Hena Waroma 8
8
1Hena lwa iyo tehena ingeriaha wuchili‐wa‐kugwa hena wala weoho ghati ya Kristo Yesu. 2Amu sheria ya Ngoma ya moo ghati ya Kristo Yesu yaniosha esimzoro hena sheria ya ng’oki na ya kifwa. 3Amu kila sheria isiidime kukiareha, amu ya kuoka nana hena muri, Izuwa, ekiingija Mwana wakwe mwenye hena fwana ya muri wa ng’oki, na sa itasi hena ng’oki, aichilia ng’oki ghati ya muri. 4Nesa itanawo la sheria lifishwe ghati yetu, tusisele hena muri, nde hena ngoma. 5Amu wo weoho hena muri wekusara vindu vya muri: kake wo weoho hena ngoma vindu vya ngoma. 6Amu lusaro lwa muri ni kifwa: kake lusaro lwa ngoma ni moo na luworo. 7Amu lusaro lwa muri ni wuzo wanga ya Izuwa: amu toluitoriwa na sheria ya Izuwa, nete kididi toluidima kuitoriwa. 8Na wala weoho ghati ya muri teweidima kumwiseja Izuwa. 9Kake unywi tomuoho ghati ya muri, nde ghati ya ngoma, ije Ngoma ya Izuwa yatua ndeni henyu. Kake ije mundu akeye tenaye Ngoma ya Kristo, ye si wakwe. 10Na ije Kristo eoho ndeni henyu, muri ufwie amu ya ng’oki, kake ngoma ni moo amu ya ngalo. 11Kake ije Ngoma yakwe ula emrushije Yesu kufuma wefwie yatua ndeni henyu, ula emrushije Kristo Yesu kufuma wefwie eneinga moo pia miri yenyu ya kufwa hena Ngoma yakwe yatua ndeni henyu.
12Huwora, wandwetu, uswi tu wasile, si hena muri tuikae hena mikayie ya muri: 13amu ije muikaa hena mikaykie ya muri, tomuna huwo kufwa; kaka ije hena ngoma mwaifwija mihiro ya muri, munekia. 14Amu wose werongojwa na Ngoma ya Izuwa, awa niwo waana wa Izuwa: 15Amu tomuuhie ngoma ya wuzorowa hena fole, nde muuhie ngoma ya kuoshwa waana, henayo tuiya, Abba, Apa. 16Ngoma mwenye eng’ola mburi hamwe na ngoma jetu, ti uswi tu waana wa Izuwa: 17na ije waana, nawa wahoji; wahoji wa Izuwa, na wahoji hamwe na Kristo; ije yaoka ti twawawiwa hamwe naye, nesa turumishwe pia hamwe naye.
18Amu naghamba ti maluwawo ma magheri ama temeinarwa kuringanywa na kirumi kila tunekijughuiwa. 19Amu lunyarki lwa kuyoia kwa kilungiwe lwainda lujughuo lwa waana wa Izuwa. 20Amu kilungiwe kigeriwe si ya luhaya, si hena kukunda kwakyo kijenye, nde hena lwa ula ekigerie si, 21ghati ya luing’idaki ti kilungiwe kijenye kinekijwa pia kufuma wuzoro wa kunyamarika mtano kuingia na esiwuzoro wa kirumi kya waana wa Izuwa. 22Amu twatisiwa ti kilungiwe kyose kidiha na kiwawiwa hamwe mtano iki. 23Na si huwo tiki, nde na uswi wenye pia, tuna lumbulo la Ngoma, mtano uswi wenye tudiha ngoroni hetu, tukiinda kuoshwa waana, lukombolo lwa muri wetu. 24Amu hena luing’idaki tukijijwe: kake luing’idaki lula luyoyiwe si luing’idaki: amu niani eing’idaki kila ekiyoie? 25Kake ije tuing’idaki kila tusikiyoie, niho tukiinda na lugumirio. 26Na huwo Ngoma pia eughenja wunana wetu: amu totutisiwa kuomba sandu ituwe; kake Ngoma mwenye etusembia na madiho mesiidima kutetwa; na ula ejiyoa ngoro etisiwa nikini lusaro lwa Ngoma, 27amu ewasembia weshenete hena kukunda kwakwe Izuwa. 28Na twatisiwa ti hena wala wemkundie Izuwa vyose vyahira hamwe hena vyedi, hawo weitangwa hena kulula kwakwe. 29Amu wala ewatisiwa kuwoka, awa ewaarehia pia kuoka wafwananijwe na mwa ya Mwana wakwe, nesa aoke mbele ghati ya wandu weingi na wandwawo: 30na wala ewaarehie kuwoka, na awa pia ewaitange: na wala ewaitange, awa pia ewaarehie ngalo: na wala ewaarehie ngalo, awa pia ewarumishe.
31Nikinira tutete hena vindu ivi? Ije Izuwa ni wa hetu, niani wanga yetu? 32Ula esimshighie Mwana wakwe mwenye, nde emng’olie hena lwetu wose, nize asituinge pia vyose hamwe naye wesho? 33Niani enewalinganya wasaghurwa wa Izuwa? Ni Izuwa earehia ngalo; 34niani eye enechilia kugwa? Ni Kristo Yesu efwie, ee keba, erushijwe kufuma wefwie, eye eoho ha mkono wa kuume wa Izuwa, eye pia etusembia. 35Niani enetutanya hena lukundo lwa Kristo? wasi, kana luwawo, kana ikinyo, kana nzaa, kana wutuhu, hana ndenga, kana muhandi? 36Sandu itamiwe, hena lwako twakomwa hemusi puti; tutariwe sa maghonji hena kusinzwa. 37Hai, ghati ya vindu ivi vyose tukelie warelela hena ye etukundie. 38Amu niilejike, ti nete kifwa, nete moo, nete malaika, nete mabohio, nete vindu vya ingeriaha, 39nete vindu vya akenya, nete mawuzinya, nete wueza, nete kuforeka, nete kilungiwe kingi akeye, kineidima kututanya hena lukundo lwa Izuwa, elo luoho ghati ya Kristo Yesu Mzuri yetu.
Trenutno izabrano:
Hena Waroma 8: TAVETA
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.