Okukungubaga 2
2
Katonda atadde Sayuuni wansi w'ekire
(2:1-22)
Mukama abonereza Yerusaalemi
1“Mukama mu busungu bwe nga atadde muwala wa Sayuuni wansi w'ekire!”
Asudde ku nsi okuva mu ggulu obulungi bwa Isiraeri,
So tajjukidde ntebe ya bigere bye ku lunaku olw'obusungu bwe.#1 Byom 28:2, Kung 3:44
2Mukama azikiriza awatali kusaasira ennyumba zonna eza Yakobo;
Mu busungu bwe amenyemenye ebifo eby'amaanyi eby'omuwala wa Yuda;
Akkakkanyizza okutuuka ku ttaka,
Mu buswavu obwakabaka n'abakungu baamu.#Zab 89:39,40
3Ajjiddewo ddala mu busungu,
amaanyi gonna aga Isiraeri;
Abaggyeeko omukono gwe ogwa
ddyo, mu maaso g'omulabe;
Era ayokezza Yakobo ng'omuliro ogwaka ennyo, ogwokya enjuyi zonna.#Zab 74:11; 79:5; 89:46
4Anaanudde omutego gwe, ng'omulabe,
n'omukono gwe ogwa ddyo ng'omulabe,
Era asse byonna ebyasanyusanga amaaso gaffe,
Mu weema ey'omuwala wa Sayuuni, mw'afukidde obusungu bwe ng'omuliro.#Yer 30:14, Kung 3:12
5Mukama afuuse ng'omulabe,
n'azikiriza Isiraeri,
Azikiriza embiri ze zonna,
alese mu matongo ebifo byonna eby'amaanyi;
Era ayongedde okuwuubaala n'okukungubaga ku muwala wa Yuda.#2 Bassek 25:9
6Era amenyeewo eweema ye lwa
maanyi, ng'amenya weema ey'omu lusuku;
Alese mu matongo ebifo ebyalondebwa okubeerangamu embaga,
Mukama akomezza mu Sayuuni embaga ezaalondebwa ne Ssabbiiti,
Mu kunyiiga n'obusungu bwe abonereza kabaka ne kabona.#Yob 27:18, Is 1:13, Kung 1:4
7Mukama asudde ekyoto kye,
yeeganyi awatukuvu we.
Awaddeyo mu mukono gw'omulabe ebisenge bye mbiri ze;
Bayoogaanidde mu nnyumba ya Mukama, nga ku lunaku olwalondebwa olw'embaga.#Zab 74:4, Yer 5:31; 23:33,34
8Mukama amaliridde okuleka mu matongo ebisenge eby'omuwala wa Sayuuni;
Yabipima n'omugwa, era n'atayimiriza mukono gwe okuleka okuzikiriza;
Yaaletera enkomera ne bbugwe okukungubaga, biggweerawo wamu;#2 Bassek 21:13, Yer 14:2
9Emiryango gyakyo gibulidde mu ttaka;
azikirizza era amenye ebisiba byagyo;
Kabaka we n'abakungu be bali mu mawanga eteri mateeka;
Weewaawo, bannabbi be tebakyalaba kwolesebwa okuva eri Mukama.#Zab 74:9, Kos 3:4
10Abakadde ab'omuwala wa Sayuuni
batudde ku ttaka, mu kasirise;
Beesize enfuufu ku mitwe gyabwe;
era beesibye ebibukutu;
Abawala ba Yerusaalemi bakoteka emitwe.#Yos 7:6, Ez 7:18
11Amaaso gange gazzeko ekifu olw'okukaaba amaziga,
emmeeme yange yeeraliikiridde,
Omutima gwange munakuwavu olw'okuzikirira kw'omuwala w'abantu bange;
Kubanga abaana abato n'abayonka bazirikira mu nguudo ez'omu kibuga.#Yob 16:13, Zab 6:7, Is 51:20, Yer 44:7
12Bakaabirira bannyaabwe, nti, “Eŋŋaano n'omwenge biri ludda wa?”
Nga bazirikira ng'abasajja abafumitiddwa mu nguudo ez'omu kibuga,
ng'obulamu bwabwe buggwerawo mu bifuba bya bannyaabwe.#Kung 1:11
13Kiki kye nnaakutegeeza, mbeere omujulirwa gy'oli?
Kiki kye nnaafaananya naawe, ayi omuwala wa Yerusaalemi?
Kiki kye nnenkanyankanya naawe, ndyoke nkusanyuse,
ayi omuwala wa Sayuuni atamanyi musajja?
Kubanga ng'ennyanja gy'ekoma obugazi, n'okwonoonekakwo gye kukoma;
Ani ayinza okukuwonya?#Kung 1:12, Ez 26:3
14Bannabbi bo balabye okwolesebwa okutaliimu okw'obulimba;
So tebakunnyonnyodde obutali butuukirivu bwo, balyoke bakomyewo emikisa gyo,
era bakuvunuulidde ebirooto eby'obulimba era ebibuzabuza.#Yer 5:31; 23:33,34
15Bonna abayitawo bakukubira mu ngalo;
Basooza ne banyeenyereza omutwe gwabwe omuwala wa Yerusaalemi nga boogera nti,
“Kino kye kibuga abantu kye baayitanga nti, Obulungi obw'Abatuukirira,
Essanyu ery'ensi zonna?”#Zab 48:2, Yer 18:16, Ez 16:14
16Abalabe bo bonna bakwasamidde akamwa kaabwe,
Basooza ne baluma obujiji;
boogera nti, “Tumuzikiriza!”
Mazima luno lwe lunaku lwe twasuubira; twalulindirira, era tululabye.#Yob 16:9,10, Zab 35:21
17Mukama akoze ekyo kye yateesa;
Atuukirizza ekigambo kye yalagira mu nnaku ez'edda;
Atuzikirizza awatali kisa;
Era awadde abalabe baffe okutweyagalirako,
Awadde amaanyi abo abakukyawa.#Leev 26:14-45, Zab 38:16; 89:42
18Omutima gwabwe gwakaabira Mukama!
Ayi bbugwe ow'omuwala wa Sayuuni,
amaziga gaabwe gakulukuta ng'omugga emisana n'ekiro!
Towummula n'akatono;
emmunye y'eriiso lyo terekangayo kukaaba maziga!#Zab 42:3
19Golokoka, okaabe mu kiro ebisisimuka we bitandikira!
Fukumula ebikuli ku mutima gwo ng'amazzi mu maaso ga Mukama!
Yimusa emikono gyo gy'ali, olw'obulamu bw'abaana bo abato,
Abaagala okufa enjala mu buli luguudo we lutandikira.#1 Sam 7:6, Zab 62:8; 119:147,148, 1 Tim 2:8
20Tunula, ayi Mukama, olabe! Ani gw'okoze bw'otyo?
Kisaana abakazi balye abo ababavamu?
abaana be balera?
Kisaana kabona ne nnabbi battirwe mu kifo ekitukuvu ekya Mukama?#Yer 19:9
21Mu nfuufu eyo mu nguudo mugalamira abavubuka n'abakadde;
Abawala bange n'abalenzi bange battiddwa ne kitala;
Obattidde ku lunaku olw'obusungu bwo;
osse so tosaasidde nakatono.#2 Byom 36:17
22Nga bw'oyita ku lunaku lw'embaga olulonde, bw'otyo bw'oyise entiisa yange ku buli ludda,
So tewali yawonawo, newakubadde eyasigalawo ku lunaku olw'obusungu bwa Mukama;
Abo be nnabuusabuusanga n'endera omulabe wange abazikiriza.#Yer 6:25; 42:17
All rights are reserved to the Bible Society of Uganda.