Chivkeeb 46
46
Yakhauj Tsev Tuabneeg Tsiv Moog Rua Tebchaws Iziv
1Yakhauj sau taagnrho txhua yaam kws nwg muaj coj huv tuabsi moog. Thaus nwg moog txug nraag lub zog Npe-awsenpas, nwg muab tsaj lug tua fij pub rua nwg txiv Ixaj tug Vaajtswv. 2Mo ntawd Vaajtswv tau lug has rua nwg ntawm kev ua ywgtoog has tas, “Yakhauj, Yakhauj!”
Yakhauj teb tas, “Kuv nyob ntawm nuav.”
3Vaajtswv has tas, “Kuv yog Vaajtswv, Kuv yog koj txiv tug Vaajtswv. Koj tsi xob ntshai qhov kws koj moog nyob rua huv tebchaws Iziv; Kuv yuav ua kuas koj caajceg yog ib tsaav tuabneeg kws tseemceeb nyob rua nraag. 4Kuv yuav nrug koj moog rua tebchaws Iziv, hab Kuv yuav coj koj caajceg rov lug nyob rua huv lub tebchaws nuav. Yauxej txhais teg yuav kaw koj ob lub qhovmuag ntaag.”
5Yakhauj txawm sawvkev tawm huv lub zog Npe-awsenpas moog. Yakhauj cov tub muab Yakhauj, muab puab cov mivnyuas kws tseem yau, hab puab tej quaspuj tsaws caij cov tsheb neeg kws Falaus tso tuaj tog puab. 6Puab caab puab tej tsajtxhu hab coj puab tej cuabyeej toomtxeem kws puab muaj huv tebchaws Kana-aas moog rua tebchaws Iziv huv tuabsi. Yakhauj coj taagnrho nwg cov xeebntxwv nrug nwg moog, xwsle: #Tegnum 7:15 7nwg cov tub, cov ntxhais, hab cov ntxhais xeebntxwv.
8Taagnrho Yakhauj tsev tuabneeg txhua tug kws nrug nwg tsiv moog nyob rua huv tebchaws Iziv yog nwg tug tub hlub Lunpees, 9Lunpees cov tub: Hanauj, Palus, Hexeloos, hab Khamis. 10Xime-oos cov tub: Yemuyees, Yamees, Auhas, Yakhees, Zauhas, hab Sa-us kws yog tug quaspuj tuabneeg Kana-aas tug tub. 11Levis cov tub: Nkawsoos, Kauhas, hab Melalis. 12Yudas cov tub: Selas, Pelej hab Xelas. (Yudas muaj dlua ob tug tub yog Aws hab Aunaas, obtug tuag rua huv tebchaws Kana-aas lawm.) Pelej ob tug tub: Hexeloos hab Hamus. 13Ixakhas cov tub: Taulas, Pu-as, Yasus hab Siloos. 14Xenpuloos cov tub: Xeles, Eloos hab Yahelees. 15Ntawm nuav yog cov tub kws Le-as yug rua Yakhauj thaus nyob peg tebchaws Padaas Alaas,#46:15: Padaas Alaas; lossis Mexuputamias. xaam nwg tug ntxhais Dinas nrug puab. Taagnrho nwg cov tub hab cov ntxhais kws Le-as yug muaj pebcaug-peb leeg.
16Nkaj cov tub: Xefoos, Hankis, Sunis, Exenpoos, Elis, Alaudis hab Alelis. 17Asaws cov tub: Imenas, Isivas, Isivis, Npeliyas hab puab tug muam kws hu ua Xelas. Npeliyas ob tug tub yog Henpaws hab Makhiyees. 18Kaum-rau leej nuav puavleej yog Yakhauj cov xeebntxwv ntawm Le-as tug ntxhais qhev Xilepas kws Lanpaas muab rua nwg tug ntxhais Le-as.
19Laxees kws yog Yakhauj tug quaspuj yug tau ob tug tub rua Yakhauj xwsle: Yauxej hab Npeeyamees. 20Nyob huv tebchaws Iziv Yauxej muaj ob tug tub, Manaxes hab Efalayees; obtug yog Pautifelas kws yog tug povthawj hlub kws nyob huv lub nroog Heli-aupulis tug ntxhais Axenas yug. #Chiv 41:50-52 21Npeeyamees cov tub: Npelas, Npekhaws, Asenpees, Nkelas, Na-amaas, Ehis, Laus, Mupees, Hupees hab Alaudis. 22Kaum-plaub leeg nuav puavleej yog Yakhauj cov xeebntxwv kws yug lug ntawm Laxees.
23Daas tug tub yog Husees. 24Nathalis cov tub: Yahexees, Nkunis, Yexaws, hab Silees. 25Xyaa leej nuav puavleej yog Yakhauj le caajceg ntawm Laxees tug ntxhais qhev Npilehas kws Lanpaas muab rua nwg tug ntxhais Laxees.
26Taagnrho cov kws yog Yakhauj caajceg kws nrug nwg tsiv moog nyob rua tebchaws Iziv muaj raucaum-rau leej, tsi suav Yakhauj cov nyaab. 27Yauxej muaj ob tug tub kws yug nyob huv tebchaws Iziv hab, tes taagnrho nwg tsev tuabneeg yog muaj xyaacaum#46:27: xyaacaum: muaj xyaacaum leej, vim suav Yakhauj hab Yauxej obtug, ntxiv rua Yauxej obtug tub hab. leej kws tsiv moog nyob rua huv tebchaws Iziv. #Tegnum 7:14
Yakhauj Tsev Tuabneeg Nyob Huv Tebchaws Iziv
28Yakhauj khaiv Yudas uantej moog nug Yauxej kuas qha kev moog rua ntawm Nkausees. Thaus puab lug txug rua ntawm cheebtsaam Nkausees lawm, 29Yauxej txhaj caij tsheb neeg moog tog nwg txiv nyob rua ntawm Nkausees. Thaus obtug sisntsib, Yauxej puag nkaus nwg txiv lub cejdlaab hab sisqawg quaj ntev loo. 30Yakhauj has rua Yauxej has tas, “Txawm yog kuv tuag los kuv yeej zoosab lawm, ruaqhov zagnua kuv tub pum koj hab paub tas koj tseem muaj sa nyob.”
31Yauxej txhaj has rua nwg cov tijlaug hab nwg txiv tsev tuabneeg has tas, “Kuv yuav moog qha rua Falaus paub tas kuv cov kwvtij hab kuv txiv tsev tuabneeg kws nyob peg tebchaws Kana-aas tub lug txug kuv lawm. 32Kuv yuav qha rua Falaus has tas mej yog tuabneeg yug yaaj hab tu tsajtxhu, mas mej caab mej tej tsaj luj, tsaj miv hab coj taagnrho mej tej cuabyeej toomtxeem kws mej muaj nrug mej lug. 33Thaus Falaus hu mej moog nug seb mej ua num dlaabtsi, 34mej ncuntsoov teb nwg has tas, ‘Peb hab peb cov yawmkoob yog tuabneeg yug tsaj thaus tseem yau-yau lug txug najnub nua.’ Mej yuavtsum teb le nuav sub nwg txhaj yuav ca mej nyob ntawm cheebtsaam Nkausees nuav.” Yauxej has le nuav ruaqhov cov tuabneeg Iziv yeej ibtxwm tsi nyam cov tuabneeg yug yaaj.
ప్రస్తుతం ఎంపిక చేయబడింది:
Chivkeeb 46: HNJ2022
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 United Bible Societies. All rights reserved.
