MRK 4
4
बी पेराशेटोनदी दृष्टांत
1इंगा येशुड सरोवर कंटाम मिंदा शिक्षण इच्चेदेंक आंट्या, आप्पुड वान देगार शेंगेम फेद्दाद गर्दी जमा आय्या, दिनिचांग वाड सरोवरलोन वगा जहाजला फोई कुसन्या इंगा आंता मंदी सरोवर कंटामकी भुमी मिंदा नीला फडनीर. 2वाड वारकी दृष्टांतलाता शेंगेम माटलु नेरपु इंगा वाड आन्या; 3“इनना, वगाड बी पेराशेतोड बी पेराशेदेंक यल्या ; 4इंगा वाड पेराशेताप्पुड इल्ला आय्या की, काही बी दावा मिंदा फड्या, आय गुवाल वच्ची तिनेशा. 5काही बी खडकुला भुमी मिंदा फड्या, आंदु आटलाक जास्त मन्नु लेकुंड्या. येनटीक की मन्नु लोत लेकुंड्या आंका आय लग्गे फुट्या. 6पण सूर्य फैनिक वच्ची नेंका आय यंडाक काली फोया इंगा दानकी मूळलु लेकुंड्या आंका आय यंडी फोया. 7काही बी मुंडला झुडपुलाला फड्या इंगा झुडपुल फेद्दाय वाढाशी आटलाद वाढ खुटाशा, दिनिचांग आटलाक येमीच पिक दालेद. 8काही बी शिंगार भुमी मिंदा फड्या आय वच्या, फेद्दाय आय्या दानकी पिक वच्या; इंगा दानी तीसपट, साठपट, शंभरपट इल्ला फंटा वच्या.” 9मंग वाड आन्या, “यवारकी गुम्माल उंडाय वार इनना.”
10वाड वक्काडे उंड्या आप्पुड वान जताक बारा मंदी जताक यवार उंडीर वार वान दृष्टांत बद्दल आडगीर. 11वाड वारनी आन्या, “परमेश्वर राज्यद रहस्यदान मिक इच्चीनेद उंडाद, पण बेटूटोरकी दृष्टांतलाता शप्पेदेंक वस्ताद.
12 दिनिचांग की वार सुशीगास सुडाला पण वारकी कमसा राद,
इंगा इनेताप्पुड वार इनाला, पण तेल्वाराद.
लेकाते कदाचित वारी मनलु तिरगी इंगा परमेश्वर वारनी क्षमा शेशी.”
13वाड वारनी आडग्या, “इदी दृष्टांत मिक तेल्वालेद येम, तर इंगा इंगोगोय दृष्टांतलु मिक यल्ला तेल्ची? 14पेराशेतोड परमेश्वरदी वचन पेरास्ताड. 15दावा मिंदा वचन पेरास्तार आंदुटोर मंदी इर उंडार की, वार इनीन नग्रेम शैतान वच्ची वार दिंटल्या पेराशीनेद वचन दासकुंटाद. 16आल्ले खडकुला भुमीला पेराशीनेद इदी उंडाद की, वचन इनीन नग्रेम वार आनंदता स्वीकार शेस्तार; 17तरी पण वार अंतकरणला फट्टी फेट्टार आंका वार रव्वा वेळ टीकास्तार; इंगा वचन इचांग संकटलु वच्या लेकाते छळ आय्या आंटे वार लगेच अटकास्तार. 18इंगोगो मुंडला झुडुपला पेराशीनोर इर उंडार, वार वचन इंटार, 19पण संसारदी चिंता, धनुद लोभ इंगा इंगोगो माटलाद लोभ इदी वार लोना दुरी वचनदी वाढ थांबा मतताद इंगा वार निष्फळ आयतार. 20याय मंची भुमीला पेराशीनार इर उंडार, यवार वचन इनी दान ग्रहण शेस्तार इंगा यवार तीसपट, यवार साठपट, यवार शंभरपट इल्ला पिक इस्तार.”
दिव्वाद उदाहरण
21इंगा येशुड वारनी आन्या, “दिव्वा गंपा किंदा लेकाते पलंग किंदा फेट्टेदेंक यकोस्तार येम? दिव्वा फेट्टे जागाला फेट्टाला आंका यकोस्तार कनी? 22येनटीक की प्रत्येक माटा याद दाशी फेट्टीनेद उंडाद आदी उघड आय्यी इंगा प्रत्येक दाशी फेट्टीनेद माटा शप्पेदेंक वच्ची.”
23 “यवारकी गुम्माल उंडाय वार इनना.”
24मंग वाड वारनी आन्या, “मीर येम पण इंटार दान बद्दल सावधान उंडा, या मापता मीर कोल्ची इस्तार आद्दे मापता मिक कोल्ची इच्चेदेंक वच्ची. 25येनटीक की यवार देगार उंडाद वानकी इंगा इच्चेदेंक वच्ची इंगा यवान देगार लेद वान देगार येम उंडाद आदीपन तिस्कुन्यार.”
उगाशे बीद दृष्टांत
26मंग येशुड आन्या, “परमेश्वरदी राज्य इल्ला उंडाद की, यल्ला वगा मनशी भुमीला बी पेरास्ताड. 27मोब्बुला फंडकुंटाड इंगा फद्दीना लेस्ताड इंगा आदी बी बुडताद इंगा वाढास्ताद इदी यल्ला आयताद इदी वानकी तेल्वाद. 28भुमी आपोआप पिक इस्ताद, पहिला कोंब इंगा उंब्या, मंग कंसला निंडीनेय दानाल. 29पिक तैयार आयताद आप्पुड दानकी लगेच वाड कडवाल आंचताड येनटीक की सोंगाशेद वेळ वच्चीनेद उंडाद.”
30इंगा वाड आडग्या, “मनाम परमेश्वरदी राज्यद तुलना येनटी जताक शेशी शकास्ताम लेकाते इंगा या दृष्टांतला शप्पी शकास्ताम? 31आदी मोहरी दाना लेका उंडाद. याद भुमीला पेराशेताप्पुड पृथ्वी मिंदुड आन्नी बीजालकाना शेंगेम शिन्नाद उंटाद तरी, 32आदी पेराशीनेंका आन्नी शटला काना फेद्दाद आयताद. दानकी फेद्दाय डांकील वस्ताय इंगा मोडामलोन गुवाल दान मिंदा खोपाल बनायमती शकास्ताय.”
33इल्ला शेंगेम दृष्टांत इच्ची, यल्ला वारकी तेल्ची आल्ला वाड वारकी वचन शपदु. 34इंगा दृष्टांत शिवाय वाड वार जताक माटलाडाकुंदु. पण एकांतला वाड वान शिष्यलाक आंता समजायमती शपदु.
येशुड सुटुर घालीन शांत शेस्ताड
35आबद मापसार आयनेंका येशु वान शिष्यालनी आन्या, “मनाम आतुक फदाम दांडा.” 36दिनिचांग वार मंदी समुदायनी इडशीर इंगा वाड नावला उंड्या आल्ले वार वान येका फोईर. वार जताक इंगोगो नावलु पण उंड्या. 37आप्पुड फेद्दाद सुटुरघाली लेशा इंगा लाटलु नावकी इल्ला आदळायदु की, नाव नेळाता निंडेदेंक आंट्या. 38पण येशुड यंकाड भागला गादीमिंदा फंडकुंड्या. शिष्यल वान देगार वान लेपी आनीर, “गुरुजी, मनाम मुनगुतुनाम तरी निक चिंता लेद येम?” 39मंग वाड लेशा इंगा वाड घालीन धमकाय मत्या इंगा समुद्रन आन्या, “शांत उंड! तेप्पांग उंड,” मंग घाली थांबाशा इंगा आंदु एकदम शांत आय्या. 40वाड वारनी आन्या, “मीर येनटीक यरस्कुंटुनार? मी देगार इप्पुड पण विश्वास यल्ला लेद?” 41पण वार शेंगेम येरस्कुनीर इंगा वगामेगारनी आनीर, “इड उंडाड तरी यवाड, सुटुरघाली इंगा समुद्र पण इनदी इंटाय,” इल्ला इड उंडाड तरी यवाड?
Trenutno izabrano:
MRK 4: WNT
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
