Rut 2
2
Rut male ue'ta di'me lanaĝanaqa' joñe'me Booz
1Jañe'me Noemí, 'uo joga'me ledaua jo'ne laqaya di'me loua Elimélec, jo'ne lenaĝat Booz, naqaega yataqachiñe neuoyaq choqoda'me 'uo da'me lejaliaĝa. 2Qama'le 'uo joca'li jo'me nolo' male jañe'me Rut dojapegue' jañe'me Noemí:
«Jayem auaje'tem da'me jetaque jec'atenaĝanegue gamachaqaega ga'me nanaĝanaqa', qaedi uotaĝa 'uo joga'me daqataĝan maqachaĝa jayem yaje'tem da'me ch'e jetaque jequetapegue', qama'le jacona jena'me 'naqañe ga'me lanec jala.»
'Yateguet joca'li jañe'me li'yodo:
«Jamo, yalole.»
3Qama'le jañe'me Rut male ec joca'li, dajoyi ga'me nanaĝanaqa', qama'le joca'li male ue'ta di'me aleua male yacona jena'me ja yacota naa'me dapogaĝa'tape, qalaĝaja ch'e petauo joca'li jañe'me. Qalaĝaja di'me nanaĝanaqa' jo'ne ueta'ña jañe'me mach'e loĝot joñe'me Booz, jo'ne mach'e laqaya jodi'me Elimélec. 4Male ca'e di'me Belén ñe'me Booz, paja'a yec'ata di'me lanaĝanaqa', qama'le yauanalo jogaa'me lamaĝa's qampaja'a yep'iye'n joca'li:
«¡Joñe'me Jaliaĝanec ami ue'tajopa!»
'Lataĝa'j jogaa'me lamaĝa's:
«¡Nataq'aen am ue'tajop!»
5Male quelegue di'me 'naleua joca'li, qampaja'a yauana jañe'me yauo, qama'le yenat ga'me lejaliaĝane'j gaa'me namaĝa's:
«¿Jach'e jana'me janjo' yauo jo'ne ami uetauelo?»
6Qampaja'a 'yateguet joñe'me nejaliaĝanec joñe'me qoyenat joca'li:
«Jana'me janjo' q'añole mach'e Moab laje jo'ne quelqaya naayi jañe'me Noemí, chiyoqoda'ña di'me Moab. 7Jana'me janjo' yauo quidi yataqachiñe jayem nachoĝodenot qama'le eetac: “Am ñachoĝodenot qaedi jayem auaje'tem da'me ñato jena'me jenjo' jo'ne ja auacoñiya, jena'me jenjo' adaniqui”. Ca'li ne'teta da'me novi', male yacona jena'me jenjo' ueta'añdi, chayovida'a nayi yataqachiñe 'uañaĝae, choqoda'me yemta 'nomategue jana'me.»
8Ñe'me Booz male yiyaĝana jañe'me Rut joca'li:
«Cha'li jayem anaquiaĝana: ena'te oc jo' qomle, ena'te auec'ata ga'me nanaĝanaqa' laqaya, maq joda'me jetaque ouetauelo naa'me naajo' yauo' jo'ne mach'e yamaĝajel. Jetaque avichoĝoden jena'me jenjo' 'yaqatacolac. 9Jepaquetapega da'me yataqachiñe auec'aten ga'me tade'ga naa'me yamaĝa's, qama'le oquetapegue'to jonaa'me naajo' yauo'. Nataq'aen joote jojapegue'to naa'me yamaĝa's qaedi yataqachiñe qaya'te am yeloiquiaĝatac naa'me naajo' noloqo'ote. Qom male adeliñquip, mach'e auec'atalo naa'me noĝop lete' qama'le aniyomigui joga'me niyomidigui naa'me yamaĝa's.»
10Male yem joca'li da'me lojaĝac joñe'me Booz, qama'le jañe'me Rut yataqachiñe yejoidiñe naa'me leliquetel, naqapaĝanoue jena'me aleua, qama'le enaac:
«¿Toqoch'e jayem a'uetec jena'me jenjo', da'me yataqachiñe jayem avichoĝoden, qama'le ja 'yachaqa'ena?»
11Male ñe'me Booz yitaĝa 'yateguet joca'li jañe'me:
«Joote jayem qo'yaĝatem yema joga'me a'uetapec jañe'me adi'yodo, joda'me yataqachiñe avichoĝoden jañe'me, chiyoqo'ta ca'li yeleu di'me adoua, nataq'aen da'me jayaten da'me oca'e joga'me adayi, nataq'aen oca'e joga'me yataqachiñe at'achaqa', qaedi nayi male qo'mi ouetauelo, jena'me jenjo' aleua jo'ne yataqachiñe qaya'ague, chayovida'a da'me uotaĝa ja qo'mi 'te auateto'n, nataq'aen uotaĝa auenaac ja qo'mi 'te adayi. 12¡Ñe'me Jaliaĝanec jo'ne Nedios jena'me Israel yataqachiñe am yecodelegue da'me loqopich'i, chayovida'a da'me lichoĝodenataĝanaĝac am yanem, jo'ne mach'e naqaeñe jo'ne auelotaque ga'me loqopich'i nataq'aen ga'me leyalaqataĝanaĝac jo'ne jenjo' nolo' am ue'tajop! ¡Jepaquetapega da'me yataqachiñe onaĝaic joga'me am 'yetec joñe'me Jaliaĝanec!»
13Qama'le jañe'me Rut male 'yateguet joca'li:
«Am jaliaĝanec, yataqachiñe t'adaic joga'me ñegracias am janem. Jayaten da'me am yataqachiñe onaĝaicaloec, nataq'aen ñegracias am janem queda'me yataqachiñe jayem avichoĝoden, mate mane'e ja jayem 'te adamaĝaje.»
14Male deque'tape ñaa'me, qama'le ñe'me Booz yitaĝa yiyaĝana jañe'me Rut qama'le enaac joca'li:
«Am enegue, anovitequena, jena'me jenjo' qadiqui'yaĝala'.»
Qama'le jañe'me Rut male uetauelo joca'li deque'tape yema gaa'me namaĝa's, male ñe'me Booz naqaeñe ya'uo le'ec joca'li ga'me lecoqui, qama'le deque'etac jañe'me chayovida'a da'me yataqachiñe yono'. Qama'le yataqachiñe matac, nataq'aen maliaĝa 'uo joga'me 'niyoĝot joca'li, qama'le yachi, uenate'ta jaga'me li'yodo. 15Yem da'me liqui'yaĝac, Rut male yitaĝa yec'ate'ga di'me nanaĝanaqa' qaedi yacona jena'me 'naqañe jena'me nanec. Male joote qaga, qama'le Booz enaac joca'li dojapegue'to gaa'me lamaĝa's:
«'Noota qom jajo'me Rut nataq'aen male ena'am napoc jena'me jenjo' qadanec, ja ja'amaqaten da'me ch'e epetac, 'noota qom yaconoue jena'me jenjo' onaĝaic nanec, nataq'aen ena'te aueloiquiaĝañetac. 16Nataq'aen yataqachiñe ami jamaĝalo'te da'me 'uo ga'me aueñi 'naqañe nale, qaedi onaĝaic joga'me li'yac, nataq'aen male ena'te 'uo joga'me niquiya'a jana'me.»
17Male Rut ue'ta di'me Booz 'naleua, dapogaĝatac joca'li ne'teta chayovida'a 'nalchiñe joca'li, qama'le male yec'aten ga'me lapoguec, qama'le yataqachiñe yoqoch'em queda'me yovita di'me veinte kilos joga'me cebada. 18Male yec'ata di'me noic, jalcote ga'me li'yac jo'ne lapoguec, qaedi male yaloĝona jañe'me li'yodo. Nataq'aen yanem jañe'me Noemí joga'me niqui'yaĝat jo'ne 'niyoĝot ca'li uetauelo jogaa'me Booz lamaĝa's. 19Qama'le Noemí yenat jañe'me:
«¿Jach'e ga'me oue'tague jo'me nolo' da'me a'uonataĝatac? ¿Jach'e ga'me auachiyoĝo'tague da'me yataqachiñe jalcote jena'me jenjo' adi'yac? ¡Qonelochi'ña jo' jo'me am lecochiya!»
Yem joca'li da'me lojaĝac jañe'me Noemí, qama'le jañe'me Rut male yemta yema 'yaĝatem ga'me yauotac jo'me nolo', nataq'aen enaac:
«Ñe'me jiyaĝaua jo'ne joue'tajop jo'me nolo' mach'e lenaĝat Booz.»
20Qampaja'a joca'li domachiya jena'me jenjo' jañe'me Noemí male enaac:
«¡'Noota qom joñe'me Jaliaĝanec Dios yataqachiñe ue'tajop joñe'me! Yataqachiñe onaĝaicaloec queda'me qo'mi yichoĝode'n, ena'am da'me e'tema ca'li jodia'me joote qayaua jo'ne qadoua'. Jetaque nataq'aen am ja'aĝatem queda'me jenjo' jiyaĝaua mach'e ya'yoĝoua, qama'le qoyaje'tem da'me qo'mi netelalo.»
21Ca'li domachiya jena'me jenjo' jañe'me Rut yitaĝa enaac:
«Ñajachaĝa qo'me jayem etapega da'me 'noota ta'le jouetauelo naa'me lamaĝajel, chayovida'a qom qaya di'me lanec.»
22Yitaĝa paja'a 'yata'a jañe'me Noemí jañe'me late:
«Am yalole, yataqachiñe onaĝaic jena'me jenjo' ta'le ouetauelo naa'me lamaĝajel. Qama'le ena'te auec'ata ga'me nanaĝanaqa' laqaya, qaedi ja am 'te qoyeloiquiaĝatac.»
23Qama'le jañe'me Rut male uetauelo naa'me lamaĝajel joñe'me Booz chayovida'a ca'li male qaya jo'me lanec jo'ne auaqapi jala, nataq'aen da'me yataqachiñe ja ca'e jañe'me li'yodo jo'ne male 'yaĝaina'.
ప్రస్తుతం ఎంపిక చేయబడింది:
Rut 2: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.