1 Hena Wakorintho 9
9
1Simi nisimzoro? simi mwondo? simboniemi Mzuri wetu Yesu? si unywi ndima yangu ghati ya Mzuri? 2Kwakicha hena wengi mi si mwondo, nde henyu nimi: amu muhuri ya wuondo wangu ni unywi ghati ya Mzuri. 3Viteto vyangu vya kunirinda hena wala wenichilia ni ivi. 4Totuna luidimo lwa kula na kunywa? 5Totuna luidimo kutikana na mche mwitikiji, sa waondo weshighajike, na wandwawo Mzuri, na Kefa? 6Kana mi tiki na Barnaba, totuna luidime kusahira ndima? 7Niani egura ndima ya asikari hena mali makwe mwenye? niani ehanda mizabibu, asile ndunda yakwe? kana niani erisha ifio, asile ma mavee ma ifio? 8Nateta ivi hena mitongie ya wandu? kana sheria teiteta huwo pia? 9Amu itamiwe ghati ya sheria ya Musa, Usimchunge miomo ng’ombe ikibughutua. Izuwa ejirinda mtano ng’ombe? 10Kana ekiteta hena lwetu deng’e? Ee, hena lwetu itamiwe, amu yambe ula eima aime ghati ya luing’i daki, na ula ebughutua, ekiing’idaki kuwona ngata yakwe. 11Tukioka tumuhandie vindu vya ngoma, ni kindu kibaha tukifindika vindu vyenyu vya muri? 12Wengi wekioka na ngata ghati ya luidimo ulu wanga yenyu, si uswi kukela? Kake uswi totuluhirie luidimo ulu; kake twatika vindu vyose, tusiigerie lukindo anjili ya Kristo. 13Tomutisiwa ti wala wevihiria vindu vishenete wela vindu vya hekalu, na wala wekihiria kisiko weshanga na kisiko? 14Na huwo Mzuri eaghanyie ti wala weitinda anjili waikajwe na vindu vya anjili. 15Kake mi sivihirie vindu ivi deng’e: nete sitamami ivi nesa iarehwe huwo hangu: amu keba hangu kufwa, kukela mundu aarehe kukuisisa kwangu kuhaya. 16Amu nikiitinda anjili, sinami kindu kya kukuisisia; amu nasingirijwa; amu wukiwa hangu, nisikaitinde anjili. 17Amu nikiketa iki hena kukunda kwangu mwenye, nina awahache: kake kwakicha si hena kukunda kwangu mwenye, nawikiwa, wurote. 18Na awahache yangu nikini? nikyo, nikitinda anjili, niing’ole anjili isina zora, na huwo nisiluhirie deng’e luidimo lwangu ghati ya anjili. 19Amu nikioka nisimzoro ghati ya wandu wose, nakugera mwenye wuzoroni hena wose, nesa ninete kuwawona. 20Na hena Wayahudi nikaoka sa Myahudi, nesa niwawone Wayahudi; hena wala weoho si ya sheria, sa si ya sheria, nesa niwawone wala weoho si ya sheria; 21hena wala wesina sheria, sa nisina sheria, si nisina sheria hena Izuwa, nde si ya sheria hena Kristo, nesa niwawone wala wesina sheria. 22Hena wanana nikaoka mnana, nesa niwawone wanana: naoka vindu vyose hena wandu wose, nesa niwone hena nzia jose kukija mondo. 23Na naareha vindu vyose hena lwa anjili, nesa nioke mshanganya ghati yakwe. 24Tomutisiwa ti wala wedindika ghati ya stadio wedindika wose, kake mwe euhia awahache? Ni huwo dindikeni, mbone. 25Na mundu ose elelane ghati ya maseko ni wa mng’ana ghati ya vindu vyose. Na wala, nesa wauhie lumerisia lunyamarika; kake uswi lusinyamarike. 26Hena lwa iyo mi nadindika huwo, si sa mwenye kuitalwa; nabighana huwo, si sa mwenye kubigha mruki: 27kake nauwinya muri wangu, na nauete wuzoroni: isioke ngea, nikiidiwa kuwatindia wengi, mwenye nioke wa kusuika.
Trenutno izabrano:
1 Hena Wakorintho 9: TAVETA
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.