YEHISKIEL 47
47
Arur Luk Manud Rat Bang Ruma' Allah
1 #
Sek 14.8; Yah 7.38; Lin 22.1 Lemulun ineh nenguit negku lemubed amé' munung tanga' Ruma' Allah. Rat pa liang tanga' ineh abpa' manud amé' pa busat aco. Idi Ruma' Allah petutup ku ineh. Ieh manud lemaba maya' pa kabing busat aco bubpun ineh. 2Pangeh ineh lemulun ineh nenguit negku remuat rat bang su luk inan Ruma' Allah maya' tanga' luk pa tinueh busat aco idi nenguit negku macing nan tanga' luk petutup ku busat aco. Aceh arur manud lemaba pa kabing busat aco tanga' ineh. 3Dengan rukudneh luk ku nari, lemulun ineh nenari 250 depeh amé' pa lod, pa busat aco. Idi ieh nengecuk negku guta abpa' su ineh. Abpa' ineh pad bangil mo'. 4Ieh nenari 250 depeh teh, idi abpa' ineh pad aleb mo'. Ieh nenari 250 depeh teh, idi abpa' ineh pad awa'. 5Ieh nenari 250 depeh teh idi arur ineh pelaba dalem, pad ui na miak guta maya' ineh. Miak lemangui mo'. 6Kebalaneh negku, “O lemulun, ngerawé do'-do' ratnan ini.”
Idi lemulun ineh nenguit negku amé' tangeb arur ineh, 7idi kareb ui nacing, ui nekali' mula' lawa kayuh tangeb abpa'. 8Kebalaneh negku, “Abpa' ini manud lemaba tana' luk pa busat aco macing nan Raked Yarden idi Abpa' luk Mepaci'. Kareb ieh semuet bang Abpa' luk Mepaci' ieh nganau' abpa' ineh meligan. 9Su apeh inan abpa' ini manud inan raput-raput pung idi lawid. Arur ini miak nganau' Abpa' luk Mepaci' meligan. Su apeh inanneh manud ieh ngacing ulun. 10Ratnan Bued Abpa' Enggedi macing nan Bued Abpa' Eneglaim inan lun luk ngerabat lawid tangeb abpa' ineh. Ideh miak midang rabatdeh. Inan raput-raput lawid mepad kudeng luk bang Abpa' Rayeh. 11Iamo' abpa' luun tana' payeh idi takung luk tangeb abpa' rayeh na mangun meligan. Ideh mangun ku su luk inan ticu'. 12Pekop tangeb arur ineh inan raput-raput lawa kayuh luk maré akan. Dondeh na melayuh, idi na ideh ugka' kebua'. Ideh inan bua' luk mebaruh anid-anid bulan, ngaceku ideh mebubpur ku arur luk manud ratnan Ruma' Allah. Lawa kayuh ineh maré akan, idi dondeh ku ubat.”
Lakan-Lakan Tana'
13Kebala Tuhan Allah, “Ini lakan-lakan tana' luk uen mabpat kuan pulu' dueh pupu. Idi pupu Yusup mo' ngalap dueh babpat. 14Ui pebulung nan tepun muyuh idi nepejani' maré tana' ini kuandeh. Do' ieh uen mabpat kuan muyuh.
15“Lakan tana' luk pa tinueh busat aco maya' pa busat aco rat Abpa' Rayeh macing nan bawang Hetlon, Ruan Hamat, bawang Sedad, 16bawang Berota, idi Sibraim (luk arang imet Damsik dengan imet Hamat), idi bawang Tikun (luk iring lakan tana' imet Hauran). 17Lakan tana' luk pa tinueh busat aco maya' rat Abpa' Rayeh macing nan bawang Enon luk pa busat aco dengan babpat Damsik idi Hamat luk iring lakan tana' luk pa tinueh busat aco.
18“Lakan tana' luk pa busat aco maya' rat arang bawang Damsik dengan bawang Hauran. Abpa' Yarden mangun ku lakan tana' arang tana' Israil pa acep aco, idi Giliad pad busat aco, macing nan Bawang Piasau déi' Abpa' luk Mepaci'.
19“Lakan tana' luk pa kabing busat aco amé' pa lod busat aco rat Bawang Piasau macing nan takung Kadis, idi amé' pa dayeh busat aco maya' lakan tana' Masir macing nan Abpa' Rayeh.
20“Lakan tana' luk pa acep aco, ieh ineh Abpa' Rayeh macing pa tinueh busat aco, ieh ineh inan aceh bawang luk pa acep aco Ruan Hamat.
21“Do' mabpat tana' ini kuan pupu muyuh; 22ineh mangun ku babpat muyuh luk meruked. Pupu baken luk tudo arang muyuh idi luk inan anak luk tinganak su ini miak ngalap babpat tana' kareb muyuh mabpat ineh. Do' ideh mepad kudeng lun Israil luk nala' udi idi ngalap babpat tana' dengan pupu Israil. 23Anid-anid burur lun pupu baken miak ngalap babpatdeh dengan pupu luk inandeh tudo. Ui ini Tuhan pangeh nepebala.”
Trenutno izabrano:
YEHISKIEL 47: BLD
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
BALA LUK DO' Lun Bawang Bible © The Bible Society of Malaysia 1982, Second Edition 1998.