Isaya 60
60
U lukumyo lwa hanyuma lwa Yelusalemi
1Gwe Yelusalemi, wusinhuce wumulice
nhe lizuwa, hambi nhojo yo Muwaha Mulungu
nha yakubulilila!
2I makungugo ganji gogubikwa no wutitu,
ninga agwe, u wuzelu wo Muwaha Mulungu wokubulilila,
ne nhojo yakwe yowa muli'gwe.
3Ne makungugo gose gokwejelwa ku wuzelu wako
Nawo watemi wokwegwa ne lizuwa lyako lipya.
4Alu ta, wupituce wulanje ku zimbavu zako zose
wuciwone cono cikuza,
hambi i wanhu wako wose nha weza
kwikongholela kono kaya!
Nawo i wanago we cilume, wowuya ku wulawa
ku zi'si zo kutali,
nawo i wanago we cicekulu wolowa wadinghuywe
nhe wana wadodo.
5Nagwe koloziwona zizi, ko wusangalale wuwaha
Ne nhumbula yako yolomema nyemo hamonga no wucicime.
Ne sawo yose ye makungugo gose,
kololetelwa gwegwe.
Sunga ne wugoli wawo wose wolokuziza gwegwe
ku wulawa ku nhumbi ye lilenga.
6Sunga ne matewa mawaha ge zingamiya
nago golokuziza gwegwe
ku wulawa ku Midiyani na ku Efa.
Zolokuza ku wulawa Sheba, zikuletele
zahabu hamonga no wuvumba.
Ne wanhu wawo, wose wologanula ze nghani swanu
yono Muwaha Mulungu yetumile!
7Kanyhi wolokuletela ne zingholo zose za ku Kedali
hamonga na za ku Nebayoti,
wuzitumamile so makumbiko,
zilavywe mu cikumbicilo, zimwendeze Muwaha Mulungu.
Nayo Muwaha Mulungu koloyinoza Nyumba yakwe
yo wuhembelo yiwe no lukumyo luwaha kuciza vyono yali.
8Alo ngalawaci zizi nyinji, zono zikuza
ziyagaye mwi'lenga nhe mavunde,
kotya nziwa zono zikuwuya mu manhuli gazo?
9Zo ngalawa zono zikulawilila mu ma'si go kutali
zikuwagomola i wanhu wo Mulungu kono kwawo.
Wakuza wena hamonga ne fweza na zahabu
ho walipele lilumbo litagwa lyo Muwaha Mulungu.
U Mulungu mono yelile wa Isilayeli,
mono yaganoza makungugo gose,
gawapele cogopo i wanhu wakwe.
10Muwaha Mulungu yakuyilonjela Yelusalemi
yakutya nhavi,
“I wajenzi wo wolokuzenjela majinji gako,
nawo i watemi wawo, wolokwitumamila gwegwe.
Hamba yiwe ane nakulipiciziza mwi'kuwo lyangu,
ninga aluno nokulajila zo wendo wangu
no lusungu lwangu kuli'gwe.
11Ne milango yako yolowa kwikala yili mwazi,
i watemi we makungugo ho wasume
kukuletela zisawo zawo.
12Ne makungugo gono si gokwitumamila gwegwe,
ane nogongomezeza lukulu.”
13“Ne mibici yose ye minanasi, na ye minghulwa,
hamonga ne mibici yinji yinji,
hamonga sunga ne mibici miswanu muno
yono yikulawa mu mbago ya Lebanoni,
yololetwa yose, ho yihanozeleze viswanu ha Yelusalemi.
Yiyinoze Nyumba yangu yo wuhembelo yiwe swanu,
no kulinoza likaya lyangu liwe no lukumyo luwaha.
14Ne wana we cilume we wanhu wose wono wekalaga
wakumwiwonelenyi, wolomuzizenyi nyenye,
wamwinamilenyi ha mwande yenyu,
wakulajila ze cogopo cawo kuli'nye.
Sunga na wa walya wose wono wekalaga wakumubedegalenyi,
wolokuza wafugame ha mwande yenyu.
Nawo wolomucemenyi watye, ‘Likaya lyo Muwaha Mulungu,’
‘Sayuni, likaya lyo Mulungu mono yelile wa Isilayeli.’ ”
15“Na ku wulawa lulu, hamba si kololecelwa lukulu kanyhi;
hamba kusulwa yaye ng'o,
hamba si kolowa kanyhi likaya yiciwa lyono
lihodanjice yaye.
Hambi ane nha nolokunoza wuwe ne lilumbo yiwaha
kanyhi wuwe wunojezize
wuwe hanhu hono hamemile nyemo cibitilila
na cibitilila.
16Nago makungugo gose, hamonga ne watemi wawo,
wose wokucelelela muno muno
wowa nho nyina yo munhu vyono kamukocaga mwanagwe.
Nagwe baho ho komanyila nha vyono ane
no Muwaha Mulungu nakuponya.
Na vyono Mulungu we vilungo wa Isilayeli
yo Mukombozi wako.”
17“Nane nolomupelenyi zahabu yihomele shaba
nayo fweza ne shaba, vihomele cuma ne mabici.
Naco cuma cihomele mabwe.
Ne watemi wenyu, nawo hamba si wolomwiwonelenyi yaye.
Hambi ane nha nolowanoza wateme
kwe ling'ani no mulamu.
18Ne mazi go wuwulaji, hamba si golohulikwa
kanyhi yaye.
Hamba wongomezwe si woloyiziza yisi yenyu
kanyhi yaye.
Hambi ane nha nolomudimenyi
kanyhi nolowa nili 'jinji lyo kumucitilenyi.
Nanye molonghumya 'ne, vyono nakondya kumuponyenyi.
19“Kanyhi ne lizuwa hamba si lyolomumulicilenyi
mu misi, hamba mwezi ku cilo.
Hambi ane no Muwaha Mulungu, nha yo nene
mono nolowa wuzelu wenyu cibitilila.
Wuzelu wo lukumyo lwangu wo wolomumulicilenyi.
20Ne vilo vyenyu vyo wusungu, vyoloduma,
ane no Muwaha Mulungu yo nolowa wuzelu wenyu cibitilila,
mono nikalaga cibitilila si nhe lizuwa no mwezi.
21Ne wanhu wako wolowa kwituma zo mugoloka,
nane nowapela yisi cibitilila.
Hambi nha yo nene mono nawawumba no kuwanoza,
ho ndajile wuwaha wangu kuli wanhu wose.
22Holeka ku soko yiyo, sunga ne mhuga ndodo
ya muli'nye kanyhi yono yisoceye,
yolowa nghungugo mbaha muno kanyhi yili vilungo
kolo vipango vyayo vyafika.
Nane nozinoza zizi zijele mbela mbela,
ane no Muwaha Mulungu!”
Cigogo Bible © Bible Society of Tanzania, 2002.