Isaya 47
47
Wuling'anizwe wa Babiloni
1Muwaha Mulungu yakutya nhavi,
“Gwe Babiloni, alu wuwuce mwi'goda lyako lyo wutemi,
wutime wikale hasi mu muhangha.
Halulongozi wali winha muhinza muswanu
likaya lyono silisumwaga.
Ninga aluno hamba si kocemwa kanyhi mupolo
hamba wo wulenzi!
Aluno, wawa muwanda!
2Alu wusole zinzala!
Wusaje wusaje!
Wuwuse citambala cako co kugubika wusu wako,
wuyiwopole ne myenda yako miswanu!
Wukunyaje mwenda wako kusika, ho wulowoce vikolongo!
3Nawo wanhu nhondo wokuwona vyono wuli cipwi,
wokuwona vyono wenenenyheza,
kanyhi wukuwona cevu.
Nane nolomulipicizenyi,
na hasina munhu mono kolonyimila.”
4Mulungu mono yelile wa Isilayeli kakondya kucikomboza,
ne litagwa lyakwe, mweneco,
yo Mulungu we mihanga.
5Muwaha Mulungu yakuyilonjela Babiloni yakutya nhavi,
“Wunyamale twii, mu wutitu,
hambi nha hasina munhu wo wose
mono kokucema kanyhi nha wuli mugolece we likulu, we makungugo!
6Nali niwakoleywe likuwo wanhu wangu
nghawa kuwatendela nha kotya si wanhu wangu
Nghawawika mu miwoko yako.
Nagwe hamba si wawawonela lusungu yaye,
sunga ne wakombi wose wukawatendela vibi muno.
7Hambi nha wehwesaga nha vyono kojendelela
kuwa mugolece we likulu vilo vyose,
hamba kuzihwesa zizi zose mu nhumbula yako,
nha vyono zose zina ndumo.
8“Ale, wuhulicize ta zono nghukulonjela
agwe go mwenda kwiyendeza go mweneco,
mono kwihwesaga vyono wuli mu mulamu,
na kanyhi wupolile.
Kanyhi wukuwa kwilumba ti,
wukutya agwe yo gwegwe du,
hasina yunji mono yehwanile gwegwe.
Na kanyhi kwihwesaga nha vyono si kolowa wuli mucekulu mufwile.
Hamba kufwilwa ne wanago yaye.
9Ninga wumanye nha vyono,
zizi zose zolokwijela kamonga du mwi'zuwa limonga.
Na ku soko ye cibede cako na so witumamila wuganga wako,
kolofwilwa no mulume wako, hamonga ne wanago.
10“Hambi nha wawitumbila wubalya wako
vyono wehwesaga nha hasina yunji mono yakukuwona.
Ninga kumbe mahala gako hamonga no wizuce wako,
vikakutonga vibi, nagwe baho,
wukawa kwidunhumula no kwiyitya,
‘Ane yo nene du, na hasina yunji kanyhi mono yehwanile nene.’
11Holeka ku soko yiyo, magazo gokuziza,
no wuganga wako hamba si wosuma kugemila yaye.
No wongomele wokuziza nhinicizo
nawo wowa wongomele wono wukali hamba nawulota yaye!
12Alu wuwice wuganga wako hamonga ne zimhiji zako
zono wetumamilaga wulawa wudodo wako,
na lunji zokupela wutazi wudodo,
na lunji kosuma kuwogofya walugu wako.
13Nalu nha weza wusina kanyhi vilungo
ku soko yo wulanjizwe wono wukupegwa.
Alu, wuwalekaje wawo waganga wako waze wakuponye,
i waganga we zinyelezi, hamonga na wono
wazandikaga zinghani za mu wulanga,
nawo wakulonjele mu mwezi na mwezi,
zinghani zono zokwijelela gwegwe.
14“Ninga wumanye vyono wawo wose wokwihwana mawaje
no moto wowakongojeza wose!
Nawo hamba si wolosuma kwiponya wali wene yaye
hambi malambi go moto nha golowasumiza,
holowa hasina kanyhi moto wo kota, ho watuje civuce.
15Na zizo zo swanu zono wolokutendela
wawo waganga wono kwikalaga wuwetumbiye
mu mikalile yako yose.
Ninga wumanye nha vyono wawo wose, wolokuleka wuli wene,
wawe kubita munhu kwakwe, munhu kwakwe,
na holowa hasina hamba monga mono
kolosigala ho yakuponye.”
Cigogo Bible © Bible Society of Tanzania, 2002.