रोमी 5
5
ङुरूङ परमेश्वरताङ डिक्पा ओताते बात
1थोक खाईन थे खोरोङला विश्वास खित्कान ङुरूङला परमेश्वरगी दोषी मेन साबा ओतेकी ङुरूङ थेत्ताङ डिक्पा ओत। ङुरूङ प्रभु येशू ख्रीष्टकी ङुरूङला थेत्ताङ डिक्पा खाईन बिन्दाते ईन। 2थेकी खित्सादुराङ परमेश्वरगी थे खोरोङला विश्वास खित्कान ङुरूङला दया खाईन थे खोरोङताङ डिक च्युताते ईन। था थेकी ङुरूङला दया खिता नोमुङ मोतोङो। दोक ईन्देकी थाचेन परमेश्वरगी ङुरूङला मान बिन्ला थे खोरोङगी ज्वा चाला च्योकराङ लेमु जोइओ साबाते बात ङुरूङगी आश खाईन गुकीन देता च्योकराङ खिओ सिन गा खिन देता थुप्क्यो। 3दोस्यिककामा मेन, ङुरूङनी पीरताङ दुक्पे बेलालाङ गा खिओ। च्यिला सासीन दुक्पा ङेत्लाराङ ङुरूङ दुक्पा खपे खिता थुप्च्या डुइओ। 4थोक खिता थुप्च्या गाल्नामेई परमेश्वरगी ङुरूङला पाको गालाते मि ईन सिन सिओ। दोक खाईन पाको गाल्नामेई परमेश्वरगी खिओ साबाते बात साबा च्योकराङ खिओ सिन ङुरूङ झन आश खिन देता थुप्क्यो। 5था परमेश्वरगी ङुरूङगी आश खाबाच्योक मिक्किच्या ईन्दा च्यिन्दा सिन नोमुङ सेम सेता माफाबो। च्यिला सासीन थेकी ङुरूङला परमेश्वर आत्मा बिन्देकी थेकी दाक्पोनला थोई ङिङज्ये खित्च्या ईन्दाका सिन ङुरूङगी लेमु खाईन छ्या स्येबा ओत।
6चुक सासीन ङुरूङगी परमेश्वरगी खि साबाते ङेन्गीन लेमु काम खिता थुपा मेतान। दोक खाईन ङुरूङ परमेश्वरगी माकेत साबा साबा खिन देता ओते बेलालाराङ ख्रीष्ट ङुरूङ लाईदु थे खोरोङ ज्यान बिन्गीन स्यिसुङ। परमेश्वरगी तोके खाबाते ठीक बेलाला थे दोक खाईन स्या ओतान। 7था ङुरूङगी बातज्यीक विचार खाला तेइ। छ्याःङ दोष मेताते मिला जोए खिताप सिन दाक्पोन ज्यानगी माया मारे खित्कान्ते मि काल्बा च्योक सुङ मेथेनो। ज्येनला लेमु खित्कान्ते मि लाईदुचेन सुइँदा थोक खित्कान थेन्दाङ थुप्क्यो। ईन्सीनोङ मेलेबा मि लाईदु दाक्पोन ज्यान तेरकान्ते मिनी सुङ थेनराङ मेथेनो। 8तर ख्रीष्टचेन ङुरूङ पापी ओत्कीन ओत्कीनोङ ङुरूङ लाईदु थे खोरोङ ज्यान बिन्गीन स्यिसुङ। ङुरूङ लाईदु ख्रीष्टला थोक खिताला ताङगीन परमेश्वरगी ङुरूङला आउदी खाला ङिङज्ये खिओ सिन छ्या स्ये च्युत्सुङ।
9ख्रीष्ट थोक खाला ङुरूङ लाईदु ज्यान बिन्ला स्यिजीन थे जीउदुकी थेन्दाते ठागी खित्सादु परमेश्वरगी ङुरूङला दोषी मेन साबा ओत। दोक ईन्देकी था तिरी परमेश्वरगी स्येदाङगी चूर गाल्ला तेरच्येते सजायदुकीङ ख्रीष्टकीराङ ङुरूङला टाल्ला तेरग्यो। 10ङुरूङ थेत्ताङ माडिक्ला थे विरोध खिन ओत्कीन ओत्कीनोङ थे खोरोङ फुज्युङ ङुरूङ लाईदु स्याप्ते ईन्देकी परमेश्वरगी ङुरूङला थे खोरोङताङ डिक्पा खाबा ओत। थेमे येशू स्यिसादुकी सोम्बो लोगीन सोम्बोराङ ओतेकी खित्सादु परमेश्वरगी ङुरूङला पूरो खाला पापदुकी टाल्ला स्वर्गने देत ज्युत्क्यो। 11दोस्यिककामा मेन, ङुरूङ प्रभु येशूकी ङुरूङला परमेश्वरताङ डिक्पा खाईन बिन्दा ओतेकी परमेश्वर ङुरूङला चुक लेमु खित्कान्ते ईन्दे सिन था ङुरूङ गा खिन देता थुप्क्यो।
आदमताङ ख्रीष्टला दाँजे खाबाते
12बात चुक ईन्दे सासीन मिज्यीगी पाप खाबेकी खित्सादु दि सा लुङबादु पाप खित्च्येते सिराते शुरू ओङगीन थे तिरी मि गाङेकी पाप खिताला स्यूसुङ। थेमे पाप खाबेकी खित्सादु थे मि कालगी खाला फाप्ला स्या फाप्च्या ओङसुङ। थोक ओङगीन थे तिरी मिङ गाङेराङ स्या फाप्च्या ओङसुङ। च्यिला सासीन थेबाङ गाङेराङ पापीराङ गाला ओतान। 13परमेश्वरगी मोशे पालोलाकामा थे खोरोङ नियम बिन्दाते ईन्सीनोङ थे भन्दा गोमाङ मिओनगी पाप खिनराङ ओतान। नियम तेर तेरसाक मिओनगी खाबाते पापकी हर हिसाबचेन परमेश्वरगी ज्याक्पा मेतान। 14थोक ईन्सीनोङ परमेश्वरगी गाङे भन्दा गोमा जोबाते मि आदम पालोमेकी मोशे पालोसाक मि सुङ कालगी खादुकी थारा माथुप्सुङ। च्यिला सासीन आदमगी च्योक परमेश्वर थे खोरोङ खेकीराङ दोक माकेत साबाते माङेन्गीन पाप खाबाच्योक मेन्सीनोङ थेबेकीङ पापचेन खाबा ओतान।
थेमे परमेश्वरगी तोङगो साबाते मित्ताङ आदमला दाँजे खाला ताजीन थेबे नाङ कोई कोई बात डिक्च्या कोई बात मिडिक्च्या थोङगीदुक। 15चुक खाला सासीन आदम दोक्पोईकी परमेश्वरगी माकेत साबाते काम खाईन पाप खाबेकी खित्सादु मि काल्बेईला चुक मेलेबा ओङसुङा सिरच्येते बातताङ येशू ख्रीष्टकी खाबाते कामगी खित्सादु परमेश्वरगी मि काल्बेईला दया खित्च्येते बातचेन खापान खापान खुदुक ईन। आदमगी खित्सादु मिओन स्या फाप्कीन ओतान सासीन येशू ख्रीष्टकी खित्सादुचेन परमेश्वरगी थे खोरोङ दयेकी मिओनला पापकी सजाय मेतेरच्या ओङसुङ। 16दोक खाला आदम गल्तीज्यीगी खित्सादु परमेश्वरगी मिओनला पापकी सजाय तेरच्येते बातताङ येशू ख्रीष्टकी खाबाते कामगी खित्सादु परमेश्वरगी दया खाला मिओनला सजाय मेतेरच्येते बात काल्बेई खुदुक ईन। आदमगी खाबाते पापकी खित्सादु परमेश्वरगी मिओनला दोषी ईन सिन सजाय तेरच्या ओङा ओतान। तर थे खोरोङ दयेकी खित्सादुचेन मिओनगी जतिराङ पाप खाबा ओत्सीनोङ परमेश्वरगी थेबाला पापदुकी टाल्ला दोषी मेन सिरच्या ओङसुङ। 17थोक खाईन मिज्यीगी पाप खाईन थेकी खित्सादु कालगी खादुकी सुङ थारा मुथुप्च्या ओङगीन मि गाङेराङ स्या फाप्च्या ओङा ओतान। तर येशू ख्रीष्टकी खाबाते कामगी खित्सादु परमेश्वरगी आउदी दया खाईन दोषी मेन साबाते मिओनगीचेन नोमुङ मिसिन्च्येते जुनी ङेत्ला येशू ख्रीष्टताङराङ राज्य खिओ।
18थोगी चुक ओङसुङा सासीन मिज्यीगी परमेश्वरगी माकेत साबाते काम खाबेकी खित्सादु मि गाङेकी सजाय ङेत्कीन स्या फापाते ईन। लोक्ला ज्येनज्यीगी परमेश्वरगी खि साबा च्योकराङ खाबेकी खित्सादुचेन मि गाङेकी पापकी सजायदुकी ठाल्ला नोमुङ मिसिन्च्येते जुनी ङेत्च्येते ईन। 19थोक खाईन मिज्यीगी परमेश्वरगी साबाते माङेन्देकी खित्सादु मि काल्बेई पापी ओङाते ईन। लोक्ला ज्येनज्यीगी थेकी साबाते ङेन्देकी खित्सादुचेन परमेश्वरगी मि काल्बेईला दोषी मेन सिरच्येते ईन। 20थोक ईन्सीन परमेश्वरगी मिओनला च्यिला थे खोरोङ नियम बिन्सुङा सिनोङ बात थेन्ग्यो मेन? नियम ओत्सीनोङ थेरू खिता मेङगो साबा साबाराङ खाला झन झन पाप खित्च्याक्वा सिन मिओनगी छ्या स्येस्यीत सिनराङ परमेश्वरगी थे नियम बिन्दा ओतान। दोक खाईन मिओन झन पाप खित्कान गाल्सीनोङ थेबे पाप माफ तेराला परमेश्वरगी थेबाला झन आउदी दया खाबाते ईन। 21थोगी पाप खाबेकी खित्सादु पापकी सजाय भोगे खाला मि गाङे स्या फाप्च्या ओङा ओतान। तर थाचेन परमेश्वरगी दया खाला थेबाला दोषी मेन साला थेबेकी नोमुङ मिसिन्च्येते जुनी ङेत्क्यो। ङुरूङ प्रभु येशू ख्रीष्टकी खित्सादुराङ दोक ओङाते ईन।
Trenutno izabrano:
रोमी 5: JUL
Istaknuto
Podeli
Uporedi
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.