1 Pita 2 నుండి ప్రసిద్ధ బైబిల్ శ్లోకాలు

షేర్ చేయి

Ana yoba tau yegl mere yage sigwa ba ene meglkwa i, God ene ye yobanama moraiglmedi kere i pere edugo, ene ye yobama kaima meglkwa. Te, God ene kingno moglko, ene mogl pere edidre, ye tawa teigwa yoba mere yegl meglkwa. God ene yegl mere kere i pere edugwa i, ye siragl mere wakai moglkwa i, ene di nogugl edinaiglmedi pre ene kere i pere edugwa. I siragl pre God yene ere mogl, ene mim erumara kide kodidre, ede u ye abuglagemo, wakai kaima sumara i mina ede suna unaiglmedi agle dugwa.

Nono tadaglmeno i, Krais ogo nagie mina idre, ede prak mina goglkwa. Ye nono tadaglmeno idre, goglkwa i, nono ama ye goglmere yegl goglsre, tadaglme kide kodo, mabuno du eraiglmedi pre erukwa. Te, yoba ye sigwa, boglmara i, ene u kor eigwa. Ana ene okna sipsip tau wau beglkwa mere yegl wan meglkwa ba ene sipsip sugl wakai moglkwa yagle moglmara ede ikne wigo, Krais erme ene kiano sugl wakai moglkwa.

Ene okna God yobama ta moglkrikwa ba erme ye yobama meglkwa. Te, God ene mitno goglkwa i, ene okna ta pre kan erekrikwa ba erme ene pre kan ere kodigwa.

Kide kodidre, gak kuglabu am ege ege nenamnedi primere yegl, God kamo i, am mere yegl ege ege nenamnedi prio. Am i, taragl kide swara ta atne paikrukwa pre ene nebi, God ene ere yumara i mina ene yakidre, yoba mere yegl moraiglkwa.

Ana agrama abarama wagle, na dena muduna suna meglkwa i, ene erme makandigle meglkwa igne, dumo bage ta nem mam mere yegl meglkwa. Yegl pre na ene di teiga i, taragl kane kane deno muduno goglo mina pogglau borabuka i, ene kide kodinaiglkwa paugwa. I siragl pre mabuno kide yegl pogglau boglkwa igne i nono kiano mina kuda bogl norukwa mere yegl paugwa. Yoba God kamo prikrikwa meglmara i, ene suna meglkwa pre ene mabuno wakai duglo bogl wan moraiglkwa paugwa. Yegl eribi, ye ene yoba kide moglsre, kide erime dibi, dinaiglkwa ba okuo God jasno moragledi unabuka igne, ene mabunono wakai i mina ye God kagie kade tenaiglkwa .

ene ama u kor pidre, kobuglo mere yegl meglkwa. Meglko, God ene ake idre, ye kogonmo eraiglmedi yugu kei, ede mitna ogwa. God yugu kei ede mitna enan, ene yoba pere mogl, ye tawa teigwa yobamo moglsre, ene kiano mina tawa te moraiglkwa. Krais Jisas kogon erumara mina God ene tawano kan inabuka.

Ene u kor pi kodigwa pre ene yoba ere kide ere tenamnedi prekrio. Te, yoba gumuglno mina no wakai munedi yoba bakagl tedre, ka kibi dikrio. Te, yoba jelas ere tedre, mokono ka digwa mabuno gugl ede, kide kodio.

Yoba kobuglo yugu keigwa igne, kobuglo ta mabunomugl bogl padiglkwa kobuglo i, Jisas u kor ogwa ikra moglkwa. Kobuglo i, yoba kide yomedi kandre, kide kodigwa ba God kobuglo wakai kaima ta yomedi kandre, yugu ta kenagledi kobuglo i kere i pere edugwa. Te, ene Jisas moglmara wigwa igne

Ene kane yoba ta moglkrumnedi prisre, kane yoba erimere erekrio. Te, ene nomane kide idre, No kane ta paikrumga pre gua gua wan moramga i, ama kuno erumiwe di, yegl ta prikrio! Ene wan meglmara i, Na God niglmo kogonmo yoba moragliwe di, nomane yegl io!

I siragl pre God prukwa i, ene mabuno wakai yegl eribi, yoba tau nomano wakai paikruko, ene ka kide di teigwa i kandre, nomane inaiglmedi prukwa. Ye nomane idre, ene ka kide di teigwa i, okuo ta dikraiglmedi prukwa.