MRK 11
11
यरुशलेमला येशुनदी सेवा — 11:1—13:37
यरुशलेम शहरला विजयी प्रवेश
1यप्पुड येशुड इंगा शिष्यल यरुशलेम शहर देगार जैतुन कोंडा देगार बेथफगे इंगा बेथानी उर देगार वच्चीर आप्पुड येशुड वान इद्दार शिष्यलान इल्ला आनी आंप्या की, 2“मुंदार उळ्योंग फोंडा, उळ्योंग फोयनेंका यादान मिंदा यवार कुसना लेद इल्ला गाडदी फिल्ला कट्टीनेद कमशी. आदी इडशी इंदुक येका दांडा. 3जर यवाराना मिमलान आडगीर, ‘मीर इदी येनटीक येका फोयतुनार?’ तर मीर इल्ला आनना, ‘प्रभुनकी दिंदी गरज उंडाद.’ इंगा वाड आदी लगेच आंपी.” 4मंग वार यल्लीर इंगा वारकी दावा मिंदा, वाकील देगार वगा गाडदी फिल्ला कट्टीनेद कमशा मंग वार दान इडशीर. 5आंदु नीला फडीने मंदी लोन्केल काही मंदी वारनी आनीर, “इदी येम शेस्तुनार इ गाडदी फिल्लान येनटीक इडस्तुनार?” 6शिष्यल उत्तर इच्चीर येशुड वारकी येम शप्पीन्या आदी वार शप्पीर. आप्पुड आ मंदी गाडदी फिल्लान एका फोनीचीर. 7वार आदी गाडदी फिल्ला येशुन तीकुड यकोचीर. वार मना बट्टाल दान मिंदा कप्पीर इंगा येशुड दान मिंदा कुसन्या. 8शेंगेम मंदी वारी बट्टाल दावा मिंदा येशीर इंगा इंगोगोर शेल्लोनी तेम्पीने डांकलु येशीर.
9मुंदारकी नडशेतोर इंगा यंका नडशेतोर घोषणा शेयदुर,
“होसान्ना, प्रभुन फेरता वच्चेतोड धन्यवादीत उंडाला#स्तोत्रसंहिता 118:26. .
10मा पुर्वज दाविद इनदी वच्चेद राज्य धन्यवादीत उंडाला.
स्वर्गला होसान्ना.”#मत्तय 23:39.
11यंकसार येशुड यरुशलेम शहरकी फोईनेंका वाड परमेश्वर भवनलोंग फोया इंगा आजुबाजुक आंता सुशा. आ वेळला फद्दु मुनगीन्या दानिचांग वाड वान बारा शिष्यल जताक बेथानीक यल्ली फोया.
अंजीरदी बिना फळुद माक
12इंगोगो नाड, येशुड इंगा शिष्यल बेथानीकेल यल्लीनेंका येशुनकी आकाल आय्या. 13वानकी आकलाता निंडीनेद अंजीरदी शट्टु कमशा. दान मिंदा येमाना शिक्की इ आशाता वाड आंदुक फोया पण वानकी आंदु आकलान इडशी येमीच शिक्काक फो येनटीक की अंजीरदी सीजन लेकुंड्या. 14यंकसार वाड दान आन्या, “दीन मुंदारकी नी फळलु यवारुच तिनाक फोयार.” वान शिष्यल इदी इनीर.
परमेश्वर भवनदी शुद्धीकरण
15यप्पुड येशुड इंगा वान शिष्यल यरुशलेम शहरकी वच्चीर इंगा येशुड परमेश्वर भवनलोंग फोया आप्पुड भवनला यवार आम्मेद इंगा कोन्केन तिस्कुंदुर वारनी येशुड बैटीक तिशेदेंक आंट्या. वाड सराफाली मंचाल इंगा यवार कबुतरलु आम्मुदुर वारी कुसनेय पाटलु बोरकाला येस्काड्या. 16वाड परमेश्वर भवनलेल यवारनीच येमीच येका फोनीयालेद.
17मंग येशुड नेरपेदेंक आंट्या. वाड वारनी आन्या,
“ना इल्लुन आन्नी जातीला इचांग प्रार्थना भवन आन्यार, इल्ला पवित्र शास्त्रला राशीनेद लेद येम?
पण मीर दान लुटाशेतोरदी गुहा शेशीनार.” #
यिर्मया 7:11; लूक 19:46.
18मुख्य याजकलु इंगा नियमशास्त्र शिक्षकलु इदी इनीर इंगा वार वानदी जेम तिस्कुनेद दावा सुदुर येनटीक की आंता मंदी वान शिक्षणता थक्क आयनीर आंका वार वानकी यरस्कुंदुर.
19यप्पुड फद्दु मुनग्या येशुड इंगा वान शिष्यल शहर बैटीक फोईर.
यंडीने अंजीर शट्टु केल शिक्षा
20फद्दीना येशुड इंगा वान शिष्यल फोयेताप्पुड आदी अंजीरदी शट्टु बोड्याकेल यंडीनेद सुशीर. 21पेत्रक ध्यानाम वच्या. वाड येशुन आन्या, “रब्बी, सुड! या अंजीर शट्टुक नु श्राप इच्चीनिंटी आदी यंडी फोयनाद.”
22येशुड उत्तर इच्या, “परमेश्वर मिंदा विश्वास फेटना. 23निन मिक खरेम शपतान की, यवार पण इ कोंडान ‘फिकी समुद्रला फोई फड’ इल्ला आनी इंगा वाड वान मनला शक शेयाक फोई मनाम यल्ला आंटाम आल्ले आय्यी इल्ला विश्वास फेट्टी तर वाड यल्ला आन्या आल्ले आय्यी. 24दिनिचांग निन मिक शपतान येम पण मीर प्रार्थनाला आडग्यार आदी शिक्कीनादुच इल्ला विश्वास फेटना आंटे आदी मिक शिक्की. 25यप्पुड मीर प्रार्थना शेस्का नीला फडतार आप्पुड मी मनला जर यवाराना बद्दल येमाना उंटे तर वारकी क्षमा शेयना. दिनिचांग की, मी स्वर्गलोन आब्बाड मी पापलाद क्षमा शेयाला. 26पण मीर जर क्षमा शेयाक फोतीर तर मी स्वर्गलोन आब्बाड पण मी अपराधलाद क्षमा शेयाक फोई.”
येशुन अधिकार मिंदा प्रश्न
27येशुड इंगा वान शिष्यल वापस यरुशलेम शहरकी वच्चीर इंगा येशुड परमेश्वर भवनला तिरगेताप्पुड मुख्य याजक मंदी, नियमशास्त्र शिक्षकलु इंगा आब्बागार वान तीकुड वच्चीर. 28इंगा वार वान आनीर, “नु या अधिकारता इ माटलु शेस्ताव? इ माटलु शेशेद अधिकार निक यवार इच्चीर?” 29येशुड वारनी आन्या, “निन पण मिमलान वगा प्रश्न आडगुतान इंगा जर मीर नाक दानदी उत्तर इस्तीर तर निन इ माटलु या अधिकारता शेस्तान इदी मिक शपतान. 30योहानदी बाप्तिस्मा स्वर्ग तीकेल उंड्या की मनशी तीकेल उंड्या? दिंदी उत्तर इंडा.” 31दान बद्दल वार वगामेगारला चर्चा शेशीर इंगा आंदुर जर मनाम आदी स्वर्गकेल आंटीम तर वाड आनी, “मंग वान मिंदा मीर विश्वास येनटीक फेट्टालेद? 32जर मनाम आदी मनशी तीकेल आंटे तर मंदी मना मिंदा कोफाम फड्यार.” वारकी मंदीद येरपु आंदु येनटीक की मंदीद विश्वास उंड्या की योहान खरेमे संदेष्टा उंड्या. 33यंकसार वार येशुनकी उत्तर इच्चीर, “माक यरका लेद.” आप्पुड येशुड वारनी आन्या, “मंग निन पण इ माटलु या अधिकारता शेस्तुनान इदी मिक शप्पान.”
Trenutno izabrano:
MRK 11: WNT
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
