Amosi 4
4
Abantu bakuzikirizibwa
1“Muwulire ekigambo kino, mmwe abakazi b'e Samaliya, abagezze ng'ente ez'e Basani, abajooga abaavu, abakamula abeetaaga, abagamba ba bbaabwe nti, ‘Muleete omwenge tunywe.’ 2Mukama Katonda nga bwali omutuukirivu alayidde nti, Laba, ennaku zijja lwe balibatungamu amalobo, ne babaggyawo mwenna, nga babasika ng'ebyennyanja.#2 Bassek 19:28, Zab 89:35, Yer 16:15 3Muliwalulwa okuva mu mayumba gammwe ne musuulibwa ebweru nga muyisibwa mu bituli ebibotoddwa mu bisenge, musuulibwe ku Kalumooni, bw'ayogera Mukama.”
4“Mujje e Beseri mukole ebibi, mugende e Girugaali mwongere okwonoona. Muleete ssaddaaka zammwe buli nkya, n'ebitundu byammwe eby'ekkumi buli nnaku essatu.#Kubal 28:3,4, Ez 20:39, Kos 4:15 5Muweeyo ssaddaaka ey'okwebaza ey'emigaati egizimbulukusiddwa, mulangirire ebiweebwayo bye muwaayo nga mweyagalidde. Kubanga ekyo kye mwenyumiririzamu, ayi mmwe abaana ba Isiraeri, bw'ayogera Mukama Katonda.”#Leev 7:13; 22:18,21, Zab 81:11,12 6“Nabaleetera enjala mu bibuga byammwe byonna, emmere n'ebula mu mayumba gammwe gonna, naye era temwadda gye ndi, bw'ayogera Mukama.”#Ma 28:57, Yer 15:7 7“Naziyiza enkuba okutonnya ng'ekyabulayo emyezi esatu okutuuka ku makungula: Natonnyesa enkuba ku kibuga ekimu, ne ngiziyiza okutonnya mu kibuga ekirala. Yatonnyanga mu nnimiro emu, ate mu ndala n'etatonnya, ebirime ne biwotoka ne bikala.#Yer 3:3 8Abantu ne bavanga mu kibuga ekimu ne bagenda mu kirala okunywa amazzi, naye ne batasangayo gamala kunywa kukuta. Naye era temwadda gye ndi, bw'ayogera Mukama.” 9“Ebirime byammwe na bigengewaza ne mbitekamu n'obukuku. Enzige nazo ne zirya ensuku zammwe ez'emizabbibu, emitiini gyammwe n'emizeyituuni gyammwe. Naye era temwadda gye ndi, bw'ayogera Mukama.”#Ma 28:22, Yo 1:4, Kag 2:17 10“Nabasindikira kawumpuli nga gwe n'asindika mu b'e Misiri. Abavubuka bammwe ne mbattira mu lutalo n'ekitala, n'embalaasi zammwe ne zinyagibwa. Najjuza ennyindo zammwe ekivundu ky'emirambo mu nsiisira zammwe, naye era temwadda gye ndi, bw'ayogera Mukama.”#Ma 28:27,60, 2 Bassek 13:7, Zab 78:50, Yo 2:20 11“Nazikiriza abamu ku mmwe nga bwe nnakola ab'e Sodomu ne Ggomola. mmwe abaawonawo ne muba ng'omumuli oguggyiddwa mu muliro, naye era temwadda gye ndi, bw'ayogera Mukama.”#Zek 3:2, Yud 23 12“Kyendiva nkubonereza, ayi Isiraeri: N'olwekyo weeteeketeeke okunsisinkana gwe Isiraeri.” 13Kubanga oyo abakolako ye Katonda eyatonda ensozi, eyatonda embuyaga, era ategeera omuntu by'alowooza. Yafuula enkya okubeera ekiro, era atambulira ku ntikko z'ensozi. Mukama Katonda ow'eggye lye linnya lye.#Zab 139:2, Yer 10:16, Am 5:8, Mi 1:3
All rights are reserved to the Bible Society of Uganda.