EKESOTE 35
35
Fakamanatu o te sapato
1Nee fakatahii leva e Moisese te hahai katoa o te u fanau o Iselaele, o ui kia natou: Koeni te u mea ae e fakatotonu e te Eteleno: 2E gaue anai i te u aho e ono; kae ki te fitu aho ko he mea tapu anai ia kia koutou; ko te sapato ia, ko te aho malolo, ae nee fakatapu ki te Eteleno. Ko te tagata ae e ina fai anai he gaue i te aho aia, e tautea anai ia ki te mate. 3E mole kotou tafu anai he afi, i he nofoaga i okotou nofoaga, i te aho o te sapato.
Molaga ki te fau o te tapenakulo
4Nee palalau leva ia Moisese ki te hahai katoa o te u fanau o Iselaele, o ui: Koeni te mea ae nee fakatotonu e te Eteleno. 5Kotou too i okotou koloa he molaga ki te Eteleno. Ko te u tagata fuli e lotolelei, e natou aumai anai he molaga ki te Eteleno: ko he aulo, mo he siliva, mo he sila; 6mo ni kie uui, mo ni kie kula fakapouli, mo ni kie kula lelei, mo ni kie hina malohi, mo ni fului tao; 7mo ni kilii ovi tagata lanu kula, mo ni kilii tutuu, mo ni papa akasia; 8mo he lolo ki te u malama, mo ni mea fakamagoni ki te lolo tapu mo te kaloni fakamagoni; 9mo ni maka ko te onise* pea mo ni ihi age maka ki te teuteui o te efote* mo te peketolale*. 10Ko natou fuli ae e poto tufuga ia koutou, ke natou omai o fai te u mea fuli ae nee fakatotonu e te Eteleno: 11te tapenakulo, mo ona puipui, mo tona ato, mo ona fakamau, mo ona papa, mo ona papa fakalava, mo ona pou mo ona tuuaga; 12te aleka mo ona amo, mo tona tapunu, pea mo te kie ke uufi ai te aleka; 13te laupapa mo ona amo, mo ona mea gaue fuli, pea mo te u pane tapu; 14te tuuaga malama mo ona mea gaue, mo ona malama, pea mo te lolo ki te u malama; 15te aletale o te u kaloni mo ona amo, mo te lolo tapu, pea mo te kaloni fakamagoni, mo te lito o te matapa ulu ki te tapenakulo; 16te aletale o te u failaulau, mo tona ukamea pupu sila, mo ona amo, pea mo ona mea gaue fuli; te tanoa mo tona tafito; 17mo te u puipui tautau o te lotoa, mo ona pou, mo ona tuuaga, pea mo te lito o te uluaga o te lotoa; 18mo te u pike o te tapenakulo, mo te u pike o te lotoa, pea mo onatou maea; mo te u kofu gaue ki te gaue o te sagatualio, 19mo te u kofu tapu ki te tagata faisakilifisio ko Alone, pea mo te u kofu o ona foha ki te gaue fakapelepitelo.
20Nee mavae leva te hahai katoa o te u fanau a Iselaele ia mua o Moisese.
21Nee olo leva ia natou fuli ae nee lotoofa mo lotolelei, o ave anatou molaga ki te Eteleno ki te gaue o te falela tapu, mo tona tauhi, pea mo te u kofu tapu. 22Ko te u tagata mo te u fafine, natou ae nee lotolelei, nee olo leva o ave anatou molaga; ko te u hoai hau, mo te u mama, mo te u vesa, mo te u mea fakateuteu aulo kehekehe; nee natou tahi momoli leva tana molaga aulo ae nee fakatapui ki te Eteleno. 23Ko natou fuli ae nee natou mau ni kie lanu uui, mo ni kie kula lelei, mo ni kie kula fakapouli, mo ni kie hihina, mo he fului tao, mo ni kilii ovi tagata lanu kula, pea mo ni kilii tutuu, nee natou ave leva natou. 24Ko natou fuli ae nee natou fai leva ni molaga aki he siliva mo he sila, nee natou ave leva natou ki te Eteleno. Pea ko natou fuli ae nee natou mau leva ni papa akasia ki te gaue, nee natou ave leva ia. 25Ko te u fafine fuli ae nee poto tuitui aki onatou nima, nee natou ave leva te fua o anatou gaue, ko ni filo uui, mo kula lelei, mo kula fakapouli, mo hina. 26Ko te u fafine fuli ae nee lotolelei mo poto i te fi nee natou fi leva te fului tao. 27Ko te u pule o te hahai nee natou ave leva ni maka onise* mo ni ihi age maka ki te teuteui o te efote* mo te peketolale*; 28mo ni mea fakamagoni, mo te lolo ki te tuuaga malama, mo te lolo tapu, pea mo te kaloni fakamagoni. 29Ko te u fanau fuli a Iselaele, tagata mo fafine, ae nee natou lotolelei ke kau ki te gaue ae nee fakatotonu e te Eteleno kia Moisese, nee natou ave leva ki te Eteleno ni molaga o fakalogo ki te loto.
Fai o te gaue: Petesaleele mo Oliape
30Nee ui leva e Moisese ki te u fanau a Iselaele: Ke kotou iloi kua filifili e te Eteleno ia Petesaleele, foha o Uli, foha o Ulu, mai te fahaiga o Suta. 31Pea kua ina fakafonu ia Petesaleele aki te Laumalie o te Atua, mo te poto, mo te atamai, pea mo te poto i te fai o te u faahiga gaue fuli. 32Pea kua ina tuku kia ia te poto i te fai o ni mea foou, mo te u gaue aki te aulo, mo te siliva, pea mo te sila, 33mo te togi o te u maka ke fakapipiki ki te u kofu, mo te gaue o te papa, pea mo te fai o te u mea fakateuteu kehekehe. 34Pea kua ina foaki foki kia ia te poto i te faiako, pea e toe tatau mo Oholiape, foha o Ahisamake, mai te faahiga o Tane. 35Kua ina fakafonu naua aki te atamai, ke na fai te u gaue tuki mo te u gaue fakatufuga fuli, pea ke na tui te u mea fakateuteu, mo te u mea lalaga aki te u kie uui, mo kula lelei, mo kula fakapouli, mo hina, pea ke na fai te u gaue fuli mo te u mea foou fuli.
ప్రస్తుతం ఎంపిక చేయబడింది:
EKESOTE 35: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
