Isaya 55
55
I cipegwa co lusungu lo Mulungu
1Muwaha Mulungu yakutya,
“Malenga gali baha,
holeka muze wose mono mukaluce!
Nanye wose mono musina pesa,
muze mugule ndigwa mubite mukalye!
Muze mung'we divayi ne mele,
ninga movituga bwete du!
2Alu nhawulenyi mukwitumamila zipesa zenyu
mu wugula vinhu vyono visina cambuzi?
Hamba nhawulenyi mukwitumamila misahala yenyu,
ninga hamba si mukwiguta yaye?
Alu nane nghumutyenyi nhavi,
ta muhulicizaje nane zono nghulonga ye,
holeka nanye moyisangalalila
ndigwa swanu yono yicizize ndigwa zose.”
3“Holeka 'lu muhulicize 'ne,
anye nyo wanhu wangu munyizize nene.
Munyizize nene holeka mowumipa!
Nane nonoza nanye cilagane ce cibitilila,
kanyhi nomulugutizenyi nha vyono namwihuwiza Dawudi.
4Hambi nha namunoza Dawudi yawe mutemi,
no mulongola kuli makungugo gose.
Kanyhi muli mwene,
mo nghalajilila vilungo vyangu kuli makungugo.
5Langa ta,
nanye mologacema makungugo gono si mugamanyile,
gono nago hamba si gamumanyenyi nyenye,
nago golomuzizenyi no kwilunza nanye!
Ane yo nene Muwaha Mulungu,
u Mulugu wako u Mulungu mono nelile wa Isilayeli,
yo nene mono nolozinoza zizi zose zitumwe.
Nane nolomupelenyi lilumbo no lukumyo.”
6Holeka mumupitucile Muwaha Mulungu,
mumulombe lono yakali yali behi.
7Nawo i wanhu wabi, wayilekaje mikalile yawo mibi
wagapitule mahweso gawo mabi,
wamuwuyile Muwaha Mulungu, u Mulungu wetu.
Hambi mwene nha yali lusungu,
kanyhi mwene kawanenelaga wanhu mbela.
8Muwaha Mulungu yakutya,
“Mahweso gangu si gokwihwana ne mahweso genyu,
ne zinzila zangu nazo,
si zokwihwana ne zinzila zenyu ng'o.
9Nha vyono muwuwonaga wulanga wuli
kutali muno kucanyha ye yisi,
ale nhavivyo vyo genha ne mahweso gangu,
nago gali kutali muno ne mahweso genyu.”
10“Hambi zinghani zangu nazo,
nha zihwanile seluji ne mvula,
yono yilawaga mu mavunde yiwa kutonya mu yisi
yiwa kuviwilusa vilimwa no kulavya mbeyu
yono hanyuma yohadikwa,
na yinji yiwa kwitumamilwa so ndigwa.
11Holeka yo nhavivyo sunga ne nghani yono nghuyilonga,
si yo mbuyila bwete caka yilece kwituma
zono niziwikanize mu mahweso gangu
ninga langa yokwituma zose du zono niyitumile yitume.”
12“Holeka nanye molowuka mu Babiloni musangalaye,
kanyhi molotegulwa kunze ye likaya ko mulamu.
Nago matunda ne vigongo mwi'pango lilyo
vyolobahuka so wimbe,
imibici nayo yolozoza ne nyemo mbaha.
13I mibici nayo yolocindika yihomele
hono ho gali mabijili,
nago mapangalale golocindika gahomele
hono ho gali mamivya.
Naco cico co colowa citanjilo cono colokwikala cibitilila,
colowa co cikumbucizo ca zono ane
no Muwaha Mulungu nakondya kuzitumama.”
Cigogo Bible © Bible Society of Tanzania, 2002.