Exode 21
21
Iyumbu in sá Eebru yabee pu marab
1Ní ti-Dindaan gíti kútì ki lī yii: «Marab bin a làá yóoń Isirayeel yabee sèé. 2Ni yaa làá dāá dā uyumbu ní u sá ueebrujee, ú dāá dū abin aluu kí tɔ̄ ditundi kí tīī-ni, dibinluluútiilee ní yàntī ú nyā kí tɔ̄ u-ba, kí taa pà báà tiba. 3U yaa nìn sá ujaakpaati ní ni dá-u ú nīn tūǹ-ni ditundee, ú fàtīí nyā u-baba. U yaa nìn cáá unimpuee, ú nyā kí kpáaǹ u-nimpuu. 4An yaa sá u-kpiliu di cáá unimpu ki tīī-u ní unimpuee màl̄-u mbininjabiyaamu àá nnimpubiyaamuee, u-kpiliu di yì unimpu nì mbiyaamu, uyumbuee ń nyā u-baba. 5Ama uyumbuee yaa bí yii: <M néeń m-kpiliu nì m-nimpuu nì m-biyaamu, maa làá nyā kí nīn tɔ́ m-ba,> 6niinee ní u-kpiliu ń cùnnì-u Unimbɔti nimbiin. Ú sútí-u kí pìl̄ kudii punyɔkɔki ní kí dū u-tafal kí nákáǹ punuu àá ndɔ ŋun pu punuu nákée ní kí dū mpiin kí sāā kí cíĺ u-tafal, ní ú kpántí u-yumbuu kí nīn cáa cá jaanjaan#21.6 B. 2-6: kpèè Akoo 25.39-46..
7«Ubɔ yaa dū u-bisal ki nyáfì ú nīn sá uyumbuee, úǹ kaa làá nyā kí tɔ̄ u-ba kii bininjab nín bí puee. 8Usapɔɔnee bɔti yaa kaa fáatì u-kpiliu ú dū-u kí kpántí u-nimpuuee, u-yab ń pà kí fàtīí fōō-u. U-kpiliuee kaa cáá nsan kí dū-u kí nyāfiǹ uniyaŋyan. U yaa ŋá mimmee, u nyáń usapɔɔnee boon. 9U yaa dá-u ki tīī u-jipɔɔn cááyee, ú ŋá kii mara nín lī yii bí ŋá bisapɔmbi puee. 10Boonee u yaa láa fātìi cáá unimpuliliitee, ú taa láa bàtī unimpukpiki nín cáá nsan kí fōō tiŋyee báà tiba pu, an dàkà yii tijin jandi nì tiwampeeŋkaal jandi nì uninja nì unimpu dooŋu jandi. 11U yaa yíì kaa bíi ŋáań tiwan tita nee ki tìì-uee, unimpuee cáá nsan kí nyā kí tɔ̄ u-ba kí taa pà báà tiba.»
Ikpiti in unil yaa ŋá u máaǹ ŋkúmee
12«Un di yaa fáá ki kūū u-jutee, bí kpɔ̀ udaan#21.12 Kpèè Akoo 24.17.. 13U yaa kaa píĺ-u ki yóoǹ ní an sá yìkíl̄ yikil ní udaan dūu dīntiǹ-uee, m làá lēē mpaan ŋubɔ ŋun poon ní u làá sāǹ kí cùú báĺee#21.13 Mpaan ŋun bɔti bi bíi sòoǹ biyakatikaabi nee poonee, kpèè Dikà 35.9-34, Ditee 19.1-13, Joos 20.1-9.. 14Ama un di yaa nyí ní ki ŋá nciin ki kūū u-jutee, báà udaan yaa sáǹ ki cūtìi kɔ́ m-saraafaŋŋu, ní nyāntí-u kí kpɔ̀-u#21.14 Dibɔkpil dambi nìn néeń ki sáń ki kóò isaraafan nì circir kɔŋkooŋŋu kí ŋmā kí fīī bi-ba (kpèè 1 Bib 1.50-53, 2.28-34)..
15«Un di yaa fáá u-baa àá u-nee, bí kpɔ̀-u.
16«Un di yaa yùn̄ unil ki nyáfì àá u bí u-ceeyee, bí kpɔ̀-u#21.16 Kpèè Ditee 24.7..
17«Un di yaa sīī u-baa àá u-nee, bí kpɔ̀-u#21.17 Kpèè Akoo 20.9, Maat 15.4, Maar 7.10..»
Unil yaa fáá u-juti ki tīī-u tiweendee bɔti
18«Binib bili di yaa bíi jáà ní ubɔ fáá u-juti àá u yá-u ditaŋkpal ní u fōō tiweendi kaa kpíìyee, 19u yaa láa yíkì ki ŋūǹ kí nyīī ŋkpandɔ kí nyā mmɔŋki kí còom̀ee, un fáá-u ní u fōō tiweendee nyáń tibɔtin. Ama an sá ú pà u-juti tundi din u bàà làá tɔ̄ an gbēeǹee pu, ní kí cáaǹ-u ú pɔ̄ɔkì kɔkɔ.
20«Ukpil un di yaa dū ndɔ ki gbáń u-yumbuu uninja àá unimpu ní u kpíì u-ŋaanee, bí tɔ̀-u ipɔntoon. 21Ama ŋwiin ŋubɔ àá ili boon ní u yaa kpíìyee, bí taa tɔ̀-u ipɔntoon, kun puee u-kpiliu dū u-nimbiliŋ ní ki dá-u.
22«Bininjab yaa bíi jáà ní ki cūtìi bìl̄ upɔdaan ní u màl̄ dikáal tiba kaa ŋá-uee, u-cal ń gíí dipɔndi ní un ŋá mimmee ń pà kí nóó nì bibɔsoonliibi nín sòon̄ ki síiǹ puee. 23Ama an yaa ŋá míǹ ní unimpuee kpíìyee, see bí kpɔ̀ un ŋá mimmee kí téeǹ. 24Ubɔ yaa lēē u-juti nimbilee, bí lēē u mun yal. Ubɔ yaa lēē u-juti nyindee, bí lēē u mun yal. Ubɔ yaa gūutì u-juti ŋalee, bí gùutī u mun yɔŋu. Ubɔ yaa gūutì u-juti taalee, bí gùutī u mun yal. 25Ubɔ yaa wùn̄ u-juti ŋŋmee, bí wà u mun ŋŋmi. Ubɔ yaa gbáń ki léetì u-juti wuntee, bí gbá kí léetí u mun yati. Ubɔ yaa ŋá u-juti tiweendee, bí ŋá u mun tiweendi#21.25 B. 23-25: kpèè Akoo 24.19-20, Ditee 19.21, Maat 5.38..
26«Ukpil un di yaa fáá u-yumbuu uninja àá unimpu nimbil ní di kpíìyee, ú gíiǹ-u kí líí ú tɔ̄ u-ba. Uyumbuee ń taa pà báà tiba dinimbil din kpíìyee pu. 27An yaa ti sá u-yumbuu uninja àá unimpu nyindi ní u gbáń ki lēēyee, ú gíiǹ-u kí líí ú tɔ̄ u-ba. Uyumbuee ń taa pà báà tiba bi nín gbáń-u dinyindi din lēēyee pu.
28«Unaa di yaa gūū ki kūū uninja àá unimpuee, bí yāŋkì unaayee ataŋkpee kí kpɔ̀. Bí taa ŋmɔ́ unaayee nanti, ama ní kí taa ŋá unaa daan tiba. 29An yaa sá yii unaayee pée gùutī binib míǹ, ní bi tùkū u-dindaan ki kpáafì-u ní waa kpēē-u tiŋan ní u gūū ki kūū uninja àá unimpuee, bí yāŋkì-u ataŋkpee kí kpɔ̀, ní kí kpɔ̀ u-dindaan mun. 30Bi yaa gíí udaan dipɔndi ú pà kí dā u-maŋfalee, ú pà kunimbiŋmiiu kun bi gíí-uee kɔkɔ. 31An yaa sá kinaacimpɔmbiki àá kisapɔmbiki ní unaa gūū ki kūūyee, bí nóó mara gbanti ubaanti. 32Unaa yaa gūū uyumbu uninja àá unimpuee, unaayee dindaan ń pà animbil jitɔmbi mmuŋku nì saalaa kí tīī uyumbuee kpiliu, ní bí yāŋkì unaayee ataŋkpee kí kpɔ̀.
33«Ubɔ yaa gbìn̄ dinyimbɔbil ní kaa bīiǹ àá u bīitì kaa gíiǹ ki bīiǹ ní ubɔ naau àá u-maŋki jéetì poonee, 34dinyimbɔbil daan ń pà kuwaŋkuluuee nyampooku nín sá puee, ní kí yòon̄ diwaŋkpil.
35«Ubɔ naau di yaa gūū ki kūū u-juti yɔuee, bí dū unaa un gūū u-jutee kí nyāfì, ní bin yì inaayee liitil ń yàkatī animbil nì unaa un kpíìyee nanti. 36Ama unaayee dindaan yaa nyí yii u-naau pée gùutī míǹ ní kaa kpēē-u tiŋanee, ú nyàab̀ unaa kí téeǹ unaa un kpíìyee yil pu kí yòon̄ dinakpil.»
Tiwaŋkuti naayubu
37«Ubɔ yaa yùn̄ unaa àá upii ki kūū àá ki nyáfèe, ú téeǹ inaa iŋmoo unaa un u yùn̄ee yil pu, ní kí téeǹ ipii inaa upii ubɔ un u yùn̄ee yil pu#21.37 Tigbɔn tiba poonee, 21.37-22.30 sá 22.1-31..
ప్రస్తుతం ఎంపిక చేయబడింది:
Exode 21: BASSARDC
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
BIBLE EN N'TCHAM (Bassar) © Alliance Biblique du Togo, 2013.
