1 ቆሮ 1
1
1ጾ̈ሳ̇̇̈ ቆፊንዲፌ̈ን ዬሱ̈ስ ክርስቶ̈ሳብ ሃዋ̈ራ ማ̈ቃ̇ምፔ̈ን ጼይጊንቲ̇ኖ ታ ጳውሎ̈ሳፔኬ ኑ ኢሻ ሶ̈ስቲና̈ሳፖ̈ ጻ̈ፊ ሚሺኖ ኪ̈ታ፤
2ቆሮንቶ̈ሳ ካታማ ጋርታ ዎ ጾ̈ሳ̇̇ ዎ̈ሳ ኬ̈ንቦ፥ ዬሱ̈ስ ክርስቶ̈ሳባር ዎል ፔታ̇ን ማ̈ቃ̇ምፔ̈ኒ ጾ̈ሲ̇ ዪንታ̇ ቆሪ ኬሲ̇ኖንኬ ጺላ̇ ማ̈ቃምፔ̈ን ጼይጊኖንቦ፥ ማ ዪና̇ ኢዝፌ̈ን ዱማ ዱማ ቤሳ̇ ጋል̇ዳ ኢንታ̇ብኬ ኑ̈ቦ ጎድ ማ̈ቂ̇̈ኖ ኑ ጎዳ ዬሱ̈ስ ክሪስቶ̇̈ሳ ሱምን ጼይጊዛን ዎይንቦ፥
3ጾ̈ሳ̇̇ ኑ ባ̈ባ̈ፔኬ ኑ ጎዳ ዬሱ̈ስ ክርስቶ̈ሳ ጋልዳፖ ኢ ኮሺቲንዲኬ ሳሪቲን ዪንታ̇̇ብ ማ̈ቆ̇።
ጾ̈ሳ̇ቦ ሺ̈ቂኖ ጋላታ
4ጾ̈ሳ̇ዲ ዬሱ̈ስ ክርስቶ̈ሳ ጎዪባራ ዪንታ̇̇ብ ኢሚ̇ኖ ኣያ̇ና ኪልሲንኮታ̇ቦ ታ̈ኒ ዎይ ጋላስ ጾ̈ሳ̇̇ ጋላታ̈ሬ። 5-6ኑ̈ኒ ክርስቶ̈ሳ ባዝ ዪንታ̇̇ብ ማርኪ̇ቲኖንዳ ዪንታ̇ ጋርታ̇ ሚ̈ጚኖኮታ̇ቦ ዪንቲ̇ ዎይ ባዝባራ ሶ̈ላባር ማ̈ቂን ኤሪቲ̇ባራሬ ክርስቶ̈ሳ ጎይባራ ዱር ማ̈ቂ̇ኔ። 7ዪዚ ዪንቲ̇ ኑ ጎዳ̇ ዬሱ̈ስ ክርስቶ̈ሲ ማ̈ቂ̇ ዬ̈ዚን ና̈ጊ ሙታ̇ ዶኣምባራ ጌሻ̇ ኣያና ኢሚ̇ዝ ኪልሲ̇ን ጋርታፖ ፔቲ̇ ባዛር ዪንታ̇̇ብ ዲሪጚባ̈ሴ። 8ኑ ጎዳ̇ ዬሱ̈ስ ክርስቶ̈ሲ ማ̈ቂ̇ ዬ̈ዚምባራ ዪንቲ̇ ዬ̈ላ̇ቤዪ ማ̈ቃ̇ር ቤንታምፔ̈ኒ ኢ ዪንታ̇ ዉርስን ዬሊ̇ዝ ዲራስ ሚ̈ጛር ዶኣምፔ̈̇ን ዎቲ̈ሬ። 9ጾ̈ሳ̇̇ ናኣ ኑ ጎዳ̇ ዬሱ̈ስ ክሪስቶ̇̈ሳባር ፔቲ̇ቲ ዪንታ̇ብ ዶኣምፔ̈ን ዪንታ̇ ጼይጊኖ ጾ̈ሳ̇̇̈ዲ ኣማ̇ኒንቲ̇ኖ̈ዳ።
ኣማ̇ኒኖ ኣሳን ጊ̈ዳ̇ ፋጊቲ ዶኣንዳ̇ብ ኮሺባ̈ሴ
10ቴ ኢሺንታ̇ን! “ፋጊቲ ዪንታ̇ ጊዳ̇ ዶኣፖ̇፤ ዪንቲ̇ ዎይን ዎልኣ ፔቲ̇ ቡ̈ዳባርኬ ፔቲ̇ ቆፊባር ሚጛር ዶኢብቴ” ጋ̈ራ ኑ ጎዳ̇ ዬሱ̈ስ ክርስቶ̈ሳ ሱምምባር ቴ ዪንታ̇ ጌሻ̈ሬ። 11ቴ ኢሺንታ̇ን! ዪንታ̇ ጊዳ̇ ጎይሊ ዎን ታ̈ኒ ቃሎ̈ኣ ኣ̈ሎ ኣሳን ጋልዳፖ ሲስኪ̇ኔ። 12ዪና̇ሬ ዪንታ̇ ጊዳ ፔታ̇ና̈ዲ “ታ̈ኒ ጳውሎ̈ሴዬ” ጌይን፤ ሜላ̈ዲ “ታ̈ኒ ኣጵሎ̈ሴዬ” ጌይን፤ ሜላ̈ዲ “ታ̈ኒ ጴ̈ጥሮ̈ሴዬ” ጌይን፤ ማ ሜላ̈ዲ “ታ̈ኒ ክርስቶ̈ሴዬ” ጌይሬ። 13ናኢቶ ክርስቶ̈ሲ ዪኒፌን ፋጊንቲ̇ና? ጳውሎ̈ሲ ዪንታ̇ ጊሻ̇ብ ሶቲ̇ንቲ̇ና? ዎይ ዪንቲ̇ ጻማ̇ቂንቲ̇ኖ̈ዲ ጳውሎ̈ሳ ሱምባሪያ? 14ታ̈ኒ ቄርስጶሳኬ ጋ̈ዮ̈ሳ ጻማ̇ቂንዶኬ ዪንታ̇ ጋርታፖ ሜላ̇ ኣስ ኦ̈ናካር ጻማቃካዮኮታ̇ቦ ቴ ጾ̈ሳ̇̇ ጋላታ̈ሬ። 15ዪዚ “ታ̈ኒ ጳውሎ̈ሳ ሱምባራ ጻማ̇ቂን̇ቲኔ” ጋ̈ሪ ሶ̈ላ̇ንዳብ ዳንዳ̇ኢዝ ኣሲ ባዬ̇። 16(ታ̈ኒ ኢስጣፋ̈ኖ̈ሳ ኣ̈ሎ ኣሳን ጻማ̇ቂኖንዳ ኪን፤ ዪንፖ ሜላ ታ̈ኒ ጻማ̇ቂኖ ኣሲ ዎን ታ̈ብ ኤልቅ ጋ̈ባሴ።) 17ክርስቶ̈ሲ ታ̈ና ኪ̈ታ̇ር ሚሺኖንዳ ዎጛላ ሳባካኒፌ̈ንዶኬ ቴ ኣስ ጻማ̇ቃምፔ̈ን ጊዳካ̇ዬ፤ ክርስቶ̈ሲ ማስቃላ ጋልዳ ዓይቂ̇ኖንዳ ሜላ̇ ኣታ̇ካይፌ̈ኒ ታ̈ኒ ጾ̈ሳ̇ ቃ̈ሊን ታማ̈ርሳ̇ዚንዳ ታ ኣሳ ጋልዳፖ ዬይኖ ኤራባር ጊዳካ̇ዬ።
ጾ̈ሳ̇̇ ኤሪቲ
18“ክርስቶ̈ሲ ማስቃ̈ላ ጋ̈ልዳ ዓይቂ̇ኔ” ጋ̈ዝ ሶ̈ሊንዳ ዪዝ ኣሳንቦ ቦ̈ዛ ባዝፌ̈ን ፋይዲንታ̈ሬ፤ ዎቲናካር ኑ̈ቦ ፋጺዛንቦ ጾ̈ሳ̇ ዎልቃ።
19“ታ̈ኒ ኤጫን ኤጪቲን ይሳ̇ንዳ፤
ዎይሊን ኤራ ኢንታ̇ብ ዎ ኣሳን ኤሪን ኢንታ ጋልዳፖ ዲንሳ̇ንዳ”
ጋ̈ሪ ጌ̈ሻ ማጻ̈ፋ ጋልዳ ጻ̈ፊንቲ̇ኔ።
20ኤራ ጌይንቲ̇ዝ ኣሲ ዎይዲ ዎ̈? ታማ̈ራር ኤሪኖ ኣሳን ዎይዲ ዎ? ዓና̇ ኣላሚን ጋልዶ ባዝ ዎይ ኤራንዳብ ዋ̈ዪዛን ዎይዲ ዎ? ጾ̈ሲ ዓና̇ ኣላሚን ጋልዶ ኤሪን ዳሻ ማቃምፔን ዎታካ̇ያ? 21ኣሲ ፌ ኤራባር ጾ̈ሳ̇ ኤራንዳብ ዳንዳኣካይፌ̈ኒ ጾ̈ሲ ፌ ኤራባር ዎቲዴ። ዎቲናካሬ ኣሲ ቦ̈ዛ ባዝፌ̈ን ፋይዲኖ ኑ ሳባ̇ኪኖ ቃ̈ሊምባ̇ራ ኣማ̇ኒዝ ኣሳን ፋንዳቦ ጾ̈ሲ̇ ዶሲዴ። 22ኣይሁዳን ታ̈ሚ̇ራታ ቤቃ̇ዳብ ኮዪ̈ሬ፤ ግሪ̈ካ ጋዶ̇ ኣሳን ማ ኤራ ኮዪ̈ሬ። 23ኑ̈ኒ ዎቲናካሬ ክርስቶ̈ሲ ኑ ጊሻ̇ብ ሶቲንቲ̇ኖን ሳባ̇ኪ̈ሬ። ዪና̇ሬ ኣይሁዳንቦ ኣማ̇ናካይፌ̈ን ዎቲዝ ፊዬ ማ ግሪ̈ካ ኣሳንቦ ዳሺቲ። 24ዎቲናካር ጾ̈ሲ ፌ̈ክ ጼይጊኖ ኣይሁዳር ማ̈ቆ̇ ግሪክ ኣሳር ማ̈ቆ̇፥ ዪንቦ ክርስቶ̈ሲ ጾ̈ሳ̇ ኤራኬ ጾ̈ሳ̇ ዎልቃ̇። 25ጾ̈ሲ̇ ዳሻባዝ ኦ̈ኖ ማይጻዚንዳ ኣሳ ኤራፖ ሺ̈ሬ፤ ጾ̈ሳ̇̇ ኦ̈ሳ ጋርታ̇ፖ ጊላ̇ ማይጻር ቤንታ̇ዚንዳ ኣሳ ጴች̇ ዎልቃ ጋ̈ዚምፖ̇ ሺ̈ሬ።
26ቴ ኢሺንታን! ጾ̈ሲ ዪንታ̇ ጼይጋምባ̇ራ ዪንቲ̇ ኣፌ̈ኖ ኣስኮ ቆፒ̇ብቴ፤ ኣሳ ቆፊ̈ፌ̈ኒ ዪንታ̇ ጋርታ̇ፖ ዎይሊንን ኤጫ ጊዳካ̇ዬ፤ ዎይሊንን ዎልቃባሮ ሚንን ጊዳካ̇ዬ፤ ዎይ ካ̈ቲንት ዜር ጋርታ̇ፖ ዬሊንቲ̇ኖን ጊዳካ̇ዬ። 27ጾ̈ሲ ኤጫ ኣሳን ዬ̈ሊ̇ንዳቦ ጋ̈ሪ ዓኒ ኣላሚን ጋልዳ ዳሻ ጌዪ ፋይዲንቲ̇ዝ ኣሳን ማራ̇ጺዴ፤ ዎልቃባሮን ዬ̈ሊ̇ንዳቦ ጋ̈ሪ ዓኒ ኣላሚን ጋልዳ ላ̈ፋን ማራ̇ጺዴ። 28ጾ̈ሲ ዓኒ ኣላሚን ጋልዳ ዎ ጌዪ ኤሪንቲ̇ኖ ባዮ̇̈ዲፌ̈ን ማሃንዳ̇ቦ ኣላሚን ጋልዳ ኣሳ ኣፊታ ቤንታ̇ካዮ ዬ̈ልቃ̇ርኬ ሌቂንታ̇ር ዎ ኣሳን ማራ̇ጺዴ። 29ዪኖ ኢ ዎቲኖንዳ ኣሲ ኦ̈ናካር ጾ̈ሳ̇̇̈ ቲ̈ን ጋርታ ኬርፋካ̇ዮ̈ዲፌ̈ኒዬ። 30ጾ̈ሲ ዎቲናካር ዪንታ̇ ዬሱ̈ስ ክርስቶ̈ሳባር ፔታ̇ን ማ̈ቃ̇ር ዶኣምፔ̈ን ዎቲዴ። ጾ̈ሲ ዬሱ̈ስ ክርስቶ̈ሳ ኑ̈ቦ ኤሪቲ፣ ጺሊ̇ቲ፣ ጌ̈ሺ̇ቲኬ፣ ኑ̈ና ፌ ሱ̈ባር ዎዚዛ ማ̈ሲዴ። 31ዪዚ ጌ̈ሻ̇ ማጻ̈ፋ ጋልዳ ጻ̈ፊንቲ̇ኖ̈ዲፌ̈ኒ “ኬርፊዝ ኣሲ ጾ̈ሳ̇̇̈ባር ኬርፋጋ̈ቤ።”
Trenutno izabrano:
1 ቆሮ 1: ኦጫ̈ቃማ
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi