Abanya Kolosaĩ 2
2
1Nyanzĩre imwaminya ngoko nabiriyitsinga kutsibu busana nenyũ, na busana nʼabandu bʼeLaodĩkĩa, kandi busana nʼabandu bosĩ abatebanyilolako nʼerinyiminya. 2Nyiti kumbe bahande emitima yabo, ibabohana omo lwanzo, ibatoka erĩowa ndeke-ndeke nʼeriminya kutsibu ngoko Kristo nĩ kũmbo lya Nyamuhanga. 3Kusangwa obuteke bosĩ bwʼamenge, nʼeriminya bĩbĩseme omo byala bya Kristo. 4Busana nʼekĩ ngababwira Sihabye omundu oyũkabatebaya omo bĩnywa byʼekĩsehya. 5Nomo nangabya isindi eyo omo mubiri, nĩkwa indi haguma nenyũ omo kĩrĩmu, kandi ngatsema erilangira ngoko mũsĩkĩre nʼerihangana ndeke omwʼĩkĩrĩrya lyenyũ uku Kristo.
Erĩhĩkana ndeke likabya busana na Kristo
6Neryo, kusangwa mwabiriangirira Kristo Yesu mo Mukama, mumukwame nʼerimatikana naye. 7Muhande emĩrĩhĩ yenyũ omwisi wuwe. Mũsĩkaye erĩkĩrĩrya lyenyũ ngoko mwakangĩrĩrĩbawa. Mubye nʼomutima oswĩre nʼewasĩngya.
8Mũtegaye, Sihabye mundu oyukabanyega omo menge wʼabandu nʼeriteba buyira erĩkalũa oko mitsye yʼabandu, nʼoko myatsi yʼebĩrĩmũ ebikatabala oko bihugo, eyĩtalũa uku Kristo. 9Kusangwa erimatikana na Kristo liwite erĩhĩkana lyosĩ lya Nyamuhanga omo mubiri. 10Kandi mũhĩkene busana nʼerimatikana na Kristo. Kristo ni mukulu oko buli mũtabalĩ kutse oko mwenye hamũlĩ.
11Erimatikana na Kristo mwabanĩbawa, butsira eribana eryo bandu bakayira, nĩkwa omwʼibana eryo Kristo akakola eribohola omundu oko maka wʼomubiri. 12Kusangwa omwʼĩbatĩsĩbwa lyenyũ momwatabwa haguma na Kristo. Kandi omwʼĩbatĩsĩbwa lyenyũ, mwalũbũkĩbawa haguma na Kristo busana nʼerĩkĩrĩrya lyenyũ omo bũtokĩ bwa Nyamuhanga, obwalũbũkaya Kristo oko luholo. 13Nenyũ mwabya baholĩ busana nʼamalolo wenyũ, kandi busana nʼeribya bandu bʼEbihanda bitawite Migambo. Nĩkwa Nyamuhanga abiribaha engebe haguma na Kristo. Naye abiritubuyira amalolo wetu gosĩ. 14Kandi abirisangula emyatsi eyabya ĩsakĩre, eyikatuhandikirira. Nyamuhanga mwalũsya yoho, nʼerikongomererayo oko musalaba. 15Neryo oko musalaba oyo Kristo mwasingula abatabalĩ nʼabʼehamũlĩ, kandi mwahemulabo, nʼerĩnũbyabo embere syʼabandu.
16Neryo simuleke omundu eribatswera omo myatsi yʼakalyo, kutse erĩpũlya, kutse busana nʼekiro kikulu, kutse ekiro kyʼomukera muhya-muhya, kutse ekiro kyʼeSabato. 17Emyatsi eyĩ nĩ kyũtsũtsũ kyʼebyo ebikandisyasa. Nĩkwa ebyʼekwenene ni Kristo. 18Simuleke omundu eribatswera nʼeribateba ati abirilota esyonzolĩ, kutse oyo wanzĩre erĩyĩkehya, nʼerĩramya abamalaĩka. Omundu oyũ akayĩhamaya buyira busana nʼobũlengekanĩa buwe. 19Siakihambana na Kristo, oyuli mutwe. Ye Kristo akaleka omubiri gosĩ erĩtũwa nʼerilukwa haguma busana nʼesyonungo nʼemĩsĩsa; omubiri oyũ iniakula ngoko Nyamuhanga anzĩre akakula.
Erihola nʼeribyaho haguma na Kristo
20Mwamabya mwabirihola haguma na Kristo oko mitsye yʼabandu nʼeyʼabalĩmũ, abakatabala oko bihugo, busana nakĩ mukinakwama ebihano nʼamalengekanĩa wʼekihugo kwehĩ? 21Bati, Suwate Ũkwʼekĩ, kutse sũgeraye kirya, kutse sũtũle Ũkwʼekĩ. 22Ebyosĩ Ebĩ, bikahera omwʼikola lyabyo kusangwa ni bihano nʼerĩkangĩrĩrya byʼabandu. 23Ebĩ biri nga biwite amenge omo myatsi yʼerĩramya abamalaĩka, nʼerĩyĩkehya, nʼerĩkaramya omubiri. Nĩkwa sibyetoka esyongumbu syʼomubiri.
ప్రస్తుతం ఎంపిక చేయబడింది:
Abanya Kolosaĩ 2: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.