دوّمین نامَه تِسالونیکی کلیسا را 2
2
بی دینَه مَردک
1اِسا ای بِراران، چاما خداوند عیسی مسیح آگَردِسنه درباره و چاما، چَوه دویرَه بیدا آبییَن درباره، شاماک خواهش کرِم، 2هیچی شاما فکره خراب مَکره و مترسا چِه ایگله روح واسطنه، چِه ایگله لاوَه نه، چِه ایگله نامه‌ای نه که چِشی چاما طرفنیه که واجِه، خداونده آگَردِسنَه روج آرَسَه. 3مَرزا هیچکس هیچ جوری شاما وازی بِدیه. چون اَ روج نایه مگر اِم که اوّل مردم خدا ضد بیزِنده و اَ بی دینه مَردک که هلاکته زا اِسه ظهور بکره، 4اَ، هر چی نه که خدا داد بی یا پرستش بی، مخالفت کَره و اِشتن اَوانک کفاتر زانه، جوری که خدا معبد دلَه نِشِه و اعلام کرده که اِشتن خدایه.
5یعنی شاما ویرران نییِه، اَدمی که شامانه بم اِمان شامانه باتِمه؟ 6و شاما زانا که اِسا چی چَوه پَرانه گیره تا اَ اِشتن وَقت موقعک بایه. 7چون اِم بی دینی سِرّ اِسا نی کار کره، فقط تا وختی که اَ کسی که تا اِسا مانع اِسه میانَک اَپرچینسه بیبی. 8اَ موقع اَ بی‌دینه مردک آیه، که خداوند عیسی اِشتن گَره نَفسنه اَوه نابود کَره و اِشتن پُر شکوه آمییننه، اَوه نابود کره. 9اَ بی‌دینه مردکه آمییَن، شیطانه کار واسِطنه، همان قوت و دوریه نشانه هان و معجزهان نه و عجیب چیان که گمراه کرنده، 10و همه شرورانه حیله هان نه کسانی را که نابودی راهک اِسنده، چون که اَوان نگوسشانه حقیقتنه خَش بیبینده تا نجات پیدا بِکرنده. 11پس خدا اَوان ایگله یَکه دوری ای گرفتار کره، ایزه که اَوه اَ چی که دوری اِسه نی باور کرنده، 12تا همه‌ی کسانی که حقیقت شان باور کرده نییه و هر چیک که نادرسته، کیفشان کَرده، محکوم بیبینده.
پا برجا بمانا
13امّا ای بِرارانی که خدا را عزیزگرامی اِسران، آما گه همیشه خدا شاما واسنه شکر بکرام، چون خدا شاما نوبری شوار انتخابش بکرده که نجات پیدا بکرا، اَ تقدیسی واسِطنه که خدا روح نه انجام بی و ایمان حقیقی داشتننه اِسه. 14ایزه بِبه که اَ شاما، چاما انجیل واسِطنه دعوتش بکرده، تا چاما خداوند عیسی مسیح جلال شاما نصیب بیبی. 15پس، ای بِراران، پابرجا ببا و آچکا اَ تعلیمانی که آماک آموتَرانه، چِه چاما لاوَهانک چِه چاما نامه هانک.
16اِسا چاما خداوند عیسی مسیح اِشتن و چاما پِه، خدا،که آمانه خَش به و فیضه واسِطنه، آما ابدیه تسلی و چاکه امید آداشه، 17شاما دلان تسلی بِدیه و هر چاکه کار و لاوَهانک پابرجا بِکره.
@ 2024 Korpu Company