اعمال رسولان 8
8
سولس کلیسا اذیت و آزار کره
1سولُس، استیفانه کوشتننه موافق بِه. اَ روجه پَش، پِرّه اذیت و آزار اورشلیم کلیسا را شروع ببه، ایزه که رسولان غیراز، همه ی ایمان داره، یهودیه منطقه و سامِره منطقه را پخش و پلا بِبِنده. 2چند گله خدا شناسه مردکان استیفانه جنازشان دِخشارده و چَوه را پیله عزاداری شان بِکته. 3امّا سولُس، بد جور غیضه نه کلیساش حمله کرده و کییه به کییه گردسه، زلیان و مردکانش بَرآوردنده بَر و دِرنده زندانک.
فیلیپُس سامِرک عیسی درباره تعلیم دییه
4اَ ایماندارانی که اذیت و آزار بیینه واسِنه پخش و پلا آبییه بِنده، هر یاگا که شِسنده، خدا کلامه شاد خبرشان دِسه. 5فیلیپُس نی بِشه سامِره ایگله شهران را و اَگاره مردمه را مسیحه درباره تعلیمش دسِه. 6پِره جماعتی وختی فیلیپُس لاوانشان بَشنَوسه و معجزاتی که انجام دیردشه بیندِشانه، دِقَتِنه اَ چیانی که واتَردشه گوششان آدیرده؛ 7چون پلیده ارواح ناره کَشان و بلنده صصنه، پِر کسانک که چَوان گرفتار بنده، آمیردنده بر و پِر کسه فَلجانک و شلانک، شفاشان بِکته. 8چِمه واسنه اَ شهر پیله شادی نه فِت آبه.
جادوگره شَمعونه ایمان آوردن
9اَ شهرک مردکی زندگیش کرده که چَه نام شَمعون به، اَ، پرانتر سامره مردمِش اِشتن جادوگری نه حیران کرده به و اِدعاش کَرده که اِشتن را کسی اِسه. 10همه، پیله و ویلیک، چَه لاوشان گوش آدِسه و واتردشانه: «اِم مردک هه خدا قدرت اِسه که اَونه ’پیله قدرت‘ واجِنده.» 11مردم چَه لاوشان گوش آدیرده، چون پِر مدتی به اِشتن جادوگری نه، اَوانش حیران کرده به. 12ولی وختی مردم، فیلیپُسه پیغام نه که خدا پادشاهی شاده خبر و عیسی مسیح نامه درباره به، ایمانشان بوعَرده، همبلنه، چِه مَردک و چِه زلی، غسل تعمیدشان بکته. 13حتی شَمعون نی ایمانش بوعرده و تعمید کتنه پَش، همیشه فیلیپُسه همراه به. و شمعون پیله علامت و معجزاته ویندننه که فیلیپسه انجام دِسه، حیران بسِه.
14وختی رسولان اورشلیمک خبردار ببنده که سامره اهالی خدا کلامشان قبول کرده، پِطرُس و یوحنا شان بخرسانسه چَوان وَر. 15اَ دو نفر بامنده سامِره و سامره مردمه راشان دعا بِکَرده تا خدا مقدسه روحه بیگیرنده، 16چون حَلا خدا مقدس روح چوان هیچ کامین را نازل بییه نبه، بلکم فقط عیسای خداوند نامنه تعمیدشان کته به و بس. 17پس پِطرُس و یوحنا اِشتن دسشان، اَنا چَوان سر و اَوان خدا مقدسه روحشان اَرکته.
18وختی شَمعون بیندشه که رسولان اِشتن دسه اَنینده مردمه سر و اَوه خدا مقدسه روح اَرکترنده، کملی ای پول بوعَردشه و 19رسولان نه باتشه: «اِم قدرته من نی آدیا تا هر کسی سر دس اَنَیِم، خدا مقدسه روحه بیگیره.»
20ولی پِطرُس اَوِنه باتشه: «اِشته نقره تنه نابود بیبی! چون خیالر بکه که تانی خدا هدیه پول نه بِخِری! 21تِه اِم خِدمَتک هیچ سهم و نقشی نداری، چون اِشته دِل خدا نه ایی نییِه. 22پس اِشته اِم شرارتِک توبه بِکه و خداوندک آخاز تا بلکم اِشته دلِه اِم فکر بَخشِسه بیبی؛ 23چون ویندَرم که اِشته وجود تَلی و گناه اسیره.»
24شَمعون باتشه: «شاما چِمن را خداوند وَرک دعا بِکَراه تا اَ چی که باترانه چِمن سر مایه.»
25پِطرُس و یوحنا بعد از اِم که شهادت آداشانه و خداونده کلامشان اعلام بکه، آگردسنده اورشلیم را و راک سامره خیلی دهانک انجیله شاد خبرشان اعلام کردرده.
فیلیپُس و دربارهِ خواجه
26اَدمی خداونده ایگله فرشتۀ فیلیپُس نه باتشه: «بیض و بِشه جنوبه طرف، اَ راهی که اورشلیم نه شی غزه را. اَ راه بیابانه دِلَنه اِسه» 27پس فیلیپس بِهِشت و بِشه، راک خواجه مردکی بیندشه که حبشه کین به. اَ حبشه ملکه ایگله درباریانک به که چَوه نام ’کَنداکِه‘ به و ملکه خزانه‌دار به. اَ خواجه مردک آمییَه به اورشلیم تا خدا پرستش بکره. 28اِسا آگردسَرده، اِشتن اَرابۀ دلَه نشته بِه و اِشعیای پیغمبره کتابش خواندرده. 29اَدمی خدا روح فیلیپُس نه باتشه: «بِشه پَران و اَ ارابه نه همراه ببَش.»
30پس فیلیپُس بیرویت ارابه طرف و بِشنَوِسشه که درباره خواجه اِشعیای پیغمبره کتابه خواندر. اَونه باتشه: «اَ چی که خواندری، فهمِسَری؟»
31درباره خواجه باتشه: «چُنجوره تانم بفهمم، اگم کسی من راهنمایی مَکره؟» پس فیلیپُسکِش خواهش بکه دِنشه اَرابک و چَوه وَرک بِنِشه. 32خواجه، مقدسه کتابه اِم بخشش خواندرده که واتردشه:
«درست، ایگله پَسّی شوار که اَوه بردرنده سر آبرنده،
و ایگله وَرلی شوار که اِشتن پَشمه آبران وَرک ساکتا،
اَ، اَجوره اِشتن گَرش آنکه.
33چَه حقیر بیینه موقعک، عدالت اَوک دریغ ببه؛
کی تانه چَوه نسل درباره لاوَه بکره؟
چون چَوه زندگی زمینه سَرک اَوک اَرکته ببه.»
34خواجه، فیلیپُس نه باتشه: «خواهش کرم منه باجی که پیغمبر اِنگارک چی کی درباره لاوَه کردر، اِشتن درباره یا علوده نفری درباره؟» 35پس فیلیپُسه شروع بکه لاوَه کردن و کتاب مقدّسه هَ بخش نه شروعش بکرده، عیسی درباره شاده خبرش آداه.
36هَ جوره که راک پَران شییَردنده، آرَسسنده یاگایی که اُ اِسبه. خواجه باتشه: «دیس، اِمین اُو! اِسا چی تانه چِمن پَرانه بیگیره غسل تعمید مَگیرم؟» 37فیلیپُس باتشه: «اگم تمام اِشته دل نه ایمان آوردَره، هیچی اِشته پَرانه نیگیره.» خواجه باتشه: «ایمان دارم که عیسی مسیح خدا زا اِسه.»
38خواجه دستورش بدا اَرابه نیا بدارنده، و فیلیپُس و خواجه، هر دو نفر دِشنده اُو دلَه و فیلیپُس اَوش غسل تعمید بدا. 39وختی که اُونه بَرآمنده، ایرادَن خداونده روح فیلیپُسش اَکَتِه و بِبَردشه و خواجه دَ اَوش نیوینده، و شادی نه اِشتن راه بشه. 40امّا فیلیپُس اِشتن، اَشدود منطقه دلَک بیندشه. اَ تمان اَ منطقه شهران دلَک گَردسه و انجیله شاده خبرش آدِسه، تا آرَسس قیصریه شهره را.
@ 2024 Korpu Company