Isaya 40
40
Zinghani zo witumbilo
1Mulungu wetu yakutya,
“Muwasindamice 'nye wanhu wangu!
Muwasindamice!
2Muwasikamye wanhu wa Yelusalemi.
Muwalonjele nha vyono wakondya
kugaya mu nghango yono yiwakwiliye,
no wubi wawo nhondo wanenelwa.
Hambi nha nakondya kuwalipiciza mu
nghango yo wubi wawo.”
3Ne lizi likulonga kwe vilungo likutya,
“Ale, muwikanize nzila yo Muwaha Mulungu mu nyika!
Mumutelemezezaje Mulungu wetu nzila ya mu nyika!
4Mufucilize malolo gose
mugatenjelemule ne matunda gose.
Na mu vigongo molowa mutelemeye,
na mono mogali masasala-sasala,
namo motelemezwa.
5Ne nhojo yo Muwaha Mulungu yologubulwa,
ne wanhu wose woloyiwona.
Muwaha Mulungu mweneco yo yehuwiza zizi.”
6Ne lizi likulonga kwa vilungo likutya,
“Wuyanzaje nghani.”
Nane nghawuza nghatya,
“Alo nghanici yene yono niyanze?”
Nayo Muwaha Mulungu yakanyitya,
“Wanze nha vyono wanhu wose wehwanile mahanze,
hamba si wekalaga vilo vinji, wehwanile maluwa
ga mu mawimbi.
7I mahanze ganyalaga, nago maluwa gawombaga,
lono Muwaha Mulungu yakuleta libeho
liwa kugaputa.
Na mbeka, wanhu siwekalaga
wehwanile mahanze du.
8Na heya, mahanze ganyalaga,
nago maluwa gawombaga,
ninga nghani yo Mulungu wetu yikalaga cibitilila.”
9Gwe Yelusalemi,
alu wubite mwi'tunda litali mucanyha,
wukalwanze luganuzi luswanu!
Wuzoze hawaha 'gwe Sayuni
wanze zo luganuzi luswanu!
Wulonje, wulece kogopa.
Wugalonjele makaya ga Yuda
nha vyono Mulungu wawo yakuza!
10Muwaha Mulungu we mihanga kolokuza
yateme ne vilungo, kolowaleteleza
hamonga ne wanhu wono yawaponya.
11Kololidima litewa lyakwe nho mudimi.
Kolozikongholela hamonga zinyana ze zingholo,
yazidinghule mu mawoko gakwe.
Kolozitonga mhola mhola zono zikosa.
U Mulungu we ciwene wa Isilayeli
12Alo nani mono kosuma kulipima lilenga
ko wufumbate mwi'ganza,
hamba kuwupima wulanga kwe vidole vyakwe?
Hamba munhu kosuma kuwudinghulila muhangha
we yinze mu cikombe,
hamba kugapima matunda ne vigongo mu vipimo?
13Hamba lunji munhu kosuma kumulonjeleza
Muwaha Mulungu cono yetume?
Hamba nani mono kusuma kumwijiza,
hamba kumulanjiza?
14Alo mwene, Mulungu yalondola lihala kwa nani,
ho yamanye wizuce, no kwiyijiza nha vyono
zinghani zinojeye zitumwe?
15Makungugo gose,
yo nghani ya bwete du hali Muwaha Mulungu,
hambi nha genha mabanhi du ge malenga,
ne vizingwa vyo kutali,
kaviwonaga vipelumhile muno nhe manghundi.
16Ne vilimu vyose vya mu mbago ya Lebanoni,
hamba si vikondizye so makumbiko,
kuli Mulungu wetu sunga ne mabici gayo,
nha macefu ku wasiza moto.
17Ne makungugo nha si cinji yaye hali mwene.
18Alu mwene, kosuma kumwihwananiza Mulungu nha nani?
Hamba si kosuma yaye kumulolosa nha vyono yenha
hamba kumwihwananiza yaye.
19Hambi mwene nha si yehwanile ne vihwani
vyono wanhu wavisesaga,
vyono i watyani nawo, wavihiliwaga zahabu,
hanyuma wawa kuvinozeza litende lya fweza.
20Nayo munhu mono yakuwona
nha vyono si kosuma wuguzi we fweza,
hamba zahabu,
mwene kahagulaga mubici we nghulunje wono si wufukunywaga yaye.
Nayo kamulondolaga musesi munghula
ho yamunozeze cihwani ciseswe
cono si cosuma kung'anuka yaye no kugwa hasi.
21Hongo lu agwe wukali namanya yaye?
Hamba baho katali si walonjelwa ng'o?
Hamba wukali si nahulika na vyono yinze
yamula yamula ng'o?
22Yinze yiyi, yawumbwa na mono yekaye
mwi'goda lyakwe lyo wutemi,
kucanyha ye yinze kuko ku wulanga.
Ne wanhu wono wekaye mono'nze,
wejelaga nha vinhu vidodo du, wehwanile mumehe.
Mwene yakawukunzulula wulanga kotya mutote,
yakawugolola nhe lihema, ho yekale mumo.
23Mwene kawawembulaga watemi
kanyhi kawa kuwapuvya.
24Wakuwa wehwanile no mubici mudodo
wono wukuhadikwa no kucindicila mulungu-yeye.
Nayo Muwaha Mulungu kawa kuleta libeho,
nawo wuwa kunyala no kupemheluswa ne libeho
nhe mawaje.
25Alu mwene, kosuma ku mwihwananiza Mulungu
mono yelile nha nani?
Hamba ho yuli yunji mono yehwanile mwene?
26Ale ta, wugalamile wulanje ku wulanga!
Mono yaziwumba zinyelezi zizo zono
wukuziwona, nani lo?
Mono yaziwumba,
yo yuyo kanyhi mono yakuwa kuzitonga,
nhe wasilikale wo wulugu.
Kanyhi mwene yazimanyile ne liwalo lyazo zose,
kazicemaga nyelezi ne'tagwa lyayo!
Mwene yali vilungo muno,
holeka hasina nyelezi hamba monga yono yajiliye!
27Alu mwene anye nyo wanhu wa Isilayeli
nhawulenyi 'lu mukung'ung'ulikayiwe
nha kotya Muwaha Mulungu si yawumanyile
wugaye wenyu, hamba kuyilanga ling'ani yenyu?
28Alu mwene anye si mumanyile?
Hamba mukali nahulika?
Hambi Muwaha Mulungu,
nha yo Mulungu we cibitilila,
kanyhi yo yayiwumba yinze yose.
Mwene si kakatalaga, hamba kudobanya yaye.
Hasina munhu mono kosuma
kugamanya mahala gakwe.
29Mwene kawapelaga vilungo wono watimbile
no kuwonjeleza vilungo wono wasoceye.
30Sunga ne wazelelo wokatala no kuzilika.
31“Ninga wono wamwitumbiye Muwaha Mulungu
yawapele wutazi, wawo wolopegwa vilungo vipya.
Wologuluka kucanyha kotya 'ndi,
kanyhi wolomangha hamba kukatala
yaye wolowa kujenda hamba si wolozilika ng'o.”
Cigogo Bible © Bible Society of Tanzania, 2002.