Isaya 49
49
Isilayeli wo Wuzelu kuli Makungugo
1Nanye nyo makungugo go kutali,
anye nyo wanhu mono mwikaye kutali,
muhulicize ta zono nghulonga, nghutya,
Muwaha Mulungu yahagula ane,
yakalitambula litagwa lyangu na lono nali
nghali nalelwa, yakambika niwe mwitumami wakwe.
2Yakazinoza zinghani zangu ziwe kuhoma nho mumaje.
Kanyhi yakanyhitila no muwoko wakwe.
Yakanoza 'ne niwe nha songa nghali muno
yono yiwikanizwe ku wugume.
3Hanyuma yakanonjela yakutya,
“Isilayeli, agwe wuli mwitumami wangu
hambi nha ku soko ya gwegwe,
wanhu wose wonghumya.”
4Nane nghamupitula nghatya,
“Nepiganza bwete, nghetuma sunga nghakatala
so cinhu cono cisina cambuzi.”
Ninga hamba nhavivyo,
nomwitumbila Muwaha Mulungu,
nayo yo koyitetela ling'ani yangu,
kanyhi yo kohumbiliza mu nghango ye metumo gangu.
5Muwaha Mulungu yahagula 'ne na lono nali
nghali hamba nalelwa,
yakanoza niwe mwitumami wakwe,
ho niwagomole kwakwe wanhu wakwe,
niwakonghole i wanhu wa Isilayeli wono weyagaye.
Hambi Muwaha Mulungu nha yo yakumhela lilumbo,
kanyhi mwene vyo vilungo vyangu.
6Muwaha Mulungu yakanonjela yakutya,
“Nina mulimo muwaha wono nghuwiciye agwe
go mwitumami wangu.
Ninga si mulimo wo kuwagomola du mu lukumyo
i wanhu wa Isilayeli, wono wasigaye,
langa nokunoza kanyhi wuwe wuzelu kuli makungugo,
i yinze yose ho yisume kuponywa.”
7Mulungu mono yelile wa Isilayeli,
u Mukombozi wawo yakumulonjela mono yakubedegalwa ne wanhu,
na mono yakusulwa ne makungugo,
na kuli mwitumami we watemi, yakutya nhavi,
“Watemi kolo wakukuwona,
wokwinucila walajile cogopo cawo kuli'gwe,
ne wana we watemi, nawo woziwona zizo,
nawo wokwinama hasi, wakupele lilumbo.”
Na zizi zose zolokwijela,
vyono Muwaha Mulungu kakondya kumuhagula mwitumami wakwe,
U Mulungu mono yelile wa Isilayeli,
mwene kakamisaga wihuwizo wakwe.
Wugomolwe wa Yelusalemi
8Muwaha Mulungu yakuwalonjela wanhu wakwe yakutya,
“Kolo lizuwa lyo kumuponyenyi lyakondya kuza,
ane nomuponyenyi,
nomupitulenyi cililo cenyu co kusaka wutazi.
Nolomudimenyi no kumucitilenyi,
hamba muwe mwali mwakondya kuwika
cilagane ne wanhu wose co kusaka wutazi.
Kanyhi nolomudimenyi no kumucitilenyi,
so cilagane cono nacinoza ne wanhu wose muli nyenye.
Nane nomuwicenyi mwikale kanyhi mu yisi yenyu
yono yali lyeza yitongo.
9Nane lulo nolowalonjela wono wali mu jela nitye,
‘Ale, muwuce mubite, mwakondya kuwopolelwa!’
Nawo wono wali mu wutitu, nolowalonjela nitye,
‘Ale, nanye muwuce mulawile ku wuzelu!’
Hambi nha wolowa wenha zingholo zono
zikudima mu matunda,
10nawo si wolodabuka yaye,
hamba kutuga nyhilu ya malenga.
Nalyo lizuwa hamonga ne livuce lya mu nyika,
si vyolowatamisa yaye,
hambi nha wolowa wali mu wutonji wa mono yawendile.
Mwene kowatonga ku mivwilo ye malenga.
11“Nane nonoza nzila mbaha yikolele mu matunda,
no kuyinozeleza nzila yono woyikolela wanhu wangu.
12Nawo wanhu wangu, wolokuza ku wulawilila kutali,
ku wulawilila ku lubavu lwa kusumuka na kumwezi,
na ku wulawilila ku Aswani ku lubavu lwa kutakama.”
13Ale mwimbe anye nyo wulanga!
Nagwe go yinze wimbe no wusangalale!
Matunda nago gembe na nyemo mbaha!
Hambi Muwaha Mulungu nha kowasindamika wanhu wakwe,
kowawonela lusungu wanhu wakwe wono wali mu magayo.
14Ninga i wanhu wa Yelusalemi wakatya,
“U Muwaha Mulungu yakondya kucileka!
Yakondya kucisemwa!”
15Ninga nayo Muwaha Mulungu yakupitula yakutya,
“Alu mwene mbeka nyina yo munhu kosuma kumusemwa
u mwanagwe mono yamulela, hamba si komwenda yaye?
Ninga hamba yiwe nyina yo mwana yasume kumusemwa
mwanagwe, ane langa si nomusemwelenyi lukulu yaye.
16Gwe Yelusalemi, ane hamba si nokusemwela lukulu!
Hambi nha nakondya kukwandika litagwa lyako
mu maganza ge miwoko yangu.
17“Hambi wawo wono wokuzenga kanyhi,
nha wakuza musunho,
nawo wono wakakunoza wuwe yitongo,
wowuka muli gwegwe.
18Ale, winule meso gako wulanje ako na ako
wuwone cono cikuza!
I wanhu wako weza kwihanguliza hamonga
wakuwuya kono kwawo!
Na mbeka, nha vyono ane nili Mulungu mumi,
nagwe kolowa sangalalila wanhu wako,
hambi nha kolowa nha bibi halusi mono yavwalile wihambo.
19“Hambi yisi yako nha yali yakondya kulekwa
lyawa yitongo,
ninga aluno yolowa yisi finyu yono si yolowakwila wose
wono wolokuza wekale mumo.
Na wose wono wakunoza wuwe yitongo,
wolowuswa wawe kutali nagwe.
20Ne wanhu wako wono walelelwa ku wuhamywe,
lizuwa linji wolokutya,
‘Alu yisi yiyi, nha yeza finyu muno,
nase lu ho cikusaka wikalo wugazi muno!’
21Ale, nagwe baho, kolokwanza kulonga wuli wene wukutya,
‘Alu mwene nani mono yandelela wana wawa?
Hambi nha nali nakondya kufwilwa ne wana wose
nghawa sina hamba mwana monga.
Nali nili ku wuhamywe, nghawa nawingwa,
alu nani mono yawawilusa wana wawa?
Nha nali nalekwa nekala nili wene,
alu wana wawa ho walawa hayi wene?’ ”
22Ninga Muwaha Mulungu we mihanga yakulonga
ne wanhu wakwe yakutya,
“Ane nololajila citanjilo kuli makungugo,
nawo wolowagomola wanago kono kaya.
23Ne watemi nawo wolowa nha wasogo,
nawo i wagolece we likulu wose, wolowa nhe wanyina zako,
hambi nha wolokwinamila
ha mwande yako no kukupela lilumbo,
kanyhi wolokwinenenyheza hali'gwe
wakulajila cogopo cawo hali'gwe.
Nagwe baho ho kolomanyila vyono ane yo nene
Muwaha Mulungu.
Kanyhi hasina munhu wo wose mono yanyitumbiye
mono kolokozwa cevu.”
24Wule!
Wukwihwesa kosuma kumuboka musilikale mateka gakwe?
Hamba kosuma kuwaboka wafungwa
mu miwoko yo munhu mono yali vilungo?
25Muwaha Mulungu yakupitula yakutya,
“Na zizo zo zokwijela,
Hambi i wafungwa wo musilikale nha wosolwa wose,
sunga ne mateka go munhu mono yali vilungo,
nago gosolwa gose.
Hambi nha nokwisumaniza no munhu mono
yakwisumaniza nagwe, ho niwaponye wanago.
26Nane nowanoza wono wakukwiwonela
wewulaje weneco wose.
Nawo wogala no wiwulaji hamonga ne makuwo,
Baho ne wanhu wose ho womanya vyono,
ane yo nene Muwaha Mulungu, u Muponyi wako,
ane yo nene u Mukombozi wako we vilungo wa Yakobo.
Mono nghukuponya no kukuleka wuli mwelecele.
Kanyhi ho womanya nha vyono yo nene
Mulungu nili Muponyi wako,
no Mukombozi wako na we vilungo wa Yakobo.”
Cigogo Bible © Bible Society of Tanzania, 2002.