EKESOTE 19
19
Hai i te mouga o Sinai
1I te tolu mahina ki tanatou mavae mai te fenua o Esipito, nee kaku leva te u fanau a Iselaele i te aho aia ki te toafa o Sinai. 2I tanatou mavae mai Lefitimi, nee natou kaku leva ki te toafa o Sinai, pea nee natou fakatuu tonatou nofoaga i te toafa, ovi ki te mouga o Sinai. 3Nee hake leva ia Moisese ki te Atua: Pea nee kalaga leva te Eteleno kia Moisese mai oluga o te mouga, o ui: E ke palalau fenei anai ki te fale o Sakopo, pea e ke ui anai ki te u fanau o Iselaele: 4Kua kotou sisio ki te mea ae nee au fai ki Esipito, pea kua kotou sisio ki taku aumai koutou ki heni, ki oku tafa, o hage ko he akuila e ina ave ona uhi i oluga o ona pakakau. 5I te aho nei, kapau e kotou fakalogo mai ki toku leo, pea kapau e kotou tauhi taku fakapapau, e kotou liliu anai kia au ko he hahai mauhiga kehe age i te hahai fuli, koteuhi ko te kele katoa a aku; 6e kotou liliu anai kia au ko he puleaga o te u tagata faisakilifisio, ko he puleaga maonioni ke tauhi mai kia au. Ke fakaha te u palalau aia ki te u fanau a Iselaele.
7Nee toe liliu leva ia Moisese ki te nofoaga o fakatahii te kau matua o te hahai, pea nee ina tuku ki onatou mua te u folafola fuli ae nee fakatotonu age kia ia e te Eteleno. 8Nee tali leva e te hahai katoa: E matou fai ki te u mea fuli ae kua fakatotonu e te Eteleno. Pea nee toe ave e Moisese te u palalau aia ki te Eteleno. 9Nee ui leva e te Eteleno kia Moisese: Koeni, e au hau anai kia koe i he ao matolu, o tupu ke logo lelei te hahai i te temi ae e au palalau ai anai kia koe, pea ke tuumau tanatou tui kia koe. Nee toe fakaha leva e Moisese ki te Eteleno te u palalau a te hahai.
10Pea nee ui leva e te Eteleno kia Moisese: Toe liliu ki te hahai, pea ke ui kia natou ke natou fakamaa i te aho nei mo apogipogi, pea ke natou fakamaa onatou teu. 11Ke natou nonofo teuteu ki te tolu aho, koteuhi i te tolu aho e hifo mai anai te Eteleno ki te mouga o Sinai, pea e sio mata anai te hahai kia ia. 12E fakatuu anai ki te hahai he tuakoi ke ina takatakai te mouga katoa, pea ke fakaha: Ke aua naa kotou hahake ki te mouga pe e kotou fafa anai ki ai. Ko ia ae e lave anai ki te mouga, e tauteai anai ia ia ki te mate. 13E mole fafa anai he nima ki ai, hee tuki makai anai ia ia, pe e kaloloi ia ia aki he nahau: manu pee tagata, e mole mauli anai ia. I te temi ae e pupuhi ai anai te fakatagi pupuhi, e natou fakaovi anai ki te mouga. 14Nee hifo leva ia Moisese mai te mouga ki te hahai. Nee ina fakamaonioni leva te hahai, pea nee natou fakamaa leva onatou kofu. 15Nee ina ui leva ki te hahai: Ke natou teuteu ki te tolu aho. Ke aua naa kotou momoe mo okotou ohoana.
16I te tolu aho, i te mafoata, nee i ai leva ni mana, mo ni hila, mo he ao matolu i te mouga; pea nee natou logo leva ki te leo malohi fakamatakutaku o he fakatagi pupuhi; pea nee tete fuli te hahai ae nee nonofo i te nofoaga. 17Nee fakaulu leva e Moisese te hahai mai te nofoaga ki fafo ke natou felavei mo te Atua; nee natou tutuu i lalo o te mouga. 18Nee kohu katoa te mouga o Sinai, koteuhi nee hifo te Eteleno ki ai i lotomalie o he afi; nee malaga te kohu ki oluga o hage ko he kohu o he gutuumu kakaha, pea nee galulu katoa te mouga.
19Nee lelesili age te malohi o te gugulu o te fakatagi pupuhi. Nee palalau leva ia Moisese, pea nee tali mai e te Eteleno kia ia i he leo nee malohi o hage ko te mana. 20Nee hifo leva te Eteleno ki te mouga o Sinai, ki te tumutumu o te mouga. Nee kalaga leva te Eteleno kia Moisese ke hake ki te tumutumu o te mouga. Pea nee hake leva ia Moisese.
21Nee ui leva e te Eteleno kia Moisese: Hifo o toe fakamanatu ki te hahai e tapu mamafa te oho ae ke sio ki te Eteleno, koteuhi naa mate he kaugamalie o natou. 22Ke toe fakamaa foki te kau tagata faisakilifisio, ae e fakaovi ki te Eteleno, koteuhi ke aua naa tamatei natou e te Eteleno. 23Nee ui leva e Moisese ki te Eteleno: E mole feala anai ke hake te hahai ki te mouga o Sinai, koteuhi kua ke tuku mai kia matou te tapu mamafa aeni, o ui: Fakatuu he tuakoi o takatakai ai te mouga, pea ke fakamaonionii te mouga. 24Nee ui leva e te Eteleno kia ia: Alu, hifo; pea ke toe hake mai mo Alone. Kae ke aua naa hake mai kia au te kau tagata faisakilifisio mo te hahai, koteuhi ke aua naa au tauteai natou ki te mate. 25Nee hifo leva ia Moisese ki te hahai, o fakaha te mea aia kia natou.
ప్రస్తుతం ఎంపిక చేయబడింది:
EKESOTE 19: WB2011
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
