Osé 4
4
Tshùaben nsi naṅ ntsha tu Israél mba tu Yuda num nefètte lem
1Bon Israél bin ju' ntshob Tshùaben.
Tshùaben ghù kam boa
ba ntùm ngô.
Nummbe mèn nenùn ke' bèn mbe,
kondèn ke' bèn mbe;
nelèn ke bèn mbe ntùm ngô.
2Bo be nkàn mfe netèt bo bo,
nke ntshob tatte bo bo.
Bo be nzwi, bo be njéé, bo be ngù màndà,
bo be mfètte lem,
bo be ndo' lem ntam lem yi.
3A ndùlala ngô nsi tswe à ntùm ntsenyà,
mèn z'a tswe bwe là nsi bi boa nyàm tshwèt,
boa nsaṅ mfe kamànyam;
mba ngontse ts'a dibantse là nsi bite.
Nukebwô ghale'te Nsi
4Nga, kà mènntùn bote sàm mèn,
kà mènntùn tswit nkùn num sàm mèn,
là, Tshùaben tshob ndù a b'a bag wù ngale'te Nsi ze ndùb
bèn mbe tù kame.
5O nsi konte nka mbwôgtshù vù nsi,
mba ngatshob ntshob Nsi nsi konte ze mbaṅ o
tèttswe';
me nsi ghù bo biagte màan Israél.
6Yàm nzwit mèn bi nummb'a ke' bèn ngù nelène.
Bin num ngù nukebwô mbwôgtshù mba tèttswe',
ghale'te Nsi bèn ngù yub a bag ntshùate,
mb'o lagte ntshù' Nsi o là,
mba me yàm nsi lagte bon tsho.
7Bo ghù nukebwô num àm njoṅ yub fa,
me lo' yub ghamte kaṅ tuswe yi;
8bo ke ngù à ntùm nukebwô
yàm nzwit mèn,
yub ghe'te kaṅ nte à num nukebwô tshobe.
9A nsi be mum ngô à ndaṅndaṅ mb'a be num
ghale'te Nsi là;
m'a' tshùa njam ngùninu mi naṅ ntsha tu i,
m'a ghù yi ndaṅndaṅ mba mfa' mi be là;
10bo a' ke njù ke ywèt;
bo nsi ke kale, là ke bwe bon,
nummbe bo ghua' Tshùaben num nekale.
11Ndu' nedùmte
lo' zenu yube.
12Yàm nzwit mèn be ntshaṅ ngame,
nke mbètte ntsha'nga i nu,
nummbe ywèt kat tshag i nesà,
a tsin nesà nkale, nummb'a ke' b'a
mbaṅ Nsi i.
13Bo be nton jule'te Nsi
num tu mbale,
nton tsham nelamte labinda num nkônga
mba tun ntshalone,
nga'lone mba ntùbwe tse netshaṅ tshob bwô neshu là.
A ndùlala a be ze ngonngon tsin kale,
zwi bon tsin ghù màndà là,
14mba me ke nsi naṅ ntsha tu ngonngon tsin
mba bo kat là,
ke tu zwi bon tsin mba bo ghù màndà là lo.
Nummbe bo be nèn boa kattù bènnzwi njamnjam,
nke ton jule'te Nsi boa bènnzwi
tse bo ghù yôg kebwô ntùm ndà nsi là.
15Yuda, a be ze Israél tshwèt nkat là,
kà be fit'é ngwù ntsha!
Ndùlala kà bin nèn dù' nelàn Guilgal, kà bin nko' nèn
Bét-Avèn,
kà bin lo' lén Tshùaben z'a be ntùn nà nkàn mfe yi.
16Israél lo ghù tùntu, mba nzwi mfô z'a be ntùn tu là. Ndonni Tshùaben a' ghù a fèt nenà mum fèn nenà ndùb mba mén njùmbwe là. 17Efraim taṅ tse njam nsi neto, faṅ i là. 18Bo be njoṅ mbe miagte nenu ndu' nto' nekale; bo kô tuswe ntshùa ghamte. 19Fetmbaṅ nsi mem yub ntùm mbàb mi, ndù tuswe ko yub num tshule'te Nsi tshobe.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.