2 Bassekabaka 3
3
Olutalo wakati wa Isiraeri ne Mowaabu
1Awo Yekolaamu mutabani wa Akabu n'atandika okufuga Isiraeri mu Samaliya mu mwaka ogw'ekkumi n'omunaana ogwa Yekosafaati kabaka wa Yuda, n'afugira emyaka kkumi n'ebiri.#2 Bassek 1:17 2N'akola ebyali mu maaso ga Mukama ebibi; naye teyenkana kitaawe na nnyina mukwonoona kubanga yaggyawo empagi ya Baali kitaawe gye yakola.#Kuv 23:24, 1 Bassek 16:31,32 3Naye n'atambulira mu bibi bya Yerobowaamu mutabani wa Nebati ebyaleetera Isiraeri okwonoona.#1 Bassek 12:28; 14:16
4Mesa kabaka wa Mowaabu yali musumba wa ndiga; era buli mwaka yawangayo eri kabaka wa Isiraeri ebyoya by'abaana b'endiga akasiriivu kamu (100,000) n'eby'endiga ennume nabyo akasiriivu kamu (100,000). 5Awo olwatuuka Akabu bwe yafa kabaka wa Mowaabu n'ajeemera kabaka wa Isiraeri.#2 Bassek 1:1 6Kabaka Yekolaamu n'ava mu Samaliya, n'akuŋŋaanya eggye lye mu Isiraeri yonna. 7N'atumira Yekosafaati kabaka wa Yuda n'agamba nti Kabaka wa Mowaabu anjeemedde. Onoonneegattako mu lutalo okumulwanyisa? Kabaka Yekosafaati n'addamu nti Weewaawo, nja kukwegattako. Nze naawe ffe bamu, abantu bange be bamu n'ababo, era n'embalaasi zange ze zimu n'ezizo.#1 Bassek 22:4 8N'amubuuza nti Tunaayambuka mu kkubo ki? Yekolaamu n'amuddamu nti Ekkubo eridda mu ddungu ery'e Edomu. 9Awo kabaka wa Isiraeri n'agenda wamu ne kabaka wa Yuda ne kabaka wa Edomu. Ne batambula olugendo lwa nnaku musanvu nga bagenda beetooloola. Ne wataba mazzi ga kuwa wadde ensolo ze baali nazo.#1 Bassek 22:47 10Kabaka wa Isiraeri n'agamba nti Zitusanze! Mukama atukuŋŋaanyizza ffe bakabaka abasatu okutugabula mu mikono gya Mowaabu. 11Naye Yekosafaati n'abuuza nti Tewali wano nnabbi wa Mukama gwetuyinza kuyitamu okubuuza Mukama? Awo omu ku baddu ba kabaka wa Isiraeri n'addamu nti Waliwo wano Erisa mutabani wa Safati eyali omuddu wa Eriya.#1 Bassek 19:21; 22:7 12Awo Yekosafaati n'ayogera nti Ekigambo kya Mukama kiri naye. Awo kabaka wa Isiraeri ne Yekosafaati ne kabaka wa Edomu ne bagenda eri Erisa. 13Erisa n'agamba kabaka wa Isiraeri nti Nnina nkolagana ki naawe? Genda eri bannabbi bakitaawo ne bannabbi ba nnyoko. Kyokka kabaka wa Isiraeri n'addamu nti Nedda, sijja kugenda eyo, kubanga Mukama akuŋŋaanyizza bakabaka bano abasatu okubagabula mu mukono gwa Mowaabu.#1 Bassek 18:19 14Erisa n'ayogera nti Nga Mukama w'eggye bw'ali omulamu gwe nnyimirira mu maaso ge, singa si Yekosafaati kabaka wa Yuda ali wano, ggwe salikufuddeko era sandikulabye.#1 Bassek 17:1 15Naye kale ndeetera omukubi w'ennanga. Awo olwatuuka omukubi w'ennanga bwe yakuba ennanga, amaanyi ga Mukama ne gajja ku Erisa.#1 Sam 10:5, 1 Bassek 18:46, Ez 8:1; 37:1; 40:1 16N'agamba nti Mukama agamba nti Ekiwonvu ekikalu nja ku kijjuza enzizi z'amazzi. 17Mukama ayongera n'agamba nti Temujja kulaba ku mbuyaga, era temujja kulaba ku nkuba. Naye ekiwonvu ekyo kinajjula amazzi, munywe mmwe n'ensolo zammwe. 18Ate nno ekyo kitono nnyo mu maaso ga Mukama. Era ajja kuwaayo Abamowaabu mu mikono gyammwe. 19Mujja kumenya buli kibuga ekiriko buggwe omugumu, na buli kibuga ekirabika obulungi, muteme buli muti omulungi, muzibe enzizi zonna ez'amazzi era mwonoone buli musiri omulungi nga mugujjuzamu amayinja.#Ma 20:19 20Awo olwatuuka enkeera mu kiseera eky'okuwaayo ekitone, amazzi ne gajjura mu kitundu ekyo kyonna.#Kuv 29:39 21Abamowaabu bonna bwe baawulira nga bakabaka abasatu bazze okubalwanyisa, ne bakuŋŋaanya bonna abakulu n'abato abaali bayinza okubagalira eby'okulwanyisa, ne baleetebwa ku nsalo. 22Abamowaabu bwe baagolokoka enkeera mu makya, enjuba n'eyaka ku mazzi agaboolekedde, ne balaba nga gamyuse ng'omusaayi. 23Awo Abamowaabu ne boogera nti Guno musaayi! Mazima bakabaka baalwanaganye, abantu baabwe bonna ne battiŋŋana. 24Naye bwe baatuka ku lusiisira lwa Isiraeri, Abaisiraeri ne basituka ne bakuba Abamowaabu ne babatwala entyagi. Abamowaabu ne badduka, Abaisiraeri ne babawondera okubatuusiza ddala mu nsi yaabwe nga bagenda babatta. 25Abaisiraeri ne bazikirizza ebibuga, buli omu n'akasuka ejjinja mu bulime obulungi okutuusa nga babujjuzza amayinja, ne baziba enzizi zonna ez'amazzi, ne batema emiti gyonna emirungi. Mu Kirukaleseesi mwokka mwe baleka amayinja gaamu, naye ab'envuumuulo ne bakyetooloola, ne bakiwangula. 26Kabaka wa Mowaabu bwe yalaba ng'olutalo lumugendedde bubi, n'atwala abasajja lusanvu (700) abalwanyisa ebitala, bawaguze batuuke ku kabaka wa Edomu, kyokka ne batayinza. 27Awo kabaka wa Mowaabu n'addira mutabani we omubereberye eyandifuze mu kifo kye, n'amuwaayo okuba ekiweebwayo ekyokebwa ku bbugwe. Ekyo ne kitiisa nnyo aba Isiraeri ne balekera awo okulwana ne baddayo mu nsi yaabwe.#Lub 22:2, Mi 6:7
All rights are reserved to the Bible Society of Uganda.