रोमी 10
10
1थेमे आज्यो न्वावे, परमेश्वरगी तेरच्येते पापकी सजायदुकी ङाराङ इस्राएलीओन थारस्यीत सिन ङा आउदी सेम खिओ। थेबेकी थे सजाय भोगे खिता माफाप्स्यीत सिन ङा परमेश्वरताङ प्रार्थना खिओ। 2ईन्दालाचेन थेबा परमेश्वरला माने खित्च्या सिन स्याप स्याप खाला थेकी खि साबा साबा च्योकराङ खिता छोल्कान ईन। थेबेकी दोक खासीनोङ परमेश्वरला माने खिता फापा च्योकराङ खाईन माने खाबातेचेन मेन। 3च्यिला सासीन मिओनला दोषी मेन सिरच्येते काम परमेश्वरते ईन सिन माखोकीन थेबेकी परमेश्वरगी खोपरोङला थोक्ते मि सिओ सिन थेला विश्वास माक्यासुङ। बरू थेबेकी खोपरोङगी खाबाते काम तालाका परमेश्वरगी थेबाला दोषी मेन सिओ सिन परमेश्वर नियमला खि साबा साबा ङेन्दा चाल्सुङ। 4तर ख्रीष्ट दुरू वाबेकी परमेश्वर नियम ङेन्ला मि सुङलाङ परमेश्वरगी दोषी मेन मिसिरो सिरच्येते बात छ्या स्येकीदुक। ख्रीष्टकी खाबाते कामगी खित्सादुकामा परमेश्वरगी मिओनला दोषी मेन सिओ। दि बात पत्ते खाला परमेश्वरला विश्वास खित्कान गाङेला थेकी होथोक्ते मि ईन सिओ।
5थोगी परमेश्वर नियम ङेन्ला दाक्पोनला परमेश्वरगी दोषी मेन सिओ सिरकान्ते मि बात खिन मोशेकी चुक साबा ओते सासीन “परमेश्वर नियमला खि साबाते गाङे साबा साबाच्योक खित्कान्ते मिकीचेन नोमुङ मिसिन्च्येते जुनी ङेत्क्यो,” सिन साबा ओत।#लेवी १८:५ 6परमेश्वरगीराङ खोपरोङला दोषी मेन सिओ सिन थेला विश्वास खित्कान्ते मिओन बातचेन दोक ईन। च्यि सासीन ख्रीष्टला स्वर्गनेई देमा लाला खुलाङाला ख्योकोनगी “था सु स्वर्गने गाल्ला थेला देमा लाला खुलाङच्ये?” सिन सिरा माफाबो। 7थोकराङ खाला ख्रीष्टला स्यिसादुकी सोम्बो लोक्ला खुलाङाला “था सुचेन स्याप्ते मि देत्सामा गाल्ला थेला लाला खुलाङच्ये?” सिनोङ सिरा माफाबो। 8च्यिला सासीन परमेश्वर बातला चुक साबा ओते सासीन “परमेश्वर बात ख्योकोनला बिन्दा ओत। थे बात खेराङ खेकीङ सिरा थुप्क्यो थेमे सेमगी नाङ गुने खिताङ थुप्क्यो,” सिन साबा ओत।#व्यवस्था ३०:१४ थे खोरोङला विश्वास खित्कान्ते मिओनलाकामा परमेश्वरगी दोषी मेन सिओ सिन ङ्योकोनगी मिओनला लोप्कीन ओताते बातचेन होदिराङ ईन।
9थोगी था ख्योकोनगी ज्येनगी दोन्दु येशूराङ छ्ये ईन, थेराङ प्रभु ईन सिन सासीन थेमे परमेश्वरगी थेला स्यिसादुकीङ सोम्बो लोक्पाते बात पक्काराङ ईन सिन पत्ते खासीन पापकी सजाय भोगे खिता माफाबो। 10च्यिला सासीन थेला पक्काराङ विश्वास खित्कान्ते मिओनला थेकी दोषी मेन सिओ। थेमे ज्येनगी दोन्दु प्रभु येशूराङ छ्ये ईन सिन सिरकान्तेबाला परमेश्वरगी पापकी सजाय मेतेरो। 11थोगीराङ परमेश्वर बातला “थेला विश्वास खित्कान्ते मिओनला थेकी नोमुङ ङोचा मोलोङो,” सिन साबा ओत। 12होदि बातओन यहूदी ईन्स्यीत, ज्येन ज्येन जातकी मि ईन्स्यीत मि गाङे लाईदु ईन। परमेश्वर दोन्दु मि गाङे थोजोराङ ईन। थेमे थेबा गाङेते मालिकचेन प्रभु येशू ख्रीष्टराङ ईन। थे खोरोङ छ्य्वापा लै खाला थेला मद्धत नाङ सिरकान गाङेला थेकी आउदी खाला आशी बिन्ला लेमु खिओ। 13थेकी दोक खिओ सिन परमेश्वर बातला “प्रभु छ्य्वापा लै खाला थेला मद्धत नाङ सिरकान्तेबा सुङगीङ सजाय भोगे खिता माफाबो,” सिन साबा ओत।
14थोक ईन्सीनोङ प्रभु येशू ख्रीष्टला विश्वासराङ माक्याबाला सुङगीङ थे छ्य्वापा लै खाला थेत्ताङ मद्धत नाङ सिरा मुथुबो। थोकराङ खाला थे सु ईन्दे, चुक्ते ईन्दे सिन थे बात थोराङ माथोबाला सुङगीङ थेला विश्वास खिताराङ मुथुबो। थोगी थे बात थोबाला सुइँदा लाप्ला तेरकान्ते मि गोसुङ मेन? 15लोक्ला थे बात लोप्कान्ते मिलाङनी थोक खि सिन सुइँदेकी तोङा फाप्सुङ मेनरो? तर थे बात लोप्कान्ते मिओन परमेश्वरगी ताङगीन सिन्दा ओत सिन परमेश्वर बातला “गा लाङच्येते बात लोप्कान्ते मि ओङजीन थोई लेमु ईन्दाका,” सिन साबा ओत।#यशैया ५२:७
16थोक खाईन इस्राएलीओनगी थे बात थोबा ओता ईन्सीनोङ थोकान्तेबा गाङेकी थे गा लाङच्येते बातला नामज्योकराङ मासेत्सुङ। थेबेकी थोक खासुङ सिन यशैयेकी “ए प्रभु परमेश्वर, ङ्योकोनगी साबाते बात गाङेकी थोसीनोङ सुई नामज्योक सेत्सुङारो?” साबाते बातताङराङ डिइओ। 17बात चुक ईन्दे सासीन सुइँदेकी ख्रीष्टकी बात लाप्कीन बिन्नामेई थे थोला मिओनगी येशू ख्रीष्टला विश्वास खित्च्येते ईन।
18बात थोक ईन्सीन च्यि इस्राएलीओनगी थे बात थोबाराङ मेतान ओना? थोक मेन, पक्काराङ थोबा ओतान। परमेश्वर बातला चुक साबा ओते सासीन “थेबेकी लापाते बात सा लुङबा खाङ मिकीराङ थोसुङ। थे बात फैले माक्याबाते ठाउँ सिराते खापाङ मेत,” सिन साबा ओत।#भजन १९:४ 19थे बात थोनामेकीङ च्यि थेबेकी थे बात खोबा मेतान ओना? पक्काराङ खोबा ओतान। गोमानी परमेश्वरगी साबाते बात मोशेकी चुक साला दुका सासीन
“थाचेन ङे ज्येन ज्येन लुङबे मिला ङाराङ मि ईन सिन लेमु खाबा थोङला ख्योकोन डारगी स्यिइओ। ख्योकोनगी छ्याःङ मेस्येकान्ते साबाते
होथोक्ते मिओनगी ङाला सु ईन्दे, चुक्ते ईन्दे सिन छ्या स्येबा थोङजीन ख्योकोनला स्येदाङगी मे बारग्यो,” सिन साला दुक।#व्यवस्था ३२:२१
20परमेश्वरगी साबाते बात खिन यशैयेकीङ ज्यीबाराङ मिक्किता खाईन “ङा चुक्ते ईन्दे सिन छ्याराङ स्येबा मोछोल्कान्ते मिओनगी ङाला छ्या स्येसुङ। थेमे ङे खोजीराङ मिक्किकान्ते मिओनला ङे ङाराङ चुक्ते परमेश्वर ईन्दे सिन छ्या स्ये च्युत्कीन बिन्दा ओत,” सिन साबा ओत।#यशैया ६५:१ 21इस्राएलीओन चुक्ते मि ईन्दे सिन बात खित्जीनचेन परमेश्वरगी साबाते बात यशैयेकी “थेबा ङे साबाते ङेनराङ मेङेन्कान्ते खालि ङात्ताङ स्येदाङकामा खिन देत्कान्ते मि ईन। थेबा थोक्ते मि ईन्सीनोङ ङे थेबाला याङ याङ ङा ओत्सादु स्योक, ङा ख्योकोनला लेमु खिओ सिन ङिङज्ये खिनराङ देतान,” सिन साबा ओत।#यशैया ६५:२
Trenutno izabrano:
रोमी 10: JUL
Istaknuto
Podeli
Uporedi
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.