Isaya 5
5
Lwimbo lo mugunda we mizabibu
1Ale, muhulicize ta, nimwimbilenyi lwimbo aluno,
u lwimbo lo mwendece wangu, no mugunda wakwe we mizabibu.
Mwendece wangu, yali yalimile mugunda we mizabibu,
mucanyha ye cigongo cono cina moso mwinji.
2Yawutipanga muhangha, yakawusa mabwe gose,
yakahadika mizabibu miswanu muno.
Yakazenga ne cilingo co kwamilila,
yakahimba ne likombo lyo kukobonjela zi zabibu.
Yakalindila sunga mu wupilo we zi zabibu.
Ninga zabibu zose zikawa nghali.
3Alu mwendece wangu yakutya,
“Nye nyo wanhu wono mwikaye mu Yelusalemi, na Yuda,
ta, mucilamulaje nene no mugunda wangu we mizabibu.
4Wulenyi, ho yili nghani yinji yono yisigaye,
yono si nayinoza mu mugunda wangu we mizabibu?
Alu nhawule si wulelile zabibu ziswanu,
zono nali nanjiliye,
langa wukulela zabibu nghali, zono si nali nanjiliye?”
5Alu, lecenyi ta nimulonjelenyi, nane vyono nowunoza,
“Nowupambula mululu wayo,
nigamwagule ne majinji gono gakuwa kuwucitila,
nigalecele malimu ga mu mbago,
gaze gawulye no kuwusambanjilanga.
6Nowuleka wutite ne masukuzi, hamonga ne maselegwa gayo.
Hamba si nowupanyulila yaye ne mizabibu yayo,
hamba si nowulimila.
Langa nowuleka du vititane ne vikungugu hamonga ne mabijili.
Kanyhi nolajiliza mavunde,
galece kuwutonyezeza mvula.”
7Ale, wanhu wa Isilayeli, wo mugunda we mizabibu
wo Muwaha Mulungu u Mudaha vyose,
u Mulungu we mihanga.
Nawo i wanhu wa Yuda, zo zabibu zono yazihadika.
Nayo yali yetumbiye, nha vyono wokwituma zo wuhile wakwe.
Ninga wene wakawa wawulaji.
Yali yetumbiye nha vyono wokwituma ze ling'ani,
ninga wanhu wakawa wakulila
vyono si wakutendelwa ze ling'ani.
I zimbi zono wanhu wakwituma
8Woyi he kuli'nye!
Anye mono mugulaga zikaya ne migunda,
muwa kwiyonjelezeza muli vyono mwina navyo.
Sunga nhondo hawa hasina hamba cilejeho
co kwikala munhu yunji, nanye muwa kwikala muli wene du mu'si.
9Ninga ane hulika Muwaha Mulungu,
u Mulungu Mudaha vyose yakutya,
“Makaya gaga maswanu mawaha,
gose golowa matongo gali wene gasina wekazi.
10Ne mizabibu, yono mihadice mu wugunda wa eka yikumi,
wololavya lita munana du za divayi.
Na mono kohadika kilo yigana limonga za mbeyu,
yuyo kolodudula kilo yikumi du za wuhemba.”
11Woyi he, kuli nye!
Mono mwendile kwilawa hakali mitondo,
muwa kutyatya zo wugalo 'jimbi,
mono mugonaga cilo cose, muli mu wugalo 'jimbi.
12Na mu zi sikukuu zenyu, mwendile kutowa masumbi,
ne zindonondo, ne misesele, ne fuluti,
hamonga no kung'wa divayi.
Ninga hamba si mwendile kwihwesa ze metumo go Muwaha Mulungu
hamba kuyimanya i milimo ye miwoko yakwe.
13Holeka ku soko yiyo,
mosolwa mutegulwe ku yisi yo kutali so wuleka kumanya 'ne.
Ne walongola wenyu wolofwa so nzala,
ne wanhu wanji wose, wolofwa so nyhilu ye malenga.
14Hambi i yinze ye wafu, nha yiwadabuciye wene,
nayo yahame mulomo wayo.
Nayo yowamela i wanhu we lilumbo wa mu Yelusalemi,
hamonga ne lipuga liwaha lye wanhu wayo,
wono wayisangalalilaga Yelusalemi.
15Ne wanhu wose wolokozwa cevu,
ne wewoni wose wolonyetywa.
16Ninga Muwaha Mulungu, u Mudaha vyose;
u Mulungu we mihanga kokumywa
hambi nha kawulajilaga wuwaha wakwe,
muli ze ling'ani zono ketumaga,
kanyhi kegubulaga zo wele wakwe,
mu nzila yo kuwaling'aniza wanhu wakwe.
17Nazo zinyana ze zingholo, hamonga ne zinyhinda,
hamonga ne zinyehe, zolotuga wudimilo we mahanze
mumo mu matongo ge makaya gago.
18Woyi hee, kuli'nye!
Mono si mukusuma kwileka no wubi wenyu.
19Hambi nha mutezaga,
“Ale, Muwaha Mulungu,
na yetume mbela zono katezaga kokwituma,
nase ho ciziwone.
Lecenyi Mulungu mono yelile we Waisilayeli,
yetume za mu mahweso gakwe.
Mulece ciziwone zono zili mu mutima wakwe.”
20Woyi hee, kuli'nye!
Hambi kuli'nye ziswanu nha zo 'mbi,
nazo zimbi nha zo swanu kuli 'nye.
Muwunozaga wutitu, wuwa yo misi kuli'nye,
nayo misi, ciwa co cilo kuli'nye.
Na kanyhi munozaga yono nghali,
kuli'nye yiwa yo yili muzinzi,
na yono yili muzinzi,
kuli'nye yiwa yo nghali,
21Woyi hee, kuli'nye!
Hambi nha mwihwesaga vyono muli wanhu we mahala,
kanyhi muli wasugu muno.
22Woyi hee, kuli'nye!
Mo wang'wela wo wujimbi!
Anye mo wanghula,
mono musina hamba woga bwete,
wo kuhanza-hanza ving'wegwa!
23Na kanyhi so wulya mafupo wenyu,
mukuwa kuwawopolela wanhu we masutya,
no kuwemila ling'ani yawo i wanhu wono wasina masutya.
24Na ku soko yiyo, nha vyono lilambi lyo moto,
ligatakamizaga mahanze,
na kanyhi, nha vyono mahanze gono ganyalile,
gatakamilaga mu malambi go moto,
ale, nhavivyo, ne lisina lyenyu nalyo lyowola,
ne maluwa gayo nago gonyala,
gapemheluswe ne mbeho,
hambi nha mwazilema zo wulajilize wo
Muwaha Mulungu u Mudaha vyose,
u Mulungu we mihanga,
u Mulungu mono yelile we Waisilayeli,
zono yacijiza 'se.
25Alu u Muwaha Mulungu,
yakondya kuwakolelwa likuwo wanhu,
wakwe, nalu yagoloye muwoko wakwe ho yawalipicize.
Matunda golosinjisika, ne miwili ya wono wafwiye,
yololekwa yipinile mu zinzila nha takataka.
Ninga hamba nhavivyo, i likuwo lyo
Muwaha Mulungu, hamba si lyolomalika yaye,
u muwoko wakwe vyo wowa wugoloywe du,
ho yajendelele kulavya wulipicizwe.
26Muwaha Mulungu kolozicemeleza ne zinghungugo zo kutali.
Kolowacema walawe malanga gose ge'nze,
nawo wolokuza musunho kuli mwene.
27Na holowa hasina hamba monga mono kolokatala,
hamba kwikobala.
Hamba hasina mono kolosinzila hamba kugona nhongo.
Hamba mono musipi wakwe wolohogoha,
hamba cilatu cakwe kutaguka.
28Ne zisonga zawo nghali muno, no wupinde wawo,
wolowa wutawiciywe lukulu,
wawuwikanize so wugume du.
Ne magaga ge zifwalasi zawo,
makavu gehwanile libwe lye ng'anga.
Ne matuka gawo go wulugu, matayili gayo,
gowa kupilima nhe civulavumbi.
29Ne wasilikale wawo,
wowa kukoloma nha simba zono ziwulaje mhelembo,
alu ziyidinghuye, zikulajila nha vyono,
hasina munhu wo wose,
mono kosuma kuziboka yaye.
30Ne lizuwa lilyo, kolo lyeza kuza,
wolowakolomela Waisilayeli,
nhe malenga ge lilenga vyono gabulaga.
Na yunji hono yayilanje yisi, na langata,
kolowona citi ne magayo!
Wuzelu wakondya kumelwa no wutitu.
Cigogo Bible © Bible Society of Tanzania, 2002.