Nahum 2
2
1Tshù #Es. 52.7nku ngantum z'a tshwèt
ntshob fite là num ba mbale!
Yuda, a bwô ndù o jù mu njùa,
nzwiagte tsho nka'ni.
Nummbe ngatshùagntù ke nsi bèn tôg
netèl o.
Bo biagt'é matmat.
2Ngabagte dù' lo nsi num o:
Béb yu kàbngô,
béb manze,
taṅ so kob tun o! Lôte mba yu neta be yi là;
3nummbe Tshùaben bèn nte ghamte
Yakob mba ghamte Israél.
Nummbe ghalagte dù' lo lagte yube,
mbiagte nkùa tshobe.
Bo lo' Ninive
4Tshètntsho sa'nde' tshob b'a meba;
ghama' ntsho ket nzwe mediba;
nkalig be mbe se' tùn nke ma' nsa.
A num mbe lé'njù s'a nabte num ntsho là
bo sab nkô.
5Nkalig tshwèt njab nu num manze,
nke ntsham dù' nène;
bo tswe à mba ntswe'nka' là,
bo ke nso nde à mba mbeba'mbaṅ nà.
6A kwimte tse neta benntùn.
Là bo tshwèt mbe zin nke ngwù bag bag ntiage;
bo tshwèt nànte nèn mbaṅ kàbngô,
nke nabte wut netshètte yub njam.
7Nzendà kàbngô ts'a shù nze num nta'ntse là te nge,
ntshwèt kôge.
8Bo lo lo' neto i nèn yi,
ghafa' tse tse bènnzwi tshwèt ntswe mba
mbwoṅtambia' là,
nke ndab ntù yub mbu.
9Ninive b'a mba dù' ze ntse tse'te bwe là,
ndù a dun.
Bin tsine, bin tsine.
Là sàm mèn ke kaṅ wul i.
10Bin lagte nkàb, bin lagte gol.
Tshunkàb nsi ndù a yàm neshu,
tshunkàb tse bo lo' njoṅ ju tanjoṅ fa nabte yi là.
11Bo tshwèt ndagte dù', nke nsate dù'!
Wut tshob, nku kôge,
zwe' nke nja,
ntshù njoṅ benntùn fa lab.
12Ngab ba ngwayit tù' b'a ndùke?
Sen kin bon ngwayit là tù' b'a ndùke?
Me dù à dù' ze ngwayit ke mbe nène,
nzwi i mba mén nke ntswe bwe,
sàm mèn ke be bwe z'a kamt'é là.
13Ngwayit lo ke nsé'te nyàm num bon tse,
nke nyu' ntô nyàm num zwi tse;
a lo ke naṅ nyàm ts'a zwite là ntùm ngab tse,
nke naṅ mbàb ts'a sé'te là ntùm ntô tse.
14Tshùaben tàndà ntsho tshob ndù:
Tshù, me lo nsi num o.
Me nsi ghù nkalig mu kaṅ ntù'
nzembwôge;
bon ngwayit tsho nsi kwù num ntshùag ṅwi.
Me nsi biagte ntsha' ts'o lagte là ntùm ngô;
bo ke nsi bèn ju' nze tsho
ghantum.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.