Muganuzi 3
3
Mulungu yavipanjiye vyose, cinhu na cipango cayo
1Nghani zose zono zikwijela mono'nze,
Mulungu yazipanjiye vipango vyayo.
2Mulungu yapanjile cipango co kulelwa ne cipango co kufwa,
cipango co kuhadika, ne cipango co kududula,
3cipango co kuwulaga, ne cipango co kuponya,
cipango co kumwagula, ne cipango co kuzenga,
4cipango co kulila, ne cipango co kuseka,
cipango co kukalala, ne cipango co kuvina,
5cipango co kwiyagaza mabwe,
ne cipango co kugakongholeza,
cipango co kwikumbatila,
ne cipango co kuleka kwikumbatila,
6cipango co kulondola, ne cipango co kwajiliza,
cipango co kukamisa, ne cipango co kutaga,
7cipango co kudemula, ne cipango co kuhona,
cipango co kunyamala, ne cipango co kulonga,
8cipango co kwenda, ne cipango co kusula,
cipango co wulugu, ne cipango co mulamu.
9Alu munhu kamotaga cici ca mu wihidimbaze wakwe? 10Ane nawuwona vyono mulimo mukamu muno, wono Mulungu yamupela munhu. 11Hambi Mulungu nha yavinoza vyose viwe viswanu, cinhu ne cipango cayo. Mulungu yamupelile munhu wuhile wo kumanyila za ku mwande, ninga si yamupela wuwe wo kusuma kumanya i metumo gose go Mulungu. 12Nane manyile vyono ku lubavu lo munhu, koyili nghani monga du yono yomukwila, nha cinji, kusangalala, no kwituma ziswanu mu vilo vyose vyo wikale wakwe. 13Ase wose, yicinojeye cilye no kung'wa, cisangalalile ziswanu ze milimo yetu. Hambi aci nha cipegwa co Mulungu.
14Nane manyile vyono nghani yo yose yono Mulungu kayinozaga yikalaga cibitilila. No munhu si kosumila lukulu kuyonjeleza cinji hamba kuyicepula cinji yaye, hambi Mulungu nha yazinoza zose ziwe nha vyono zinha, i wanhu ho wamogope mwene. 15Naco cono cikwijela kwi zuwali, nha cali cili baho du ku wulawa katali, na cono cokwijela hanyuma, nha cali cili baho du na katali. Nayo Mulungu kanozaga cinhu cijele mu vidaha hayo hayo, ninga cene cinhu co ci cilya du.
U wu wula wiling'ano mono'nze
16Hamonga na zizo, nakondya kucimanya cinhu cinji kanyhi mononze, vyono i hanhu hono wulanjiliye vyono kowona i mbeka ne ling'ani, kumbe 'lu wavu wo wutemile. 17Nane mu nhumbula yangu nghawa kutya, “Ale hodu, si nghani yaye! Hambi Mulungu nha yo kowaling'aniza we ling'ani sunga ne wabi nha vivyo, hambi nha yakondya kuwikaniza cipango cono cinojeye kuli vinhu vyose, na kuli vyose vyono vikwijela.” 18Holeka nghawa kutya mu nhumbula yangu, “Mulungu yo kawajelaga wanhu wose, ho yawalajile nha vyono wene, wehwanile malimu du.” 19Hambi u mudumo wo munhu no mudumo we malimu, nha wo wumonga du. Hambi munhu nha kafwizaga nha vyono lilimu nalyo lifwizaga. Na vyose vyehelaga nhavivyo. Holeka munhu si yalicizize lilimu cinji co cose yaye. Vyose kuli munhu na kwi'limu, yo nghani ya bwete du. 20Wose wafwizaga no kuwuya kono walawa. Wose walawa mu manghundi, na wose wowuya kanyhi mu manghundi. 21Hambi nani mono yamanyile vyono mbeka umuhe wo munhu wubitaga kucanyha, no muhe we lilimu wudodomelaga kusi yo muhangha? 22Baho ho namanyila vyono, hasina nghani yono swanu kuciza yono munhu kosuma kuyinoza, langa hono si kusangalalila ziswanu ze milimo yakwe. Nayo Mulungu vyo yamuwiciye munhu nhavivyo. Alu nani 'mbi mono kosuma kumumanyiza munhu, zono zomutuga kumwande kolo yafwa?
Cigogo Bible © Bible Society of Tanzania, 2002.