kua tanu i ai ia Apalahamo mo tona ohoana ko Sala; kua tanu i ai ia Isaake mo tona ohoana ko Lepeka; pea nee au tanu ai foki i ai ia Lea. 32Ko te gaueaga mo te ana ae e tuu i ai, nee totogi ia mai te u foha o Eti. 33I te osi o te tuku e Sakopo ana fakatotonu ki ona foha, nee ina too leva ona vae o tuku ki te palepale, pea nee tukumanava fakaosi leva ia ia, pea nee alu leva ia ia ki tana hahai.
ప్రస్తుతం ఎంపిక చేయబడింది:
SENESI 49: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
