YUNUS 2
2
Sembayang Yunus Luk Maré Ubur
1Idi Yunus nesembayang inan Tuhan Allah, bang batek lawid ineh, kesembayangneh,
2“O Tuhan, bang susa'ku ui nenawar Namu,
idi Iko nengua' sembayangku.
Rat bang su luk inan até ui nenawar mutuh pedengan,
idi Iko neninger tawarku,
3Iko nenala' negku,
uned ribaruh abpa' rayeh,
idi ui uned awerneh;
idi ributmu luk metueh pa luunku.
4Kebalaku, “Ui pangeh tila' rat pa kiungMu,
kudeng apeh ui miak nier ruma'Mu luk meligan ineh teh.
5Idi abpa' nengereb negku,
idi nengened negku,
idi uduh luk bang abpa' rayeh nebelilid luun uluhku.
6Idi ui nepetarem pad macing puet ribaruh,
luk bang tana' luk inan tanga' luk pinasek macing ruked-ruked.
Iamo' Iko, O Tuhan Allahku,
nengalap negku rat bang ribaruh ineh.
7Kareb niatku lélé meputut,
idi ui nengerawé Namu O Tuhan,
idi sembayangku nacing Namu, bang Ruma'Mu luk meligan.
8Ideh luk sembayang inan akangdeh luk na ulek,
pangeh nenecan Namu,
9Iamo' ui miak menani ngubur Namu;
ui miak maré aceh baré Namu,
ui miak nganau' luk pangeh pijani'ku.
Ulun miak macing ratnan Tuhan!”
10Idi Tuhan nepebala inan lawid ineh, idi ieh nenguta' ni Yunus luun tangeb.
Trenutno izabrano:
YUNUS 2: BLD
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
BALA LUK DO' Lun Bawang Bible © The Bible Society of Malaysia 1982, Second Edition 1998.