1 Hena Wakorintho 14
14
1Ratereni lukundo; kake kundeni muno viingijo vya Ngoma, kake kukela murote. 2Amu ula eteta hena lumi tetetiaye wandu, nde Izuwa; amu tehenaho mundu esikia: kake hena ngoma eteta vya mbiso. 3Kake ula erota ewatetia wandu hena kujengia, na ludindijo, na lughenjo. 4Ula eteta hena lumi ekujengia mwenye; kake ula erota elijengia kanisa. 5Nikundie unywi wose mutete hena malumi, kake keba murote: amu ula erota ni mbaha kukela ula eteta hena lumi, asioke mwenye kugharusha, nesa kanisa liingwe kujengwa. 6Kake ingeriaha, wandwetu, nikimuzia nikiteta hena malumi, ninemuetie mbucha ani, nisioke namutetia hena nzia ya ujughuo, kana ya lutwarijo, kana ya wuroti, kana ya kulosha? 7Mtano vindu visina moo, viking’ola ngori, kwakicha mtorito kana kinubi, vikioka teving’ola kulelana ghati ya ngori, nize kinetisiwika nikini kyabighwa hena mtorito kana hena kinubi? 8Amu lughunda luking’ola ngori isitisiwika, niani enekuarehia hena ngondo? 9Huwo unywi pia, musing’ole na lumi viteto vianguhe vya kutwarija, nize kinetisiwika nikini kyatetwa? amu muneoka mukiutetia mruki. 10Jioho, ngea, mbare nyingi ja ngori masangeni, na tehenaho isina ighonda. 11Huwo nisikatisiwe la kini ighonda, nineoka hena ula eteta mshenzi, na ye eneoka mshenzi hena mi. 12Huwo unywi pia, mukioka mukundie muno viingijo vya ngoma, endeni munete hena kulijengia kanisa. 13Huwo ula eteta hena lumi aombe agharushe viteto. 14Amu nikiomba hena lumi, ngoma yangu yaomba, kake kutwarija kwangu tokuna mbucha. 15Nikinira? nineomba na ngoma, na nineomba na kutwarija pia: ninevina na ngoma, na ninevina na kutwarija pia. 16-17Amu ukitasia hena ngoma, nize ula eikee handu ha ula esina viingijo eneitikija Amen hena kuanjela kwako ikioka tetisiwaye nikini wateta? Amu we kididi waanjela nezo, kake ula ungi tejengiwaye. 18Namwanjela Izuwa, nateta na malumi kukela unywi wose. 19Kake kaniseni nawona keba kashi kuteta viteto visano na kutwarija kwangu, nesa niwaloshe waghenji pia, kukela viteto elfu ikumi hena lumi.
20Wandwetu, musioke waana ghati ya lusaro: kake ghati ya owiwi muoke ngerengere, kake ghati ya lusaro muoke wandu wazima. 21Ghati ya sheria itamiwe, hena wandu wa malumi meingi na hena miomo ya wagheni ninewatetia wandu awa; nete huwo tewenisikiawo, eghamba Mzuri. 22Hena lwa iyo malumi ni hena luwano, si hena wala weitikija, nde hena wesiitikija: kake kurota, si hena wesiitikija nde hena wala weitikija. 23Hena lwa iyo kanisa lose likiwunganyika hamwe, na wose wekiteta hena malumi, na wekiingia wandu wesina viingijo kana wesiitikija, teweneteta ti mwawukwa? 24Kake wose wekirota, na mwe ekiingia esiitikija kana esina viingijo, edewerwa na wose, echiliwa na wose; 25mbiso ja ngoro yakwe jawonyanywa raa; na huwo enegwa wushoni hakwe na enemwomba Izuwa, ekighamba ti Izuwa eoho ghati yenyu kididi.
26Nikinira, wandwetu? Mukiwunganyika hamwe, mundu ose ena lumbo, ena losha, ena ujughuo, ena lumi, ena lugharusho. Vyose viketwe hena kujengia. 27Mundu akeye ekiteta hena lumi, ioke hena weri, kana hena watatu hena kuoka weingi; na hena lukamba; na mwe agharushe: 28kake kwakicha tehena mgharushi, ahuje kaniseni; na akutetie mwenye, na Izuwa. 29Na waroti watete weri kana watatu, na wala wengi watwarije. 30Kake kwakicha ujughuo umzia mwe eikee hala, ula wa kuwoka ahuje. 31Amu mwaidima kurota wose mwemwe, nesa wose waloshwe, na wose wadindijwe: 32Na ngoma ja waroti jaitoriwa na waroti. 33Amu Izuwa si wa limana, nde wa luworo; sa ghati ya makanisa mose ma washenete.
34Wache wahuje ghati ya makanisa, amu awa teweingwawo kughamba kake watumikie, sandu yateta na sheria pia. 35Na kwakicha wekundie kuloshwa kindu, wawawujanye wome wawo kaa: amu ni nguruna hena mche kuteta kaniseni. 36Nikini? Kiokie kufuma henyu kiteto kya Izuwa kizie? kana kimuzie unywi tiki?
37Mundu ekikugheshijia kuoka mroti, kana mundu wa ngoma, avitwarije ivi nimutamia, ti ni aghanyo la Mzuri. 38Kake mundu ekioka tetisiwaye, asitisiwe.
39Hena lwa iyo, wandwetu, kundeni muno kurota, na musiswije kuteta hena malumi. 40Kake vyose viarehike nezo hena mitongie.
Trenutno izabrano:
1 Hena Wakorintho 14: TAVETA
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.