EKESOTE 8
8
1Nee ui leva e te Eteleno kia Moisese: Ui kia Alone: Hiki tou nima mo tou tokotoko ki te u liua lalahi, mo te u liua liliki, mo te u vai tanaki, pea ke fakahake mai ai te u kelenui ki te fenua o Esipito. 2Nee hiki leva e Alone tona nima ki te u vai o Esipito; pea nee hahake ake leva mai ai te u kelenui, o mafola i te fenua katoa o Esipito. 3Kae nee toe fai foki e te kau gaohi mea fakatalakitupua o Esipito te mea aia aki anatou mea fakatemonio. Nee natou fakahake foki te u kelenui ki te fenua o Esipito.
4Nee paui leva e Falaone ia Moisese mo Alone, o ui: Kolua kole ki te Eteleno ke fakamamao te u kelenui maia au mo taku hahai; pea e au tuku anai te hahai ke olo o momoli ni sakilifisio ki te Eteleno. 5Nee ui leva e Moisese kia Falaone: Tuku mai kia au au fakatotonu! Ko te aho fea ae e au faikole ai anai ki te Eteleno o uhiga mo koe, mo au tagata faifekau pea mo tau hahai, ke fakamamao ai te u kelenui maia koe mo ou fale? E toe pe anai ki te u kelenui ae i te vaitafe. 6Nee tali leva e Falaone: Ko apogipogi. Pea nee ui leva e Moisese: E fai ki ai, ke ke iloi e mole tatau he tahi mo te Eteleno, tomatou Atua. 7E fakamamao anai te u kelenui maia koe mo ou fale, mai au tagata faifekau mo tau hahai; e toe pe anai ki te u kelenui o te vaitafe. 8Pea nee mavae leva ia Moisese mo Alone mai te fale o Falaone. Pea nee kalaga leva ia Moisese ki te Eteleno o uhiga mo te u kelenui ae nee tautea aki ai ia Falaone. 9Pea nee fai leva e te Eteleno te mea ae nee kole e Moisese; pea nee mamate leva te u kelenui i te u loto fale, mo te u malae, pea mo te u gaueaga. 10Nee tanaki leva natou o fakatuuga, pea nee kovi osi te mamanu i te fenua katoa. 11I te sio a Falaone kua mau he fimalie, nee ina toe fakafefeka leva tona loto, pea nee mole fakalogo leva ia kia Moisese mo Alone, o fai ki te mea ae nee ui ki ai e te Eteleno.
Kutu
12Nee ui leva e te Eteleno kia Moisese: Ui kia Alone: Hiki tou tokotoko o taai te efu o te kele; pea e liliu anai te efu ko ni kutu i te fenua katoa o Esipito. 13Pea nee na fai leva ki ai. Nee faoi leva e Alone tona nima mo te tokotoko o taai te efu o te kele; pea nee liliu leva te efu ko ni kutu i te u tagata fuli mo te u manu fuli. Nee liliu leva te efu katoa o te kele ko ni kutu i te fenua katoa o Esipito. 14Kae nee fakaaoga foki e te kau gaohi mea fakatalakitupua anatou mea fakatemonio ke tupu ai ni kutu; kae nee mole natou fealagia. Nee mafola leva te u kutu i te u tagata mo te u manu. 15Nee ui leva e te kau gaohi mea fakatalakitupua kia Falaone: Ko te kaui tuhi aeni o te Atua! Kae nee fakafefeka leva e Falaone tona loto, pea nee mole fakalogo leva ia kia Moisese mo Alone, o mulimuli ki te mea ae nee ui ki ai e te Eteleno.
Lago kafo kona
16Nee ui leva e te Eteleno kia Moisese: Alu kei uhu kia mua o Falaone; e ulu anai ia ia o alu ki te vai. E ke ui anai kia ia: Koeni te folafola a te Eteleno: Tuku ke olo taku hahai, ke natou tauhi kia au. 17Kapau e mole ke tuku ke olo taku hahai, pea e au fekaui mai anai te u lago usiusi kia koe, mo au tagata faifekau, mo tau hahai, pea mo ou fale; e fonu anai te u fale o te kau Esipito i te u lago, pea e uli anai te kele i te u lago. 18Kae, i te aho aia, e au fakailoga kehe anai te fenua o Koseni ae e nonofo ai taku hahai; e mole mau anai i ai he foi lago, o tupu ke ke iloi ko au ko te Eteleno, e au nofo i loto o te fenua aena. 19E au fai anai he fakailoga i taku hahai mo tau hahai. Pea e hoko anai te fakailoga aena i apogipogi. 20Nee fai feia leva e te Eteleno. Nee ulu leva he faga lago usiusi ki te fale o Falaone mo ana tagata faifekau, pea nee maumaui leva e te u lago te fenua katoa o Esipito.
21Nee paui leva e Falaone ia Moisese mo Alone, o ui kia naua: Kotou olo o momoli ni sakilifisio ki tokotou Atua i te fenua. 22Nee tali leva e Moisese: E mole lelei te mea aia; koteuhi e matou momoli anai ki te Eteleno, tomatou Atua, ni sakilifisio ae e fakalialia ki te kau Esipito. Pea kapau e matou momoli anai i onatou mua ni sakilifisio ae e fakalialia ki te kau Esipito, pe e mole natou tuki makai anai matou? 23Koia e matou fai ai anai ni aho haele e tolu i te toafa, pea e matou momoli anai ni sakilifisio ki te Eteleno ko tomatou Atua, o mulimuli ki te mea ae e ui anai ia ia ki ai. 24Nee ui leva e Falaone: E au tuku anai ke kotou olo, o momoli ki te Eteleno, tokotou Atua, ni sakilifisio i te toafa; kae e mole kotou olo mamao anai moka kotou olo; pea ke kotou hufakii au. 25Nee tali leva e Moisese: E au mavae anai i tou fale, pea e au faikole anai ki te Eteleno. I te aho apogipogi, e fakamamao anai te u lago maia Falaone, mo ana tagata faifekau, pea mo tana hahai. Kae ke aua naa toe kaka anai ia Falaone, o fakafisi ke tuku ke olo te hahai o momoli ni sakilifisio ki te Eteleno. 26Nee ulu leva ia Moisese ki fafo mai te fale o Falaone, pea nee faikole leva ia ia ki te Eteleno. 27Nee fai leva e te Eteleno te mea ae nee kole e Moisese; pea nee ina fakamamao te u lago maia Falaone, mo ana tagata faifekau, pea mo tana hahai. Nee mole toe mau leva he foi lago pe e tahi. 28Kae nee toe fakafefeka leva e Falaone tona loto, i te faiaga foki aia, pea nee mole ina tuku leva ke olo te hahai.
ప్రస్తుతం ఎంపిక చేయబడింది:
EKESOTE 8: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
