Tànkùt 9
9
Zenu boa tse ben a tsiaṅ nà
1Zenu kut ze ba',
a bèn nkom tse ntom tse sammbàa,
2zenu bèn nzwite tse nyàm, a bèn ntamte
mi ndu',
a bèn nabte se téblé.
3A tum ghafa' tse tse bènnzwi nke nkua'
num tu dù' neṅate
ts'a tusô là, nke ntshob ndù:
4Mèn z'a b'a nkagni là tsho nsen ni.
A tshwèt ntshob ben tse tu yub ke' tsin nà ndù:
5Bin se' njù yàm bàn,
bin se' nu ndu' mi me tamte là.
6Bin tum ntùm kagni,
bin nsi yôge!
Bin zin num manze zenu.
Ngamagte bo nzenu
7Mèn z'a ke ntswit nkùn ngatshabte là
be nsoṅ wag nse' yi num tu wul i,
mèn z'a be ntshobte ngatshùagntù là,
bo be ntshabt'é.
8Kà tshobte ngatshabte, mbwôg ndù
k'a bàn o,
tshobte nzenu, ndèn ndù
a nsi kô o.
9Fà nzenu, a nsi bèn tù' nzenu
ntshùate,
zi'te mèn netsine, a nsi kwi'te
ju z'a lèn nà.
10Nebwôg #Yob 28.28; Yobk. 111.10; Tànk. 1.7Tshùaben b'a neto'te zenu.
nesiaṅte ben nelàn b'a
nezi'te zenu.
11O nsi tshùa njam àm kà lé'njù tsho
yàme,
kà ngu'njù yôg so kwi'te.
12A be z'o b'a ngatshabte là, mb'o nsi bèn ket nge' i
yu tu.
Bà boa tse ben a tsiaṅ nà
13Bà ke mb'a mba ta' mènnzwi ntutntut là,
nkagni z'a ke' lèn sàm ju là.
14A tswe nsi nzendà ba' i,
num diaṅ, num dù' neṅate
ts'a tusô là.
15Num neke ntsiaṅ ba ntshùanze,
tse bo tam manze nke nèn ndaṅndaṅ nà.
16Mèn z'a be nkagni là
tsho nsen ni!
A tshwèt ntshob ben tse tu tshob ke' tsin nà ndù:
17Ntse mi bo yi là fite,
bàn ze mèn be jù nke ndem nà nke ntshùa ntshu ng'é neshu!
18Là, a ke' lèn ndù ben tse yen bà tsiaṅ yub là
b'a ntùm ba ghem ntùm ngô fe ben.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.