मरकुस 7
7
पुरखा ची शिक्षा
(मत्ती 15:1–9)
1बल्ति फरीसी ते कोच्छ शास्त्री जको यरुशलेम कनु आले हुते, ईशु चे गोढु भेले हुले। 2ते वाणे ओचे कोच्छ चैला नु अशुद्ध यानिकि बिना हाथ धोले रोटी खाते ङेखले।
3कांकि फरीसी ते सारे यहूदी आपणे पुरखा ची परम्परा उपर चली, ते जब तक हर हालत, हाथ ना धोती गिही तब तक ना खई। 4ते बजारा महु आती कर, जब तक इश्नान ना करती गिही, तब तक ना खई, ते ब़ोहत सारीया नेरीया बाता छी, जको वांचे गोढु मनणे वास्ते पुचालीया गेलीया, जिंवे मुंगर, ते गङवीया ते तांबे चे ठांवा नु धोवणे ते मांझणे।
5ऐवास्ते वां फरीसिया ते शास्त्रीया ने ईशु कनु पूछले, “दुधे चैले पुरखा ची परम्परा उपर कां ना चली ते बिना हाथ धोले रोटी खई?”
6ईशु नु वानु केहले, “यशायाह भविष्यवक्ता ने तम्चे कप्पटीयां चे बारे मां हा भविष्यवाणी ब़ोहत ठीक करली, जिसड़े लिखले पले,
“ ‘ईं लौक होठा लारे तां माया कद्दर करी,
पर वांचे मन माये कनु दूर रिहे।
7ये बेकार मां माई अराधना करी।
कांकि इन्साना ची विधिया नु
धर्म उपदेश करती कर सिखावी!’
8“कांकि तम्ही नरीकार चे आज्ञा नु टालती, ते तम्ही बन्दा ची रीति रिवाजा नु मना।”
9ईशु ने वानु केहले, “तम्ही आपणी परम्परा नु मनणे वास्ते नरीकारा ची आज्ञा किवें आच्छी तरह टालती ङिया। 10कांकि मूसा ने केहले, ‘आपणे ब़ा ते आपणी आई चा कद्दर करा,’ ते ‘जको कुई ब़ा आई नु बुरे किहो, ऊं जरुर मारती नाखले जाओ।’ 11पर तम्ही किहा कि अगर कुई आपणे ब़ा ते आई नु किहो, ‘जको कोच्छ तम्हानु माये कनु फायदा हुता ओ कुर्बान यानि भेंट चढ़ती चुकला।’ 12तां तम्ही ओनु ओचे ब़ा ते आई ची कोच्छ सेवा करु ना ङिया 13यूं करती तम्ही आपणी परम्परा कनु, जानु तम्ही ठहराले, नरीकारा चे वचना नु टालती ङिया, ते इसड़े-इसड़े ब़ोहत से काम करा।”
बन्दा नु अशुद्ध करने आलीया बाता
(मत्ती 15:10–20)
14ईशु ने लौका नु आपणे गोढु हकारती कर वानु केहले, “तम्ही सब माई सुणा, ते समझा। 15इसड़ी कुई चीज कोनी जको इन्साना चे ब़ाहरु कनु समाती कर ओनु अशुद्ध करो, पर जको चीजा इन्साना चे भीतर कनु निकली, वे ही ओनु अशुद्ध करी 16अगर काये सुणने चे कान छी, तां ऊं सुणती गिहो।”#7:16 कोच्छ हस्तलेखा मां हा वाक्य ना मिली
17बल्ति जिसे बेले भीड़ी नु छोड़ती कर ईशु भीतर गेला तां चैला ने ऐ मिसाल चे बारे मां पूछले 18ईशु ने वानु केहले, “का तम्ही वी इसड़े ना समझ छिवा? का तम्ही ना जाणा कि जको चीज ब़ाहर कनु इन्साना चे भीतर जाये, वा ओनु अशुद्ध ना कर सग़ी? 19कांकि वा ओचे मना मां ना, ढिड्डा मां जाये, ते संडास चे जरिये निकलती जाये।” ईं केहती कर ओणे सारीया खाणे चीया चीजा नु शोद्ध ठहराले।
20बल्ति ओणे केहले, “जको इन्साना चे महु निकले, ऊंही इन्साना नु अशुद्ध करे। 21कांकि भीतर कनु, यानि इन्साना चे मना कनु, बुरे-बुरे विचार, व्यभिचार, चोरी, हत्या, परअसतरी गमन, 22लोभ, दुष्टता, छल, लोचपण, बुरी नजर, निन्दा, अभिमान, ते मूर्खता निकले। 23ये सारीया बुरीया बाता भीतरु ही कनु निकली, ते इन्साना नु अशुद्ध करी।”
हेक असतरी चा विश्वास
(मत्ती 15:21–28)
24बल्ति ईशु ने उठु उठती कर सूर ते सैदा चे देशा मां आला, ते हेके घरा मां गेला ते चाहता कि कुई ना जाणो, पर ओ छोप्प ना सग़ला। 25ते तुरन्त हेक असतरी जाई छोटी छुवेरी मां अशुद्ध आत्मा हुती, ईशु ची चर्चा सुणती कर आली, ते ओचे पग़्ग़ा मां ढेली। 26हा यूनानी ते सुरुफिनीकि ची जाति ची हुती। विणे ओकनु बिनती करली कि माई छुवेरी महु दुष्टात्मा काढ़ती ङे। 27ईशु ने विनु केहले, “पेहले ब़ाला नु रज़ु ङे, कांकि ब़ाला ची रोटी चती कर कुत्ता चे आग़ु नाखणी ठीक कोनी।”
28विणे ओनु उत्तर ङिला, “सच्च छै प्रभु, तांवी कुत्ते वी तां मेजा तले ब़ाला ची रोटी चा चूरा-चारा खाती गिही।”
29ईशु ने विनु केहले, “ये बाते ची वजह कनु चाह्ली जा,दुष्टात्मा दुधी छुवेरी महु निकलती गेली।”
30बल्ति वा आपणे घरे गेली ते आपणी छुवेरी नु विणे खाटे उपर नूहले आले ङेखले। जब तक दुष्टात्मा विचे महु निकलती गेली।
बहरा ते गूंगे नु ठीक करले
31ईशु सूर ते सैदा नांवा चे शहरा महु निकलती कर दिकापुलिस हुता हुला गलील ची झीली उपर पुज़ला। 32ओठे कोच्छ बन्दी ईशु गोढु हेके बन्दे नु गेहती आले जको बेहरा ते गूंगा हुता। लौका ने ईशु कनु प्राथना करली कि ओ आपणा हाथ ओचे उपर मेहलो कि ठीक हुती जाओ। 33बल्ति ईशु ओनु भीड़ी कनु दूर गेहती गेला। ईशु ने आपणीया आंगलीया ओचे काना मां घिरालीया ते बल्ति ओणे हाथा उपर थूकती कर ते ओ बन्दे ची जुबानी नु लाले। 34बल्ति आसमाना सनु ङेखती कर ठाडी हा भरती कर ओनु केहले, “इप्फत्तह!” यानि “खुलती जा!”
35ते ओचे कान खुलती गेले, ते ओची जुबान ची ग़ांठ वी खुलती गेली, ते ओ साफ-साफ ब़ोलु लाग़ला 36बल्ति ईशु ने वानु चिताले कि कानु कहीं ना केहजा। पर जितने ओणे रोकले, वाणे ये बाते नु उतने ही ज्यादा फैलाले। 37ते बन्दा नु अचम्भा हुती गेला ते किहुं लाग़ले, “ईशु जको करे भले करे। इठे तक कि ओ बहरा नु सुणने वास्ते ते गूंगा नु ब़ोलणे वास्ते ताकत ङिये।”
Trenutno izabrano:
मरकुस 7: ODR
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
CC BY-NC-ND 4.0
