MARKO 16
16
1Go ragi waina sabbath e nopu, Maria ni Macdala, go Maria Yakobo p̃ilana, go Salome, eu pakotovi tea ni nap̃o wia maga, naga euga umai po puvurai ki nia. 2Go malip̃ogi sa ni naaleatia vea ni wiik, eu rumai paki matigo ragi waina elo e sake sua. 3Go eu do dum̃ada noa ki da, Sei ega wo manigida malulua ki vatu m̃elu dua ki namata ni matigo? 4Go eu sike namatada, po punusi naga vatu e pei tea maluluakiana liliu: nalakena e p̃arua sa. 5Go eu paki ekopu ni matigo, po punusi natureai sikai e do natano taleva ni matua, e pei tea sugoroana ki sugoro tare sikai; go eu maga p̃arua. 6Go e noa ki da, e naga, Kuga ta maga p̃arua mau: ku laaga Yesu ni Nasareth, waina e pei tea turiana nakau valadagoto: e po duleana; e da doko nea mau: kuga leo, tokora waina eu doropusi a e one asa! 7Ma kuga vano, kuga noa ki tea vasapiseikiana aneana maga go Petero, naga E pea ki mu paki Calilea pano: tokora wanogoe kuga wo punusi a asa, dakiusi waina e noa ki mu asa. 8Go eu dave pano, po sava m̃elu dua ki matigo pano; nalakena narururuana go nasaram̃akotoana ero puati ra: go eu da noa ki te naata te navatuna mau; nalakena eu mataku.
9Go ragi waina e duleana malip̃ogi sa ni naaleatia vea ni wiik, e pea pakilina ki Maria ni Macdala, waina e mari dimon larua eu dave m̃elu dua ki nia pano sala vea. 10Nae e pano po dogorogo ki nia paki tea maga waina eu sikoti a doko sala vea, eu do susue po do dagi. 11Go nara, ragi waina eu dogo naga e mauri, go naga nae e punusi sua e, eu da saralomau mau.
12Go edaku ki tea maga wanogoe e panop̃ota pakilina ki tea rua kakada, ragi waina ero surata paki navanua pano. 13Go nara ero pano po dogorogo ki nia paki tea p̃ota maga: go eu da saralomau navasaana adeada mau.
14Go e edaku pakilina ki tea rualima sikai tamate sikai ragi waina eu kere one ganikani; go e pasa kasua ki da nasarateap̃aloana adeada go nakasuaana ni nap̃op̃oda, nalakena eu da saralomau navasaana ki tea maga waina eu punusi a edaku ki e duleana mau. 15Go e noa ki da, e naga, Kuga vaki maramana mamau, po dogorogo ki narogorogoana wai paki natawonakiana mamau. 16Tea waina e saralomau po pei tea bapetisoana ega wo pei tea mautipauriana; ma tea waina e da saralomau mau ega wo pei tea tip̃akotoviana. 17Go navaivaiana maga waia euga wo dausi sikoti tea maga waina eu saralomau: pae nagisagu euga wo mari dimon maga euga tave m̃elu pano; euga wo pasa ki namena vau maga; 18euga wo pua dakati m̃aata maga, go eu pe munu te navatuna ni namateana, ega wo da mari sa ki da mau; euga wo pusake nam̃elearuda maga tea sasana maga, go euga wo moro p̃ia.
19Go Nawota Yesu, edaku ki e pasa ki sua ra, e pei tea tapeana sake paki nakoroatelagi pano, po dasake pisari nam̃elearu ni matua ni Sup̃e. 20Go nara eu dave pano po dogorogo sara tokora, Nawota e do p̃osiwosi sikoti ra, po do lawosoki navasaana pae navaivaiana maga waina eu dausi a. Amen.
ప్రస్తుతం ఎంపిక చేయబడింది:
MARKO 16: NTB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible Society of the South Pacific
