Zimbazi 14
14
1Ne zikaya ziwezaga swanu so mahala go mucekulu.
Ninga wulele wuzihodangaga.
2Weze mwihuwilwa, akuno wukulajila cogopo cako
kuli Muwaha Mulungu.
3No widunhumuzi wo munhu mulele,
wumupelaga wulonji winji.
Ninga zinghani zo munhu we mahala, zimukamisaga.
4Hono hawe hasina ng'ombe zo kukwega lisili,
madongha gako gowa gasina cinji.
Ninga u winji we ndudula, wulajilaga vyono
ng'ombe ko zili.
5U muhomelezi mwihuwilwa,
si kalongaga wulambi yaye.
Ninga mono si mwihuwilwa,
si kalongaga cinji, langa zo wulambi du.
6Ne wanhu wedunhumuzi,
si watugaga mahala yaye.
Ninga wono wezuce,
weyijizaga mbela mbela.
7Wilegaje kuli i wanhu walele,
hambi nha wasina cinji cono wosuma kukwijiza.
8Alo nhawule mono yena wizuce kawezaga yena mahala?
Ku soko vyono mwene, yamanyile zono yakwituma.
H amba nhawule munhu mulele nayo, kawa yasina mahala?
Ku soko vyono nayo yakwiwona yamanyile.
9Ne wanhu walele, na hono wetume wubi,
hamba si wacelelelaga yaye.
Ninga we mahala, walondolaga wunenelwe.
10Wusangalale, wo wako.
No wusungu, nawo wako.
Hasina hamba yunji mono mohanga nayo muli zizo.
11Ne kaya yo munhu muswanu yikalaga yimile du,
lono kaya yo munhu mubi yakondya kumwagulwa.
12Ne nzila yono wukwihwesa yo nzila swanu,
kumbe yo nzila yono yokutegula kwi'fwa.
13Nalo luseko luhundikaga wukalale.
Ninga kolo nyemo yikuwuka,
wukalale wuwezaga vyo wuli baho du.
14Nawo i wanhu wabi, wopegwa wulipicizwe wawo.
Nawo i wanhu waswanu,
wohumbilizwa nha vyono genha metumo gawo.
15U munhu mulele, kehuwilaga zinghani zose.
Ninga i wanhu we mahala,
wayilanjililaga muno i mijendele yawo.
16I wanhu we mahala,
welanjililaga walece kwinjila mu wubi.
Ninga i walele, wajendaga wedunhumuye wasina mahwele.
17Ne wanhu wono wena likuwo lyono lyakaga musunho,
wetumaga nghani za wulele.
Ninga we mahala wekalaga wapolile.
18I walele, wohala zo wulele wawo.
Ninga we mahala, wohumbilizwa wizuce.
19Nawo i wanhu wabi,
wolofugama ha mwande ya we ling'ani,
no kulomba wendezwe wawo.
20Munhu muciwa, yakuwa kusulwa ne wanhu wose,
sunga ne wekalani wayagwe wose.
Ninga i wagoli wendigwe na wanhu wenji.
21Ninga hono wusace kuwa no wusangalale,
ale wuwendaje waciwa.
Kanyhi wumanye vyono wubi lono kuwabedegala wayago.
22Na hono wuwe wukwituma viswanu, kotuga lilumbo,
no kwitumbilwa ne wayago.
Ninga hono wuwe wukwituma zimbi, ale, wukusutya.
23Wuhidimbale kwituma milimo, nagwe kotuga cambuzi.
Ninga hono wuwe wikaye du wina mulomo, kowa muciwa.
24Ne wanhu we mahala, wahumbilizwaga sawo.
Ninga i walele, wamanyicilaga mu wulele wawo.
25Nayo muhomelezi,
kaponyaga wumi hono yalonje ze mbeka.
Ninga hono yalonje zo wulambi,
yakuwasonjeza wanhu.
26Na mu cogopo co Muwaha Mulungu, mo mo wuli
witumbilo, no wucitilwe wo munhu, na we mhuga yakwe.
27Hono wuwe kusaka kwilega lifwa, yikunojeye wuwe
ne cogopo kuli Muwaha Mulungu, mono yo muvwilo wo wumi.
28Ne lilumbo lyo mutemi lili mu winji we wanhu
wono yatemile. Ninga hono yawe ne wanhu wacefu,
wutemi wakwe wukuwa wa bwete.
29Munhu we mahala,
si yakuwa kukolwa ne likuwo musunho.
Ninga hono wuwe kukolwaga ne likuwo mbela,
alu agwe wukwilajila vyono wuli mulele.
30No mulamu wa mu nhumbula,
wuwunozaga muwili wuwa muswanu.
Ninga wivu, wihwanile lilonda libi.
31Na hono wuwewonele waciwa,
wukumutovula Mulungu mono yawawumba.
Ninga mono yakuwawonela lusungu waciwa,
yuyo yakumukumya Mulungu.
32I wanhu wabi,
weletelaga lifwa weneco ku soko yo wubi wawo.
Ninga i wanhu waswanu,
wena witumbilo sunga ko ku wufwe wawo.
33Ne mahala gekalaga mu mahweso gose go
munhu mono yena wizuce.
Ninga i walele, si wazimanyile ze mahala yaye.
34Ling'ani yinozaga likungugo liwe ne 'lumbo.
Ninga wubi, co cevu ciwaha kuli makungugo gose.
35I watemi nawo,
wendezwaga ne wetumami wono wakwituma no wizuce.
Ninga wakuwa kuwalipiciza wono milimo yikuwafutila.
Cigogo Bible © Bible Society of Tanzania, 2002.