Isaya 32
32
U mutemi mwihuwilwa
1Na mwizuwa linji kolotema
u mutemi mono kolowa mwihuwilwa,
ne wawaha wa mu'si,
nawo wolotema mu nzila yo wiling'ano.
2Nawo wawo wose,
wolowa nho wihundiko so mbeho,
kanyhi wolowa nho wicito so mukukunzo.
Kanyhi wolowa nhe vikolongo vye malenga,
vyono vikuhuluma mu nyika.
Kanyhi wolowa nho mubeho muwaha we libwe liwaha,
lyono lili mu yisi yono yilecigwe.
3Ne meso gawo golowa gawalanjile wanhu,
nago makutu gawo golowa gahulicize,
ho gahulice visakwa vye wanhu.
4Hamba si wolowa wali musunho-musunho yaye,
langa wolowa kwituma no kulonga zono wezuce ne zinhunizo zayo.
5Na mwizuwa lilyo, u munhu mulele,
si kolopegwa lilumbo yaye.
Hamba munhu musugu-sugu nayo,
si kotegwa mwihuwilwa ng'o.
6Hambi u munhu mulele,
nha kalongaga zinghani zo wulele du,
kanyhi kekalaga yakwihwesa ku wituma zimbi du.
Na zose zono ketumaga,
na zono kalongaga,
zose zibitile ku wutovula Muwaha Mulungu du.
Kanyhi hamba si kawapelaga ndigwa wono wali nzala,
hamba kuwapela malenga wono wena nyhilu.
7No munhu mono yasina mahala,
kawezaga munhu mubi,
kanyhi yendile kwituma zimbi du,
mwene yendile kupinya zo kuwongomeza
waciwa ne zinghani zakwe zo wulambi,
no kuwemila ho walece kunozezwa ling'ani.
8Ninga u munhu we lilumbo,
ketumaga zo mugoloka,
kanyhi kawezaga yakamile mu mbeka.
Mejizo kuli Wacekulu wa mu Yelusalemi
9Nanye nyo wacekulu mono mwikaye mwilejehile,
musina mahwele go gose,
ale muhulicize 'ne zono nghulonga.
10Heya aluno mokwiguta,
ninga ku mwaka mu mapango gaga,
molowa mu mahwele,
soko ndudula ye zizabibu yolowa ndodo.
Hamba si molotuga zabibu zono zikwiliye.
11Hambi nha mwali
mwizoweleze kwikala mwilejehile du,
musina mahwele.
Ninga luno, mucicime so woga!
Mugazice anye nyo wacekulu wetagalici!
Vulenyi myenda yenyu,
mwitunje magunila mu viwino vyenyu.
12Mwitowe mu mhambaga zenyu ko wukalale,
ku soko vyono i migunda yenyu yo moso,
hamonga ne migunda yenyu ye zabibu,
yose yahodanjika,
13alu vititika vye mamivya hamonga ne mabijili,
vyakondya kutita mu yisi ye wanhu wangu.
Heya, mulile ku soko ye zikaya zono
wekalaga wanhu wangu wena nyemo,
na so likaya lyono lyali limemile wusangalale.
14Sunga ne kaya ye likulu, yololekwa,
hamonga ne likaya lyayo,
vyose vyololecelwa lukulu.
Nago makaya hamonga
ne magomawakali gayo gono gawacitilaga,
gose golokumulwangwa gawe matongo cibitilila.
Nago madogowe ga mu mbago,
gowa kupilima pilima mumo,
zingholo nazo zokwitujila wudimo mumo.
15Ninga hanyuma kanyhi,
u Mulungu kolocijidila muhe wakwe.
Ne yisi yono yali yeza magungu,
nhondo yologaluka yiwe yisi yono yina moso muwaha.
Nayo migunda, nhondo yolofisa vilimwa viswanu muno.
16Nawo wiling'ano, hamonga ne ling'ani,
nhondo vyolokwitumwa mu yisi yose.
17Vyono mu mapango gago,
wanhu wose wolowa kwituma ze ling'ani du.
Kanyhi kolowa na mulamu no wutuvu hamonga no witumbilo cibitilila.
18Nawo i wanhu wo Mulungu
wolowa kwikala wasina kanyhi mahwele.
Na mu zikaya zawo, wolowa wena mulamu kanyhi wapolile.
19Ninga mvula ye mabwe yolotonya mu mbago,
ne likaya lyologwiswa ho hasi.
20Mwene lulo!
Wanhu wolowa wena nyemo mbaha,
ku soko ye malenga menji ku so vilimwa vyawo,
hamonga no wudimilo wuswanu hanhu hose,
so zindogowe hamonga ne zing'ombe zawo.
Cigogo Bible © Bible Society of Tanzania, 2002.