TSINGANU 21
21
1Mwoyo ku mwami kuli khuli matsi katsukhulukhanga;
Mwami Nyasaye neye ukimililanga shia havundu hosi ha kenyi khutsia.
2Vikholwa viosi viu mundu vilolekhanga khuva vilahi khuye mwene;
navutswa Mwami Nyasaye neye umanyi kali mu mwoyo ku mundu.
3Likhola liu vulunji khandi vwatoto
viyaanzitsanga Mwami Nyasaye khuvira khukhola musango.
4Vandu vatamanu vimililwangwa nu vwiloli vwavo nende vusilo,
khandi vikholwa viu vwoni.
5Vindu viu mundu wu kholanga muhinzilu ni tsingulu aloshitsanga khukhola vileranga miandu mu vunyishi,
navutswa mundu wu kholanga vindu vuchila khuloshitsa akwitsanga mumanani.
6Miandu chiunyolanga khuvirila khu vuvehi chiliitsa khuvwa vwangu yuvu,
khali nichishili khukhulerela likhutsa.
7Vindu viu khusalilitsa via vandu vatamanu vakholanga viliitsa khuvativitsa;
shichila vayambakhana khukhola vikholwa viu vulunji.
8Vandu vatamanu vakholanga vikholwa viu vukoyanu;
navutswa vandu vavula vutamanu vwosi vakholanga likhola liu vulunji.
9Nu vulahi khumenya mumbeka ikulu khushisechese
khuvira khusanga inzu nu mukhali wamenya nalembananga.
10Mundu mutamanu yikombanga shia khase khosi khukhola vindu vitamanu;
khali avulakhu tsimbavasi tsia avelanga mureende wewe.
11Lwa mundu wi shihenye henye asalilitswangwa, mundu muyiingwa anyolanga vusitsa;
lwa mundu uli nu vusitsa yechitswangwa, nalwo lwa anyolanga vucheli.
12Nyasaye wi likhola liu vulunji wamanya kali mu tsinzu tsia vandu vatamanu;
khandi neye uchilanga vandu vatamanu nivativitswa.
13Mundu wambakhananga khuhulishitsa khuli vamanani valilanga,
mwene aliitsa khuvula khuhulishitswa nalilanga.
14Shihanwa shiu muvwivisi shikalilanga vurima;
navutswa asoya ihaanwangwa muvwivisi, neyo ichilanga vululu nu vuvaho.
15Katoto nikamali khwikholekha, vandu vi likhola liu vulunji vali nu vuyaanzi,
navutswa vandu vatamanu vaheendanga mwoyo.
16Mundu uhaya hayanga munjila yi limanya,
aliitsa khunyolekha mu vandu vakhutsa.
17Mundu wayaanzililila vindu viu mu shivala shinu aliitsa khukwa mumanani;
woyo uli ninganakani yu khulia nu khung'wa shianyala khuva muhinda tawe.
18Mundu mutamanu alilerela matiinyu kalivula khukhola mundu wi likhola liu vulunji;
khandi vandu vambakhananga khuva vasuuvilwa valiitsa khusalilitswa havukono ha vandu valahi.
19Nu vulahi khumenya mu shiangalangwi,
khuvira khumenya nu mukhali wayaanza khulembana nu khunyashitsa.
20Livishilu liu vukuuli vululu litsilililanga khuva munzu mu mundu uli nu vusitsa;
navutswa mundu muyiingwa amalanga vwangu miandu chiechie chiosi.
21Mundu wu kholelanga vandi likhola liu vulunji khandi malahi,
alahindila nu khuheelwa luyali.
22Mundu uli nu vusitsa anyala khuvukula litaala lia vandu vi tsingulu,
nu khusambulanyinya tsimbinga tsia vasuuvililamu.
23Mundu wakalaha mulilomoloma,
wacheliha yirulitsanga mu vutiinyu.
24Manyinya mundu wichinjililanga,
ninzi khumanyinyi mundu muyiingwa, mwiloli, khandi uvula lisanditsa.
25Ka mundu mukaara yikombanga khukhola nako kamwiiranga;
shichila wayambakhana muhinzilu kwosi.
26Vandu vatamanu vikombanga vindu via vandi khulitukhu liosi,
navutswa vandu vi likhola liu vulunji vahaananga nu mwoyo kwosi.
27Musango ku mundu mutamanu akholanga kwasinyu Mwami Nyasaye;
kwamusiinya niiva kulalerwa ni tsinganakani tsindamanu.
28Mushiahidi muvehi aliitsa khutivitswa,
navutswa muhulishitsi mulahi aliitsa khuhuchililwa khulomoloma.
29Mundu muyiingwa yitinyinyanga ali ni ikholo,
navutswa mundu wi likhola liu vulunji achelitsanga khulola ndi ukholi vindu vilahi.
30Nu khuvula khuva nu vusitsa, limanya inoho inganakani yu khukhonywa vivulaho,
inyala khukuura Mwami Nyasaye.
31Ifarasi irecheshitswangwa khulitukhu liu khukwana,
navutswa Mwami Nyasaye neye uhaananga likuura.
© The Bible Society of Kenya, 2013