Zuize 16
16
Gaza na 'ri nho'õmo nhisi u Sãsã imorĩzé wasu'u
1Tawamhã Sãsã, nimahã bâtâ na ma tô mo, 'rinho'u Gaza na isisi u hã. Tahawa, tame ma tô pi'õ siwa'âbâ zô 're isi'rui mono hã 'madâ. Taha ré ma tô nomro. 2Tawamhã Gaza ãma 're idahâimana za'ra mono, ma tô siwi waihu'u, Sãsã õhõ 're, ihâimana na hã. Tahawa isãmrazé ma tô iré siwi uirĩ. Ma tô duré mara bâre sô mapari za'ra Sãsãhã zô, 'ri nho'õmo te 'ridawa za'ẽtẽ ãma. Duré ari'iwi pese ma tô sô tihâimana za'ra, te te ãne rosa'rata za'ra sina:
— Awẽb u sô wanhimipari za'ra wa'aba. Tawamhã wa za wasiwi wĩrĩ ni za.
3Tane nherẽ, Sãsã mara aiwa ãma isipo'o u si ma tô nomro. Taha pari oto utu wamhã, ma tô 'ri nho'õmo te 'ridawa za'ẽne hã tita, si'uiwa na 'ridawa uparizéb ré, duré 'ridawa tétézéb ré. Tahawa, tinhisé te te sima hiri wamhã, ma tô ti'â, ẽtẽ nhisi u, 'rinho'u Hebrõ nho'rei wa'waibaba.
Sãsã norĩ wasu'u, Dalilaha me
4Tawamhã ãma ronomro pari, Sãsã, pi'õ Dalila na isisi ma tô sawi â, romharé Sorequi na isisi ãma 're ihâimana mono hã. 5Tawamhã imrotõ na 'ri nho'õmo 're, filisteu norĩ ma i'rãnho'u 're ihâimana za'ra mono norĩ hã ma tô pi'õ tẽmemhã ai'aba'ré, te te tãma nharĩ za'ra da. Ãne te tãma nharĩ za'ra:
— Ma'ãpé niha hã ai'rã nhipese na Sãsãhã ma, marĩ hã 'manharĩ, nima hawim na tinhiptetezé te te aima wasu'u da, taha zarina wa te waihu'u za'ra wa, oto sô wanhisisi wa, wa te wasiwi paihi wasisi da, si'wawimhã simapa ãna. Ãne sena 'manharĩ wamhã, wahâiba mono bâ wa za ẽtẽ waipo prã prata 1.100 na iwa'õtõ waré na aima sõmri za'ra ni za.
6Tawamhã Dalila te Sãsãhã wi waptẽ ãne:
— Ĩzawi na hã ma'ãpé asiptetezé aima ihâiba ĩma wasu'u na. Ni'wa sima iwẽ na te te aipawasisi da wamhã, sada asapẽtẽ ãna aihâimana da wamhã, e tiha te za ãne wamhã sima iwẽ na ai'ãma 'manha.
7Tawamhã Sãsã ma te asa ãne ãma sada'â:
— Ni'wa hã abaze ihâi wazere tém hânhorõ na 7 na ihâi waré na te te ãma ĩhâiba wapre mono wamhã, wa hã za ĩnhib'uware di, siwa'ru aibâ norĩ sib'uware na 're ihâimana za'ra mono ne hã.
8Tawamhã filisteu dama i'rãnho'õmo norĩ, ma tô Dalilaha ma 7 na wede nhorõ isõrõ té hã tãma 'wasa. Taha na Dalila, ma tô Sãsã hã oto te te ãma hâiba wasisi. 9Tawamhã aibâ norĩ, 'ri're wa'õno ihâiba amoi ãma ma tô aima'uri za'ra. Tahawa ma tô Dalila 'mahâ ãne:
— Sãsã! Filisteu norĩ ma we asô aihutu!
Tawamhã Sãsã õne haré ma tô wedenhorõ hã te te sina sinarĩ, abazi isõrõ 'rare unhama 'rata, da te ihiri ne hã tãma. Ãhã wa, niha na Sãsãhã nhiptetezé tãma ihâiba hã te te zahadu siwi waihu'u õ di. 10Tahawa Dalila, te duré ãne tãma tinha, Sãsãhã ma:
— E niha ma te ĩma asadawa nhipe, ĩ'ãma aiwa'ẽ sina. Ma'ãpé ĩzawi na hã ĩma wasu'u na, niha tiha na da te dasiwi i'aiwasisi mono zéb da hã.
11Tawamhã Sãsã, ma te duré ãne ãma sada'â asa:
— Wedenhorõ isõrõ té zahadu marĩ hã da te ãma iwasisi õ na da te ĩwasisi mono wamhã, wa hã za ĩnhib'uware di, uburé aibâ norĩ ma, isiptede 're ihâimana za'ra mono ne hã.
12Tawamhã Dalila, wedenhorõ isõrõ té te te sada i'âri na, ma tô ãma pawasisi. Taha pari te duré tãma rob'mahâ ãne:
— Sãsã! Filisteu norĩ, ma we asô aihutu!
Tawamhã aibâ norĩ, ma duré aima'uri za'ra, 'ri're wa'õno ihâiba amoi ãma simipari za'ra sina hâimana za'ra da. Tane nherẽ, Sãsã ma tô duré wedenhorõ hã sina sõrõ nhinarĩ za'ra, abazi nhorõ isõrõ suru pesere ne tãma hã.
13-14Tahawa te Dalila duré tãma tinha ãne:
— E niha te zahadu asadawa nhipese na ãma ĩma i'uzusi mo, ĩ'ãma atoi mono sina. Ĩma wasu'u na, niha tiha na, da te dasiwi i'aiwasisi mono zém na hã.
Tawamhã ma te ãma sada'â duré ãne:
— A hã abazi zanhamrizém na, ĩzéré para na ãma awaibui mono wamhã, abazi nhamri ahârizé, wede umo 'rã'wa na ĩzéré tété mono wamhã, wa hã za ĩnhib'uware di, uburé aibâ norĩ ma, isiptede 're ihâimana za'ra mono ne hã.
Tawamhã Dalila, Sãsã sõtõ ré, ma tô sima iséré hã te te awaibu. Taha pari, ma tô 7 na séré para, abazi isipra za'ra na. Taha pari ma tô duré abazi zanhamri ahârizém na wede umo 'rã'wa na te te séré tété. Ãhã pari te duré 'mahâ ãne:
— Sãsã! Filisteu norĩ, ma we duré asô aihutu!
Tane nherẽ, Sãsã duré oto topo'o wamhã, ma tô tizéré tétézé hã sina waze. Ma tô duré tizéré para hã sina awasihu. 15Tahawa te duré ãne tãma tinha:
— E niha bâ te taré nasi ĩzawi wapti, asadawa nhipese na. E asina ĩ'umnhasi õ wa. Ã hã oto si'ubdatõ ãmamhã te siwa'ru nasi ĩma iromnhoré, ĩnhimiza'rese'õ newa. Tahawa zahadu ĩma wasu'u õ di, tihai hawi asiptetezé aima ihâiba hã.
16Tawamhã bâtâ bâre isadanharĩ na te te ãma tãma uzusi u'âsi. Tahawa Sãsã, pi'õ timreme na te te iwasutuzé wi hã oto siptete waihu'u õ di, ãma wa'a wa. 17Tahawa sena na ma tô oto tãma wasu'u ãne:
— Niwamhã ĩzéré hã isihâri waihu'u õ!
Te duré tãma siwasu'u ãne:
— Wa hã Nazire norĩ siré 'Re ihâimana u'âsi mono te na, wa tô 're ĩhâimana, ĩpoto zém hawim haré. Tahawa ĩzéré hã te sihâri wamhã, wa za ĩnhiptetezé hã simini. Ĩnhib'uware di za oto, uburé aibâ norĩ ma, isiptede 're ihâimana za'ra mono ne hã.
18Tawamhã Dalila sena na te te ãma tãma irowasu'uzé te te waihu'u wamhã, ma tô ãne romreme hã tãma me za'ra, filisteu norĩ dama i'rãnho'õmo norĩ ma:
— We apâ asina siri za'ra wa'aba. E tihai wa. Sena na te oto ĩma wasu'u, we 're isiptete mono zé iwaihu'u'õ hã.
Tahawa apâ duré oto itẽme si'aba'réi wamhã, ma tô rob'uiprazé hã siré tãma âri za'ra.
19Tawamhã Dalila, Sãsã ipa sõtõ da hã, ma tô 'rãihi. Tahawa, sõtõ ré, ma tô aibâ zô hã hâ. Tawamhã ta hã ma tô 7 na Sãsãhã zéré para siro hã tiwi sihâ. Tahawa Dalila, ma tô oto niha hã nasi tãma rob'manha, tinhiptetezé hã te te oto tãma simini wẽ te. 20Tawamhã te oto duré 'mahâ ãne:
— Sãsã! Filisteu norĩ, ma we duré asô aihutu na sahu!
Tawamhã utu wamhã, te duré ãne rosa'rata: “Wa za duré tiwi ĩsiwazere za'ra, tiwi 're ĩsisani u'âsi za'ra mono ne.” Ãhã wa, Sãsã hã te te sina waihu'u õ di, 'Re ihâimana u'âsi mono tãma isi'rézém na hã oto. 21Tawamhã filisteu norĩ ma tô oto siwi ti'â. Te te siwi âri wamhã, ma tô siwi topu'u zahuré. Tahawa, duré oto Gaza u te te siwi saprõni wamhã, ma tô ẽtẽ topsada brõzi nhorõ rutu na te te siwi wasisi. Tawamhã dazazéb 're amnho zubzém na te te nasi ãma isa'oto mono na te te 're romhuri mono da hã, ma tô siwi tisẽ. 22Tane nherẽ taha ré, ma tô duré apâ iséré hã tãma tipa.
Sãsã idâ'âzé wasu'u
23Tawamhã filisteu dama i'rãnho'õmo norĩ hã ma tô si'rã'õtõ, dato isa'ẽne te te siwi 'manharĩ da, duré tite Dagõ na ihâiba'õ nhisi ma danhimizama zata na tãma sõprub za'ra da. Tawamhã ta norĩ hã ma tô tinho're za'ra ãne: “Wate za'ra ihâiba'õ, ma tô wanhitob'ru Sãsã hã wanhib'rata wama sõmri za'ra!”
24Tawamhã Sãsã da te dasiwi 'madâ'â wamhã, ma tô tite ihâiba'õ Dagõ ãma tanho're za'ra ni ãne: “Wate za'ra ihâiba'õ, wanhitob'ru wanhipti'a te te wawi 're iwamnarĩ za'ra mono hã, duré wasiré norĩ ahâ uptabi na te te 're i'mapãrĩ mono hã, wanhib'ratab za'ra ma tô oto wama sõmri za'ra.”
25Tawamhã dapẽ'ẽ 're dama irowẽ za'ẽtẽ za'ra zarina, te ãne dasima nharĩ za'ra ni:
— Ma'ãpé Sãsãhã zô aihârâ aba, wa te ãma wasima romhu'u za'ra da.
Tawamhã dazazém hawi Sãsã te te siwi wazere wamhã, ma tô oto dasima ãma rowẽ za'ra ni. Taha parimhã ma tô oto ẽtẽ nhoré na 'ri uparizém norĩ wa'wamhã dasiwi sãrĩ ni. 26Tawamhã iprédupté isib'rata na te te isaprõni ma, te ãne Sãsã hã tãma tinha:
— Ma'ãpé 'ri uparizém na ãma ĩnhib'rata nomri si'uiwa na, te ĩsina roptob da ãma itẽme.
27Tawamhã taha bâtâ na te 'ri're dasiwazari aibâ norĩ, pi'õ norĩ me da'masisi tâ na tahâimana za'ra ni. Tahawa, te duré filisteu dama i'rãnho'õmo norĩ 5 na tame dame asimro. Duré te 'ri zahâpâ ãma aibâ norĩ, pi'õ norĩ me 3 miu na dahâiba na hã tahâimana za'ra ni, Sãsã te te siwi 'madâ'â da hã, duré te te sima ãma rowẽ za'ra da, ãma wa'ẽ za'ra sina.
28Tawamhã Sãsã, Uburé Danhib'apito ma te ãne mre:
— Uburé Danhib'apito i'aiwaihu'u pe, ma'ãpé ĩ'ãma aipo're pu'u ãhã na hã. Ma'ãpé ĩzawi na ĩnhiptetezé ãhã na si ĩma sõmri, filisteu norĩ te te siwi ĩtopu'u za'ra norĩ hâiba na misi haré 'râwi ãma ĩsi'ruiwa'âbâ da.
29Tawamhã 'ri're wa'wa nho'õmo 'ri uparizém norĩ si'uiwa na isima'wara hã ma tô oto tinhib'rata na hã tété zahuré. Tahawa, tinhib'rata nhimire niwĩ 'ri uparizé hâiba amo te te tété sina, duré tinhib'rata nhimi'e niwĩ ihâiba amo te te tété sina, ma tô sada asapẽtẽ oto. 30Tawamhã taha sina te duré hârâ 'rãihâ na hâ, ãne:
— Filisteu norĩ siré, ĩdâ'âre oto. Marĩ õre di!
Ãne pari, ma tô 'ri uparizé hã te te sa'ré zahuré, tinhiptete na. Te te sa'ré zahuré mono wamhã, ma tô dama i'rãnho'õmo norĩ nhisiwimhã, duré uburé a'uwẽ norĩ nhisiwimhã oto 'ri hã asa'wa. Ãne ma tô Sãsã, da'ahâ uptabi na tidâ'â siré hã da'a'uprosi, hâiba ré 're hâimana mono ré, te te 're ida'mapãrĩ mono zém nhipai u.
31Tawamhã Sãsãhã sisãnawã norĩ, uburé isiré a'uwẽ norĩ me ma tô ihâiba zô hã ai'aba'ré. Tawamhã ihâiba te te siwi âri wamhã, ma tô ãma siwi ti'a, Zora na 'ri nho'õmo nhisi norĩ wa'wa, Esta'o na 'ri nho'õmo nhisi wa'wa me, imama Manoa da te isẽrẽzéb 're.
Sãsã hã 20 na ãma iwahum na ma tô Izaraéu nhihudu norĩ ma i'rãnho'õmo na hã 're hâimana.
Trenutno izabrano:
Zuize 16: xavBP
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2011, Wycliffe Bible Translators, Inc.