युहन्न 4
4
येसुतेङ् सामरी अमकोल
1युहन्नचे बीमएनो येसुचे य्हक्कोत डबमा स्य्हेङ्जेत्ज्यीम् बप्तीस्मा न्हङ्जेत्टीब मुब पङ्बे तम् फरीसीमाचे थ्येःज्यी। 2(य्हीन्बरीम् येसुचे र्हङ्चेनोम् खल्तेएनो बप्तीस्मा न्हङ्जेत्पल अरेबल, तर थेङ्की डबमाचे बप्तीस्मा पीन्ब मुबल।) 3फरीसीमाचे चु तम् थ्येःज्यी पङ्बे तम् येसुचे खेम्ज्यीम् थेङ् यहुदी प्रदेस् ख्लेथेन्ज्यीम् गालील् प्रदेस्री दोःज्यीम् स्येःबरी डोङ्ज्यी। 4थेङ् सामरीया प्रदेस् तज्यीम् स्येःथोब मुबल। 5येसु सामरीयाकी सुखार् पङ्बे ज्यीद सहर्री दोखजेत्ज्यी। हुजु ज्यीद सहर् याकुब्चे र्हङ्की ज योसेफ्त पीन्बे म्रङ्की रेइरी मुबल। 6हुजुरी याकुब्की इनार् मुबल। ब्रजेत्म ब्रजेत्मम् दुःज्यीम् येसु हुजु इनार्की रेइरी स्य्हुःजेत्ज्यी। हुजु बेलोरी दीन्गुङ् र्हङ्ब तबल मुबल।
7ओसेम् सामरी अमकोल गी यी नाबरी खज्यी। येसुचे थेत सुङ्ज्यी, “ङत यी थुङ्बरी पीनो।” 8थेङ्की डबमाम् चब ग्लुबरी ज्यीद सहर्री य्हर्बल मुबल।
9ओसेम् सामरी अमकोलचे पङ्ज्यी, “थेङ् यहुदी तज्यीम्एनो ङ सामरी अमकोलइ या ग्यम्से खले यी सोल्ब?” (तलेपङ्सम् यहुदीमाचे सामरीमातेङ् चबथुङ्ब अस्य्हेङ्ब मुबल।)
10येसुचे अमकोलत जोहप् न्हङ्ज्यी, “एचे पर्मेस्वर्की बर्दान्तेङ् एत यी र्हीत्पे म्हीत स्येःबल य्हीन्सम् एचेक थेत र्हीत्स्ये मुबल, ओसेम् थेचे एत सोम्बो यी पीन्स्ये मुबल।”
11हुजु अमकोलचे थेङ्त पङ्ज्यी, “लोप्पोन्, थेङ्तेङ्मी यी तेत्पे तङ्लोएनो अरे, ओसेम् इनार्एनो नुप्पल मुब। थेङ्चे खले हुजु सोम्बो यी तेत्ज्यीम् न्हङ्जेत्प? 12थेङ्चे र्हङ्चे र्हङ्त ङ्यीमाइ म्हेम्हे याकुब् बीमाएनो ङ्हच्छ्यङ् म्हेन्ब? चु इनार ङ्यीमाइ अखी म्हेम्हे याकुब्चे स्य्हेङ्जेत्ज्यीम् ङ्यीमात न्हङ्बल य्हीन्ब। ओसेम् म्हेम्हे याकुब्तेङ् थेइ कोलमा ओसेम् सेम्ज्येन्माचेएनो चु इनार् ग्यम्सेनो यी थुङ्ज्यी।”
13येसुचे जोहप् न्हङ्ज्यी, “चु यी थुङ्बलमा जम्मनो देबेएनो फीःस्ये मुब, 14तर ङचे पीन्स्येकी यी थुङ्बलमा खेमेएनो दोःज्यीम् फीःस्ये अरे। ङचे खल्त यी पीन्ब हुजु यी प्योःस्यीनो टीबे म्रुः तस्ये मुब, ओसेम् थेत खेमेएनो अबेबे जीवन् पीन्स्ये मुब।”
15ओसेम् सामरी अमकोलचे पङ्ज्यी, “लोप्पोन्, ङत दोःज्यीम् अफीःबे हुजु यी न्हङ्जेतो, ओसेम् ङ यी नाबरीएनो चुरी खटीअतो।”
16येसुचे थेत, “ङ्यीउ ओसेम् एइ र्हेम्बोत ङ्होत्ज्यीम् बोउ” बी सुङ्ज्यी।
17अमकोलचे, “ङल र्हेम्बो अरे” बी पङ्ज्यी।
ओसेम् येसुचे थेत सुङ्ज्यी, “ङल र्हेम्बो अरे पङ्ज्यीम् एचे देमेन्नो पङ्ज्यी। 18तलेपङ्सम् एल र्हेम्बो ङ्ह तज्यीन्बल मुब, ओसेम् तीन्हम्स्हो एतेङ् बक्च्य टीटीबलेएनो एइ र्हेम्बो अय्हीन्। एचे चु तम् देमेन्नो पङ्बल य्हीन्ब।”
19ओसेम् सामरी अमकोलचे पङ्ज्यी, “लोप्पोन्, थेङ्मी अगम्बक्तक य्हीन्ब टीम्। 20ङ्यीमाइ सामरी म्हेम्हेमाचेम् चु गङ्री पर्मेस्वर्त तेन्ज्यी। तर थेङ् यहुदीमाचेम् पर्मेस्वर्त तेन्बे ग्ला यरुस्लेम् य्हीन्ब पङ्ब।”
21येसुचे थेत सुङ्ज्यी, “ओ अङ, ङत बीस्वास् स्य्हेङो, हुजु बेलो खटीब मुब, एङ्यीमाचे अपत न्ह चु गङ्री न्ह यरुस्लेम्री तोप्स्ये मुब। 22एङ्यी सामरीमाचे खल्त तेन्ब हुजुत अस्य्हे। ङ्यीमाचेम् खल्त तेन्ब हुजुत स्येःब, तलेपङ्सम् मुक्ती यहुदीमा ग्यम्सेनो खब। 23तर बेलो खटीब मुब ओसेम् हुजु बेलो देरे य्हीन्ब, देमेन्लेनो तेन्बलमाचे अपत देमेन्तेङ् आत्मारी तेन्स्ये मुब। चोले तेन्बे म्हीमात पर्मेस्वर्चे म्हइजेत्प। 24पर्मेस्वर् आत्मा य्हीन्ब, ओसेम् थेङ्त तेन्बलमाचे देमेन्तेङ् आत्मारी तेन्थोब।”
25ओसेम् अमकोलचे पङ्ज्यी, “ङत था मुब, मसीह ब्योन्युस्ये मुब (मसीह पङ्बलमी मुक्ती न्हङ्बे ख्रीस्ट् य्हीन्ब), ओसेम् थेङ्चेनो ङ्यीमात जम्मनो तम् स्येःनलजेत्स्ये मुब।”
26ओसेम् येसुचे अमकोलत, “एतेङ् तम् लटीबे ङनो थेङ् य्हीन्ब” बी सुङ्ज्यी।
27हुजु बेलोरीनो थेङ्की डबमा दोःखज्यी, ओसेम् थेङ् अमकोल गीतेङ् तम् लटीबल म्रङ्ज्यीम् थेङ्यीमा तेःङेन् तज्यी। तर थेङ्यीमा खल्चेएनो, “एचे ता म्हइबल?” वुइ “थेङ्चे चु अमकोलतेङ् ता म्हइजेत्पल?” बी अङ्योत्।
28हुजुलीप्चे सामरी अमकोलम् यी नाबे तङ्लो हुजुरीनो ख्लेथेन्ज्यीम् ज्यीद सहर्री दोःय्हर्ज्यी, ओसेम् म्हीमात पङ्ज्यी, 29“खोउ, ओसेम् म्ही गीत च्याको, थेङ्चे ङत ङचे स्य्हेङ्बे जम्मनो लक्मा सुङ्पीन्जेत्ज्यी। थेङ्नो मुक्ती न्हङ्बे ख्रीस्ट् य्हीन्ज्यी वुइ?” 30चु तम् थ्येःज्यीम् म्हीमा ज्यीद सहर् ख्लेथेन्ज्यीम् थेङ्त च्याबरी ङ्यीज्यी।
31हुजु बेलोरी डबमाचे येसुत, “लोप्पोन्, ता पङ्लेनो चबे स्हेः सोलो” पङ्ज्यीम् फ्या लज्यी।
32तर येसुचे थेङ्यीमात, “ङतेङ् चबे स्हेः मुब, हुजु एङ्यीमाचे स्येःबल अरे” बी सुङ्ज्यी।
33होत्तज्यीम् डबमाचे थेङ्यीमा र्हङ्न्हङ् पङ्ज्यी, “थेङ्त खल्चे पङ्लेनो चबे स्हेः बज्यीम् पीन्ज्यीवा स्यीम्?”
34ओसेम् येसुचे थेङ्यीमात सुङ्ज्यी, “ङत पीत्युजेत्पलइ थुः र्हङ्लेनो ब्रबतेङ् थेङ्की लक् टोप् स्य्हेङ्बनो ङइ चब य्हीन्ब। 35एङ्यीमाचे पङ्ब, ‘दवम् बाली मीन्बरी ल ब्ली गेःब, हुजुलीप्चे बाली दुत्प’ तर ङ एङ्यीमात पङ्ब, म्रङ्री ज्यनले च्याको, बाली दुत्परी मीन्ज्यीन्बल मुब। 36बाली दुत्पलचे म्हेला यङ्ब, ओसेम् खेमेएनो अबेबे जीवन् यङ्बरी थेचे बाली दुत्प। हुजुलीप्चे ब्लु ब्लुत्पलतेङ् बाली दुत्पल ङ्य्हीनो बक्च्य तङ्ब। 37तलेपङ्सम्, ‘गीचे ब्लु ब्लुत्प, ओसेम् ल्हो-ल्होचे बाली दुत्प’ पङ्बे तम् देमेन् य्हीन्ब। 38ङचे एङ्यीमात एङ्यीमाचे खेती अस्य्हेङ्बे म्रङ्री बाली दुत्परी पीत्पल मुब। हुजुरी ल्हो-ल्होमाचे खेती स्य्हेङ्बल मुब, थेङ्यीमाचे स्य्हेङ्बे खेती ग्यम्से एङ्यीमाचे अन्न यङ्बल मुब।”
39ओसेम् “ङचे स्य्हेङ्बे जम्मनो लक्मा थेङ्चे ङत स्येत्पीन्जेत्ज्यी” पङ्बे हुजु अमकोलइ तम्चे लज्यीम् हुजु ज्यीद सहर्की य्हक्को सामरीमाचे येसुत बीस्वास् स्य्हेङ्ज्यी। 40होत्तज्यीम् थेङ्यीमा येसुत खतु लबरी खज्यी, ओसेम् थेङ्यीमाचे थेङ्त थेङ्यीमातेङ् बक्च्य स्य्हुःगो पङ्ज्यीम् फ्या लज्यी। ओसेम् थेङ् ङ्य्हीरेत् सम्म हुजुरी स्य्हुज्यी। 41थेङ्की फ्रोइ थ्येःज्यीम् ल्हो-ल्होएनो य्हक्को सामरीमाचे थेङ्त बीस्वास् लज्यी। 42थेङ्यीमाचे हुजु अमकोलत पङ्ज्यी, “देरेम् एइ तम्कीनो थ्येःज्यीम् अय्हीन्, तर ङ्यीमा र्हङ्चेनो थेङ्की फ्रोइ थ्येःबल तज्यीम् बीस्वास् स्य्हेङ्ब। थेङ् देमेन्नो जम्बुलीङ्की मुक्ती न्हङ्बे ख्रीस्ट् य्हीन्ब बी देरेम् ङ्यीमाचे स्येःब।”
येसुचे हाकीम्की जत फेन्न लजेत्पल
43हुजु ग्लारी ङ्य्हीरेत् स्य्हुःब बीसेम् येसु गालील् प्रदेस्क्योर् स्येःज्यी। 44अगम्बक्तमात र्हङ्की ज्यीद सहर्री स्य्हेस अत पङ्ज्यीम् येसुचे र्हङ्चेनो सुङ्बल मुबल। 45थेङ् गालील्री दोःजेत्प बीसेम्, हुजु ग्लाकी म्हीमाचे थेङ्त स्वागत् स्य्हेङ्ज्यी, तलेपङ्सम् यरुस्लेम्री नीस्तार् पर्ब म्हन्दीबरी ङ्यीबे बेलोरी थेङ्यीमाचे येसुचे स्य्हेङ्जेत्पे तेःङेन्की लक्मा जम्मनो म्रङ्बल मुबल।
46येसु देबेएनो गालील् प्रदेस्की काना पङ्बे ग्लारी स्येःजेत्ज्यी। हुजु ग्लारी थेङ्चे यीत अङ्गुर्की नीङ्गु स्य्हेङ्जेत्पल मुबल। हुजुरी कफर्नहुम् सहर्की हाकीम् गी मुबल, थेइ ज नबल मुबल। 47येसु यहुदीया प्रदेस् ग्यम्से गालील् प्रदेस्री ब्योन्खबल मुब पङ्बे तम् थ्येःज्यीम् हुजु हाकीम् येसुइज खज्यी, ओसेम् नज्यीम् स्यीयम्टीबे थेइ जत फेन्न लपीन्जेतो पङ्ज्यीम् थेङ्त फ्या लज्यी। 48येसुचे थेत सुङ्ज्यी, “एङ्यीमाचे तेःङेन्की लक्तेङ् चीन्हमा अम्रङ्गदे ङत खेमेएनो बीस्वास् स्य्हेङ्स्ये अरे।” 49हुजु हाकीम्चे, “प्रभु, ङइ कोल स्यीब बीम ङोन्ग्यम्नो ब्योन्खजेतो” बी पङ्ज्यी। 50ओसेम् येसुचे थेत, “ङ्यीउ एइ ज सोस्ये मुब” बी सुङ्ज्यी। ओसेम् हाकीम्चे थेङ्की फ्रोइत बीस्वास् लज्यी, ओसेम् थे र्हङ्की ग्यम्से य्हर्ज्यी।
51थे ग्यम्री य्हर्टीमम् थेइ योक्पोमाचे थेत खतु तज्यीम् थेइ ज फेन्ज्यी पङ्ज्यीम् स्येत्ज्यी। 52थेचे योक्पोमात, “ङइ ज खजु बेलो य्हङ्से फेन्ज्यी?” बी ङ्योत्ज्यी। थेङ्यीमाचे पङ्ज्यी, “तील दीनी एक बजे य्हङ्से थेत छवचे पीत्ज्यी।” 53ओसेम् येसुचे, “एइ ज सोस्ये मुब” बी सुङ्बे बेलो य्हङ्सेनो ज फेन्बल टीम् बी हाकीम्चे स्येःज्यी। ओसेम् थेतेङ् थेइ दीम्की जम्मनो म्हेम्यमाचे येसुत बीस्वास् लज्यी।
54यहुदीय ग्यम्से गालील्री ब्योन्खज्यीम् येसुचे स्य्हेङ्जेत्पे चु तेःङेन्की लक् ङ्य्हीक्ख्यप् कुनो मुबल।
Trenutno izabrano:
युहन्न 4: WTDG
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2025 by Mother Tongue Translators Society, Nepal Bible Society
and Wycliffe Bible Translators, Inc.
