1 ቆሮ 2
2
1ቴ ኢሺንታን! ታ̈ኒ ጾ̈ሳ̇ ቃሊ̇ን ዪንታ̇̇ብ ሶ̈ላንዳብ ዬይኖምባ̇ራ ቴ ሶ̈ላ ኤራዚንዲኬ ጴች ኤራ ዪንታ̇ ቤይሳሙታ̇ ዬ̈ካ̇ዬ። 2ቴ ዪንታ̇ባር ዎ ኬል̇ባራ ዬሱ̈ስ ክርስቶ̈ሳኬ ኢ ማስቃላ ጋልዳ ሶ̈ቲንታ̇ር ዓይቂኖንፖ ሜላ ባዝ ኣባካር ኤራንዳ ኮያባሴ ጋ̈ራ ዎሳ̇ናዴ። 3ዪ̈ኮታ̇ቦ ቴ ዪንታ̇ባር ዎምባራ ዳ̈ቡርስባርኬ ኢ̈ችባር ዎይሊን ጋንዳሙታ̇ ጋምኢ̇ኔ። 4ቴ ሶ̈ሊንዲኬ ቴ ሳባ̇ኪኖንዳ ቴ ቴ ኤራባርኬ ሜላ̇ ሶ̈ላ ቆይሲሳር ጊዳካ̇ይዶን ጾ̈ሳ̇̇ ኣያ̇ና ዎልቃ̇ ቤይሳሙታ̇ ሶ̈ሊኔ። 5ዪኖ̇ ቴ ዎቲኖንዳ ዪንታ̇ ኣማ̇ኒንዳ ኣሳ ኤሪቲ ጋልዳ ጊዳካይዶን ጾ̈ሳ̇̇ ጋልዳ ኣጚቲ̇ኖ ማቃ̇ምፔ̈ኔ።
ጾ̈ሳ̇ ኤጪቲ
6ዎቲናካሬ ኑ̈ኒ ኣማ̇ናባር ሚ̈ጚኖንቦ ኢንታ̇ብ ማ̈ቃ̇ምፔ̈ኖ ኤራ ቃ̈ላባር ሶ̈ሊ̈ሬ፤ ዪና̇ሬ ኑ ሶ̈ላዚንዳ ዓኒ̇ ሳ̈ዚን ጋል̇ዳ ዎ ኤሪንባራ ዎይ ዉርሲ ጋልዳ ያንዳብ ዎ ዓኒ ኣላሚንቦ ላ ኢ ኤሪንባር ጊዳካ̇ዬ። 7ኑ̈ኒ ሶ̈ላዚንዳ ጾ̈ሲ ኣላሚን ኮቻ̇ናፖ ቲ̈ን ዎ ኬል̇ባራ ኑ ቦንቻ̇ቦ ጌዪ ጊ̈ጊሲኖንዲኬ ኣ̈ቺንታ̇ር ዎ ጾ̈ሳ̇ ሚስጢራ ኤሪን ሶ̈ሊ̈ሬ። 8ዓኒ̇ ኣላሚን ላ̈̇ን ጋርታ̇ፖ ዓና̇ ጾ̈ሳ̇̇ ኤሪን ኤሪኖ ኦ̈ናካር ባዬ̇፤ ኢንቲ̇ ዎን ዪኖ̇ ኤሪኖኮ ቦንቺንቲ̇ኖ ጎዳ ሶቲ̇ባ̈ስዶ̈ን። 9ማ̈ቂ̇ናካሬ ጌ̈ሻ̇ ማጻ̈ፋ ጋልዳ፥
“ኣሳ ኣ̈ፊ ቤቃካ̇ዮን፥
ኣሳ ዋይ ሲስካካ̇ዮን፥
ኣሳ ቡ̈ዳ ጋርታ ቆፒ̇ንታ̇ካ̇ዮን፥
ጾ̈ሲ̇ ፌ ካዝ ኣሳንቦ ጊ̈ጊሲኔ” ጌይሬ።
10ዎቲናካሬ ጌ̈ሚቲኖ ባዛን ጾ̈ሳ̇̇ ፌ ኣያ̇ናባራ ኑ̈ቦ ፋላ̇ ጋልዳ ኬሳ̇ር ቤይሲኔ፤
ጾ̈ሳ̇̇ ኣያ̇ና̈ዲ ሜላ ኣቲ̇ን ኦ̈ናካር ኤራንዳብ ዳንዳኢባ̈ሶ ጾ̈ሳ̇̇ ባዝ ኣታካ̇ይ ዎይ ባዝ ቤቂ̇ ዲጚ̈ሬ። 11ኣሳ ጋርታ̇ ዎ ቆፊ ኢ ና̈ሳ ፌ̈ብ ኤሪ̈ርዶኬ ሜላ ኦ̈ናካር ኤሪዝ ኣሲ ባዬ። ዪና̇ ኢዝፌ̈ኒ ጾ̈ ቆፊንዶ ጾ̈ሳ̇̇ ኣያ̇ና ኤሪ̈ርዶኬ ሜላ ኦ̈ናካር ኤራንዳብ ዳንዳኢባ̈ሴ። 12ጾ̈ሳ̇̇ ጋልዳፖ̇ ኑ̈ብ ሜላ̇ ኢሚ̇ንቲ̇ኖ ባዛን ኣብዝኮ ኑ̈ኒ ኤራምፔ̈ኒ ጾ̈ሲ̇ ኑ̈ቦ ፌ ኣያ̇ና ኢሚ̇ዶኬ ዓኒ̇ ኣላሚን ጋልዶ ኣያ̇ና ኑ̈ብ ኢማ̇ካ̇ዬ። 13ኑ̈ኒ ሶ̈ላዚንዳ ኣሳ ጋልዳፖ̇ ኤኪ̇ኖ ኤራባር ጊዳካ̇ይዶን ጾ̈ሳ̇̇ ኣያ̇ና ጋልዳፖ ታማ̈ሪኖ ቃ̈ላ ሶ̈ሊ̈ሬ። ጾ̈ሳ̇̇ ኣያ̇ና ጋልዳፖ ቤንታ̇ዝ ኪን ቲሚርቲ̇ንዶ ኑ̈ኒ ጾ̈ሳ̇ ኣያ̇ና ጋልዳፖ ቤንቲ̇ዝ ቃ̈ላባር ታማ̈ርሲ̈ሬ። 14ጾ̈ሳ̇ ኣያ̇ና ኢ ጋልዳ ባዮ̇ ኣሲ ጾ̈ሳ̇ ጋልዳ̇ፖ ኢሚ̇ንቲ̇ዝ ባዝ ኤካ̇ንዳ̇ብ ዳንዳኢባ̈ሴ። 15ጾ̈ሳ̇̇ ኣያ̇ና ኢ ጋርታ ዎ ኣሲ ዎይ ባዝ ቤቂ̇ ማራማ̇ሪ ኤሪ̈ሬ፤ ዎቲናካር ኢያ ኣሲ ኦ̈ናካር ማራማ̇ራር ኤራንዳብ ዳንዳ̇ኢባ̈ሴ። 16ዪ̈ዳሬ፥
“ጎዳ ቆፋ ኦ ኤራንዳ̇ብ ዳንዳኢ̈ራ?
ኢያ ዞራንዳ̇ብ ዳንዳ̇ኢዛ ኦ̈ኖ?” ጋ̈ሪ ጻ̈ፊንቲ̇ኖንዲፌ̈ኔ። ዎቲናካር ኑ̈ኒ ክርስቶ̈ሲ ቆፓ̇ዚንዲፌ̈ኒ ቆፒ̈ሬ።
Trenutno izabrano:
1 ቆሮ 2: ኦጫ̈ቃማ
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi