ಯೋನ 4
4
ದೇವ ಕಣಿಕಾರ ಕಾಟ್‌ನಂಗ್‌ ಯೋನಂಡ ಚೆಡಿ
1ಅಲ್ಲಿಂಜ ಯೋನಂಡ ಮನಸ್ಸ್‌ ದುಂಬ ನೊಂದತ್. ಅದಲ್ಲತೆ ಅಂವೊಂಗ್‌ ದುಂಬ ಚೆಡಿ ಬಾತ್. 2ಅಕ್ಕ ಅಂವೊ ಯೆಹೋವನ ನೋಟಿತ್ ಬೋಡ್‌ಚಿ: ಓ ಯೆಹೋವನೇ, ನಾನ್‌ ನಾಡ ದೇಶತ್‌ ಇಪ್ಪಕಲೇ ಇನ್ನನೆ ಆಪಾಂದ್‌ ಎಣ್ಣ್‌ನಲ್ಲ? ಅದ್‌ಂಗಾಯಿತ್‌ ನಾನ್‌ ಮಿಂಞಲೇ ತಾರ್ಷೀಷ್‌ಕ್‌ ಓಡಿಪೋನ. ನೀನ್‌ ದಯೆ, ಕನಿಕರ, ದೀರ್‌ಗ ಶಾಂತಿ, ಬಲ್ಯ ಕೃಪೆ ಉಳ್ಳಂವೊನು, ದಾರ್‌ನೊ ನಾಶ ಮಾಡುವಕ್‌ ಕುಶಿ ಪಡತೆ ನೀಡ ಮನಸ್ಸ್‌ನ ಬದ್‌ಲ್‌ಚಿಡುವ ದೇವಾಂದು ನಾಕ್‍ ಗೊತ್ತುಂಡ್. 3ಆನಗುಂಡ್‌ ಯೆಹೋವನೇ, ನಾಡ ಪ್ರಾಣತ್‌ನ ಎಡ್‌ತ, ನಾನ್‌ ಬದ್‌ಕ್‌ವಕಿಂಜ ಚಾವದೇ ನಲ್ಲದ್‍ೕಂದ್‌ ಎಣ್ಣ್‌ಚಿ. 4ಅದ್‌ಂಗ್‌ ದೇವ: ನೀನ್‌ ಚೆಡಿ ಮಾಡ್‌ವದ್‌ ಸೆರಿಯಾಂದ್‌ ಕ್‍ೕಟತ್?
5ಪಿಂಞ ಯೋನ ಪಟ್ಟಣತ್‌ಂಜ ಪೊರ್‌ಟಿತ್‌ ಅದ್‌ಂಡ ಕ್‍ೕಕ್‌ ದಿಕ್ಕ್‌ಲ್‌ ಒರ್‌ ಚೆರಿಯ ಗುಡಾರ ಮಾಡಿಯಂಡ್‌ ಆಂಡ ನಳತ್‌ಲ್‌ ಅಳ್‌ತಂಡ್‌ ಆ ಪಟ್ಟಣಕ್‌ ಎಂತ ಆಪಾಂದ್‌ ನೋಟಿಯಂಡ್‌ ಪಾರಕಾತಂಡಿಂಜತ್.
6ಅಕ್ಕ ಯೆಹೋವನಾನ ದೇವ ಅಣಕೆ ಗಿಡ ಬೊಳೆಯೊಕ್‌ ಬುಟ್ಟಿತ್‌ ಯೋನಂಡ ಮಂಡೆಕ್‌ ನಳ ಬೂವನೆಕೆ ಪಬ್ಬಿಚಿಟ್ಟತ್. ಆ ಅಣಕೆ ಗಿಡನಗುಂಡ್‌ ಯೋನಂಗ್‌ ದುಂಬ ಕುಶಿಯಾಚಿ.
7ಪಿತ್ಯಾಂದ್‌ ಪೊಲಾಕ ಸೂರ್ಯ ಉದಿಪಕ್‌ ಮಿಂಞ ದೇವ ಒರ್‌ ಪುಳುನ ಅಣಕೆ ಗಿಡನ ತಿಂಬಕ್‌ ಅಯಿಚತ್. ಆ ಗಿಡ ಒಣಗಿ ಪೋಚಿ. 8ಸೂರ್ಯ ಉದಿಚದು ದೇವ ಅಲ್ಲಿಂಜ ಬಿಸಿ ಕಾತ್‌ನ ಅಯಿಚತ್. ಪಿಂಞ ಸೂರ್ಯಂಡ ಬೆದ್‌ ನೇರೆ ಯೋನಂಡ ಮಂಡೆಕ್‌ ಬುದ್ದತ್. ಅಕ್ಕ ಅಂವೊಂಗ್‌ ದುಂಬ ಬೆಜಾರ್‌ ಆಯಿತ್, ಚತ್ತ್‌ ಪೋಪಕುಳ್ಳ ಮನಸ್ ಬಾತ್. ಅಕ್ಕ ಅಂವೊ, ನಾನ್‌ ಬದ್‌ಕ್‌ವಕಿಂಜ ಚಾವದೇ ನಲ್ಲದ್‍ೕಂದ್‌ ಎಣ್ಣ್‌ಚಿ.
9ಅಕ್ಕ, ದೇವ ಯೋನನ ನೋಟಿತ್: ನೀನ್‌ ಅಣಕೆ ಗಿಡಕಾಯಿತ್‌ ಚೆಡಿ ಮಾಡ್‌ವದ್‌ ಸೆರಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಯೋನ: ಅಕ್ಕು, ನಾಕ್‍ ಚಾವಚ್ಚಕ್‌ ಚೆಡಿ ಬಂದದ್‌ ಸೆರಿಯೇಂದ್‌ ಉತ್ತರ ಕೊಡ್‌ತತ್. 10ಅದ್‌ಂಗ್‌ ಯೆಹೋವ: ನೀನ್‌ ಆ ಅಣಕೆ ಗಿಡಕಾಯಿತ್‌ ಕಷ್ಟಪಟ್ಟಿತಿಲ್ಲೆ, ಬೊಳ್‌ತಿತು ಇಲ್ಲೆ. ಅದ್‌ ಒರೇ ಬಯಿಟ್ ಪುಟ್ಟಿತ್‌ ಒರೇ ಬಯಿಟ್‌ಲ್‌ ನಾಶ ಆಚಿ. ಆ ಅಣಕೆ ಗಿಡಕಾಯಿತ್‌ ನೀನ್‌ ಕನಿಕರ ಪಟ್ಟಂಡುಳ್ಳಿಯ ಅಲ್ಲಾ. 11ಅಕ್ಕ, ಏದ್‌ ಸರಿ ಏದ್‌ ತಪ್ಪ್‌ಂದ್‌ ಗೊತ್ತಿಲ್ಲತ ಒರು ಲಕ್ಷ ಇರುವದಾಯಿರಕ್‌ ಜಾಸ್ತಿ ಉಳ್ಳ ಜನಳು, ದುಂಬ ಪ್ರಾಣಿಯ ಉಳ್ಳ ಆ ಬಲ್ಯ ನಿನೆವೆ ಪಟ್ಟಣಕಾಯಿತ್‌ ನಾನ್‌ ಕನಿಕರ ಪಡತೇ ಇಪ್ಪೋಂದ್‌ ಕ್‍ೕಟತ್.
ప్రస్తుతం ఎంపిక చేయబడింది:
ಯೋನ 4: ಕೊಡವ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, New Life Literature (NLL)