ลามูลา 26
26
อีซัก ฌางัน อาบีเมเลก
1กาลา อีตู_ อาดา ลาฆู บือตาฮัด โกะ ซือบารัก มากัด เดะ ตือปัจ อีตู_ ลือเบฮ เดะ บือตาฮัด มากัด เดะ กาลา ดูลู_ เดะ ฮาดัจ นะ อับราฮัม. กะฆีเตอ_ อีซัก ปี กะ ตูโปะ เกรัยํ_ กะ อาบีเมเลก_ ราฌา นะ ลูมอฮ ฟีลิซะเตีย. 2ตูฮัด บือซัยํ เดะ อาตัซ ปลีฮัจ กะ ญา_ มือเลา จะ “ฌางัน ปี กะ นังฆรี อียิบ เลอ. กือนา ดูโดะ เดะ นังฆรี นู กู นะ อาเกะ บรี กะ เกา. 3มือนูปัก ดูโดะ เดะ นังฆรี อีนี_ กะฆีเตอ กู นะ ดูโดะ ฌางัน เกา_ บรี ซือลามัจ กะ เกา_ ซาเบะ จะ_ กู นะ บรี ตือปัจ ตานัฮ อีนี ซือมูฮา กะ เกา_ กะ โกะ บือแนฮ บักซา นะ เกา. กู นะ บูวัจ ตูโรจ_ บือกะ นู กู บือเลฮ อาเกะ มือเลา บือฌาญี ดัฮ_ ฌางัน อับราฮัม_ ปะ เดะ เกา เตอ. 4กู นะ บือตามัฮ บือแนฮ นะ เกา บรี บาญะ_ บือกะ โกะ บีตัก เดะ ลาแงะ_ นะ อาเกะ ตือปัจ ตานัฮ อีนี ซือมูฮา กะ บือแนฮ นะ เกา. โกะ ลูมอฮ บักซา เดะ ดือนียา ซือมูฮา_ นะ บือเลฮ ซาโมจ ลาฆู บรี ซือลามัจ_ กรานา บือแนฮ นะ เกา เลอ 5ซาเบะ อับราฮัม ญา บือเลฮ มือนีงัย กะ ซือวารา นะ กู_ ญา บูวัจ ตูโรจ กะ ปือมือซัด นะ กู_ ฌางัน ปือมือเลา ฮูโกบ นะ กู_ ฌางัน โกะ ฮาดัจ ฮูโกบ นะ กู_ ฌางัน ปือมือเลา อาฌัยํ นะ กู.”
6กะฆีเตอ อีซัก_ ญา ดูโดะ เดะ นังฆรี เกรัยํ. 7กาลา โกะ ลูมอฮ ซือมียา เดะ นังฆรี ตาญา ปาซัน บีนี นะ ญา_ ญา ตีกัฮ จะ “ญา ฌาดี อาดี เดะ กู.” ซาเบะ ญา ตาโกจ นะ มือเลา จะ “บีนี นะ กู” บรีงัจ จะ “เตด กะฆีเตอ_ โกะ ลูมอฮ ซือมียา นะ บูนอฮ กู_ บีดา นะ ราปัซ อาเมด เรเบคา_ ซาเบะ จะ_ ญา บือฆาจะ เลอ.” 8กาลา ญา ดูโดะ เดะ ตือปัจ อีตู ลามา ดัฮ_ อาบีเมเลก_ ราฌา ลูมอฮ ฟีลิซะเตีย_ ญา ตีญุง เดะ จือลัฮ ตีกะ_ ลีฮัจ อีซัก ตืองัฮ บือบือโตยํ ฌางัน เรเบคา_ บีนี นะ ญา. 9กะฆีเตอ อาบีเมเลก_ บลาโลก อีซัก มาแรฮ มือเลา จะ_ “อีนี โบะ_ ฌาดี บีนี นะ เกา. บูวัจ นามา เกา มือเลา จะ ‘ญา ฌาดี อาดี เดะ กู’?” อีซัก มือญาเระ กะ ราฌา จะ “ซาเบะ กู บรีงัจ จะ ‘เตด กะฆีเตอ_ กู นะ มาตี กรานา ญา.’ ” 10อาบีเมเลก มือเลา จะ “เกา บูวัจ ลาฆู นามา ฌางัน ลูมอฮ กามี กะฆีนี? นะ บูวัจ บรี ซือมียา ซืออูรัก_ มาโซะ ปี ตีโนะ ฌางัน บีนี นะ เกา_ นังซือนัง. เกา เตอ_ นะ บาวา ลาฆู ดูซา มาแรฮ กะ ลูมอฮ กามี.” 11กะฆีเตอ อาบีเมเลก ญา มือเลา ปรีงัจ กะ โกะ ลูมอฮ ซือมียา ซือมูฮา จะ “ซาปา บือฆาโดฮ กีลากี อีนี ฌางัน บีนี นะ ญา_ นะ กือนา บูนอฮ บรี มาตี เลอ.”
12อีซัก บือเลฮ ตานัม ปูโฮด ปาดี เดะ ตือปัจ ตานัฮ อีตู. เดะ ตาโฮด อีตู เตอ_ ตูฮัด บือซัยํ เดะ อาตัซ บรี ซือลามัจ กะ ญา_ บรี กูญา มูงอจ โกะ ปาดี_ ซือราตุซ กาลี ตามัฮ. 13อีซัก โปด_ ดูโดะ มากัด ซือนัง_ บือเลฮ โกะ ซือบารัก บาญะ ซือรูโลยํ_ ฌาดี ซือมียา กายา โตระ เลอ. 14ญา อาดา กาวัด แบะ_ กาวัด กาเมก_ ฌางัน กาวัด ลือมู_ อาดา โกะ ปราโซฮ บาญะ_ บูวัจ บรี ลูมอฮ ฟีลิซะเตีย ดือกี กะ ญา. 15(โซะ ลูมอฮ ฟีลิซะเตีย บือเลฮ ตูโดก ตาโมด โกะ ตลาฆา_ ราตา บีฌี_ นู ปราโซฮ นะ ปะ เดะ ญา กาลี ตาโรฮ_ เดะ ฮาดัจ นะ อับราฮัม_ ปะ เดะ ญา.) 16อาบีเมเลก มือเลา ฌางัน อีซัก จะ “ปี บรี ฌาโวฮ เดะ กามี เลอ_ ซาเบะ เกา ตือฆัยํ อูรัจ บาญะ ลือเบฮ เดะ ลูมอฮ กามี เลอ.”
17กะฆีเตอ อีซัก ญา ตรือเบะ เดะ ตือปัจ อีตู_ ตืองะ รูมัฮ กาฌัก กาเยด นะ ญา เดะ โซะ ซูงัย เกรัยํ_ ดูโดะ เดะ ตือปัจ อีตู 18อีซัก ญา กาลี โกะ ตลาฆา อาเย_ นู กือนา กาลี เดะ ฮาดัจ นะ อับราฮัม_ ปะ เดะ ญา_ ปูลัก_ ซาเบะ ลือปัซ เดะ นู อับราฮัม มาตี ดัฮ_ ลูมอฮ ฟีลิซะเตีย บือเลฮ ตาโมด ดัฮ. ญา ตืองะ ปือนามา กะ โกะ ตลาฆา ตูโรจ นู ปะ เดะ ญา บือเลฮ ตืองะ เลอ. 19ตาปี กาลา โกะ ปราโซฮ นะ อีซัก กาลี เดะ จือลัฮ บูเกะ_ ดาปัจ มาตา อาเย ซือบุยํ_ 20ซือมียา ปือบือลา โกะ บือนาตัก นะ นังฆรี เกรัยํ โปด_ มาแรฮ บือตือฆัฮ ฌางัน ซือมียา ปือบือลา บือนาตัก นะ อีซัก_ มือเลา จะ “อาเย อีตู ฌาดี นะ กามี.” ญา บลาโลก ตลาฆา อีตู จะ_ เอเซก_ (ฌาดี จะ_ ลาฆู บรือโบจ)_ ซาเบะ กูญา มาแรฮ บือตือฆัฮ ฌางัน ญา. 21ลูมอฮ กูญา โปด_ ปี กาลี ตลาฆา บารู ซือบีฌี ปูลัก_ บารู บือตือฆัฮ ปาซัน ตลาฆา อีตู ฌูฆา. ญา บลาโลก ปือนามา ตลาฆา อีตู จะ_ ซิดนา (ฌาดี จะ_ ลาฆู ฌาดี ซือตรู.) 22ญา อูบัฮ เดะ ตือปัจ อีตู_ ปี กาลี ตลาฆา นู ซา บีฌี ปูลัก. กูญา โปด_ เตด บือตือฆัฮ ปาซัน ตลาฆา อีตู ดัฮ_ กะฆีเตอ ญา บลาโลก ปือนามา ตลาฆา อีตู จะ_ เรโฮโบด_ (ฌาดี จะ_ ตือปัจ นู ลือฆา) มือเลา จะ “ซาเบะ วะตู อีนี ตูฮัด บือซัยํ เดะ อาตัซ บรี ตือปัจ ดูโดะ นู ลือฆา กะ กามี_ กามี นะ บือตามัฮ บาญะ เดะ นังฆรี อีตู.”
23อีซัก โปด_ ตรือเบะ เดะ ตือปัจ อีตู_ ปี กะ เบเออ-เซบา. 24ตูฮัด บือซัยํ เดะ อาตัซ โปด_ ปลีฮัจ กะ ญา_ เดะ มาลับ อีตู_ มือเลา จะ “กู ฌาดี ตูฮัด นะ อับราฮัม_ ปะ เดะ เกา. ฌางัน นะ ตาโกจ เลอ_ ซาเบะ กู ดูโดะ บือซามา ฌางัน เกา_ นะ บรี ซือลามัจ กะ เกา_ บรี บือแนฮ นะ เกา บือตามัฮ บาญะ_ กรานา อับราฮัม_ ปือญูโรฮ นะ กู.” 25กะฆีเตอ_ อีซัก ญา บูวัจ ตือปัจ มือญือมัฮ_ เดะ ตือปัจ อีตู_ มือญือมัฮ ตรือเบะ ปือนามา นะ ตูฮัด บือซัยํ เดะ อาตัซ. ญา ตืองะ รูมัฮ กาฌัก กาเยด นะ ญา_ เดะ ตือปัจ อีตู. โกะ ปราโซฮ นะ อีซัก โปด_ กาลี ตลาฆา ซือบีฌี ปูลัก_ เดะ ตือปัจ อีตู.
26โซะ อาบีเมเลก_ ญา ตรือเบะ เดะ เกรัยํ_ มารือมา ฌางัน อาฮูซัด_ ซาบัจ นะ ญา_ ฌางัน ฟีโกน_ กือปาลา ตาฮัน นะ ญา_ ปี ซารี อีซัก. 27อีซัก ตาญา กูญา ซือมูฮา จะ “บูวัจ นามา กาเญา มาแรฮ ซารี กู_ โบะ กาเญา บือชี กะ กู_ โปรฮ กู บรี ดูโดะ ฌาโวฮ เดะ ฮือลด มูคา นะ กาเญา?” 28ลูมอฮ กูญา ตีกัฮ จะ “กามี ลีฮัจ ซัฮ ดัฮ จะ_ ตูฮัด บือซัยํ เดะ อาตัซ ดูโดะ บือซามา ฌางัน เกา_ กะฆีเตอ กามี มือเลา จะ_ มีตา บรี อาดา ปือมือเลา อาเกะ มือเลา บือฌาญี_ นะ กามี ฌางัน เกา_ บรี กะ กามี บูวัจ ปือมือเลา บือฌาญี บือตือตู ฌางัน เกา_ 29บีดา จะ_ เกา นะ เตด บูวัจ บรี กามี ซาเกะ_ บือกะ นู กามี เตด บือเลฮ ปือเตาะ ญาวา นะ เกา_ เตด บูวัจ ลาฆู มานามา กะ เกา_ ซา ลาฆู บาฌิ_ บือเลฮ อาตัจ เกา ปี บรี ซือนัง ซือลามัจ เลอ. วะตู อีนี เกา ฌาดี ซือมียา นู ตูฮัด บือซัยํ เดะ อาตัซ บรี ซือลามัจ ดัฮ เลอ.” 30กะฆีเตอ_ อีซัก ญา ซียะ โกะ ซือบารัก มากัด กะ ลูมอฮ กูญา_ บรี กูญา บือเลฮ มากัด โอะ เลอ. 31ตานา จรัฮ ปาฆี_ โซะ กูญา ดูวา ปาลัฮ โปด_ บีกัซ เดะ วะตู บือบีฮัก_ บูวัจ ลาฆู อาเกะ มือเลา บือซูปัฮ บือฌาญี ซามา กูญา. อีซัก โปด_ อาตัจ ลูมอฮ กูญา ปี. กูญา โปด_ ตีงัน ญา_ เดะ ลาฆู ซือนัง ซือลามัจ ดัฮ. 32เดะ อารี อีตู เลอ_ โกะ ปราโซฮ นะ อีซัก มาแรฮ มือญาเระ กะ ญา_ ปาซัน ลาฆู ตลาฆา นู กูญา บือเลฮ กาลี_ มือเลา ฌางัน ญา จะ “กามี ดาปัจ อาเย ดัฮ.” 33ญา บลาโลก ตลาฆา อีตู จะ_ ชีบา#26.33 ชีบา ปือมือเลา อีนี ดืองัยํ ซือรูปา บือกะ ปือมือเลา บาซา ฮีบรู จะ “บือซูปัฮ.”. กะฆีเตอ นังฆรี อีตู_ อาดา ปือนามา จะ_ เบเออ-เซบา#26.33 เบเออ-เซบา ปือนามา อีนี ญา นะ ตูโญะ กะ ดูวา ลาฆู_ ฌาดี จะ_ “ตลาฆา นะ ลาฆู บือซูปัฮ”_ เฆอ จะ_ “ตลาฆา นะ โกะ ตูโฌฮ.”. ฌู รอจ กะ ฮาดัจ อีนี.
34กาลา เอซาว อูมอยํ ปัจ ปูโลฮ (40) ตาโฮด_ ญา บือเลฮ ซาโมจ ยูดิด_ นานะ นีบีนี นะ เบเออรี_ ซือมียา ลูมอฮ เฮด_ ฌางัน บาเซมัด_ นานะ นีบีนี นะ เอโลน_ ซือมียา ลูมอฮ เฮด_ ฌาดี บีนี นะ ญา. 35โกะ นีบีนี อีตู_ บูวัจ กะ อีซัก ฌางัน เรเบคา อาดา ลาฆู ซูซัฮ ฮาตี.
Trenutno izabrano:
ลามูลา 26: ULBIBLE
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi