YOSHWA 15
15
Lusomo lwa Vandu Vuluhia lwa Yuda Vaheelwa
1Vandu vi tsinzu tsia vandu vuluhia lwa Yuda vanyola lusomo lwi shivala yulu:
Shivala shiatukhanga khuluveka luli ikuvanda Mwichendanyama mwa Sini, khu mupaka kwa Edomu. 2Mupaka khuluveka luli ikuvanda kwenoko, kwraanjila khuluveka luli ikuvanda wi Inyanza yi Ichumbi 3nu kutsia khuluveka luli ikuvanda wene khuraanjila khu Injila ya Akurabimu khutsia khutukha khu Mwichendanyama mwa Sini. Mupaka kwenoko kwakholomokha nu kutsia khuluveka luli ikuvanda wi litaala lia Kadeshi-bareneha, khuvirila mu litaala lia Hezironi khandi nu kutikulukha khutsia mu litaala lia Adari, nu kushiama khutsia khutukha mu litaala lia Karika; 4kwatsililila nu kuvirila mu litaala lia Azimoni, khandi nu kulonda muchela kuli khu mupaka kwa Misri, khutsia khutukha khu Inyanza ya Meditarenia, ha mupaka kwenoko kwamalilishilanga. Nakwo kwali mupaka khuluveka luli ikuvanda wu lusomo lwa Yuda.
5Mupaka kuli khuluveka luli ivukwi kwali Inyanza yi Ichumbi khali khutsia khutukha havundu ha matsi ku Muchela kwa Yorodani kasuundulanga mu inyanza.
Mupaka kuli khuluveka luli ivuluka kwraanjila hawenaho, 6nu kutsia khutukha mu litaala lia Betsi-hugola, khandi nu kutikulukha khuluveka luli ivuluka khu shitikulukho imbeli wu Luhoongo lwa Yorodani. Kwatikulukha nu kutsia khutukha khu Lichina lia Bohani (Bohani yali mwana wa Rubeni); 7Mupaka kwenoko kwatikulukha khutsia khutukha mu litaala lia Debiri khuraanjila mu Luhoongo lu Vutiinyu, nu kutsia khuluveka luli ivuluka wi litaala lia Gilugali, khuluveka lundi lu khu Injila ya Adumimu khuluveka luli ikuvanda wu luhoongo. Kwatsililila khutsia khutukha khu tsisieveye tsia Enishemeshi, nu kurulila Eni-rogeli. 8Mupaka kwenoko kwatikulukha khutsia khutukha khuluveka luli ikuvanda, khuvirila mu Luhoongo lwa Beni Hinomu khundulu khuluveka luli imbo wi shikulu shi litaala lia Vayeebusi. (Nakhwo khuvoola, litaala likali lia Yerusalemi). Kwaraanjila hawenaho, nu kutikulukha khutsia khutukha khuluveka luli ivuluka wi shikulu khundulu khu Luhoongo lwa Refahimu. 9Mupaka kwenoko kwarulaho nu kutsia khutukha khu Tsisieveye tsia Nefutoha, khandi nu kurulila mu mataala kali himbi khu Shikulu shia Efuroni. Kwashiamilaho nu kutsia khutukha havundu halaangwangwa Baala (inoho litaala lia Kiriatsi-yeharimu), 10wa kwavotokhana nu kutsia khuluveka luli imbo wi litaala lia Baala khutsia khutukha mu shivala shi vikulu shia Edomu, nu kutsililila khutsia khuluveka luli ivuluka wi Shikulu shia Yeharimu (inoho Kesaloni), nu kukholomokha khutukha mu litaala lia Betsi-shemeshi, khandi nu kutsia khuvirila Timuna. 11Mupaka kwenoko kwatsililila khutsia khutukha khu shikulu khuluveka luli ivuluka wi litaala lia Ekuroni, nu kushiama khutsia mu litaala lia Shikeroni, nu kuvirila khu Shikulu shia Baala, khandi nu kutsia khutukha mu litaala lia Yabuneli. Mupaka kwenoko kwamalilishila mu Inyanza ya Meditarenia. 12Mupaka khuluveka luli imbo nakwo khundulu khwi Inyanza ya Meditarenia. Vandu vuluhia lwa Yuda vamenyanga mukari mwi mipaka chienecho.
Kalebu Yakuura Mataala ka Heburoni nende Debiri
(Vakh 1:11-15)
13Kalebu, wali nali mwana wa Yefuna, yanyola luveka lulala lwi shivala mu lusomo lwa Yuda, khuli Mwami Nyasaye yali niyavoolela Yoshwa akhole. Kalebu yanyola litaala lia Heburoni, litaala liali liu mundu walaangwangwa Araba, wivula Anaki. 14Kalebu yakhunga vitsukhulu va Anaki khurula mu litaala lienelo -- tsinzu tsia Sheshahi, Ahimani nende Talimahi. 15Kalebu yarula havundu henaho, natsia khukwana vandu vi litaala lia Debiri. (Litaala lialaangwangwa khale Kiriatsi-seferi.) 16Kalebu yavoola, “Niitsa khuvekha mwana wi shikhana wanje ulaangwangwa Akusahi khu musatsa utsitsanga khukwana, nu khuvukula ni tsingulu litaala lia Kiriatsi-seferi.” 17Mwana wa Kenazi walaangwangwa Otsenieli, nali amwavo Kalebu yakwana litaala lienelo, nalivukula ni tsingulu. Khulwa yako, Kalebu yamuha mwana wi shikhana wewe Akusahi ave mukhali wewe. 18Khulitukhu liu khukhola mulukha ku khuhilana, Otsenieli yavoolela Akusahi areeve tata wewe mulimi. Akusahi yikha hasi khurula khu ipunda yeye, ma Kalebu namureeva shindu shia yenyanga amuhe. 19Akusahi yavoolela tata wewe, “Nyenyanga umbee tsisieveye tsia matsi. Shivala shiumbele shili havundu humakana.” Khulwa yako, Kalebu yamuha tsisieveye khuluveka luli ivuluka nende ikuvanda.
Mataala ka Vandu Vuluhia lwa Yuda
20Yishi nashio shivala ishi tsinzu tsia vandu vuluhia lwa Yuda vanyola khuva shiavo vene. 21Mataala khuluveka luli ikuvanda ihale wene kali kavo, yako kali khu mupaka kwa Edomu, kali Kabuzeheli, Ederi, Yaguri, 22Kina, Dimona, Adada, 23Kedeshi, Hazori, Itsunani, 24Zifu, Telemu, Behalotsi, 25Hazori Hadata, Keriotsi Hezironi (inoho Hazori), 26Amamu, Shema, Molada, 27Hazari Gada, Heshimoni, Betsi-peleti, 28Hazari Shuhali, Beresheba, Bizihotsia, 29Baala, Limu, Ezemu, 30Elitoladi, Chesili, Horoma, 31Zikulagi, Madimana, Sanzana, 32Lebahotsi, Shilihimu, Ahini nende Rimoni: Kali mataala makhomi kavili na tisa nende michitsi chiako.
33Mataala kali hasi hi vikulu kali Eshitaholi, Zora, Ashina, 34Zanoha, Enganimu, Tapuha, Enamu, 35Yaramutsi, Adulamu, Soko, Azeka, 36Sha-arahimu, Aditsahimu, Gedera, nende Gederotsahimu: Mataala likhomi na kane, nende michitsi chiako.
37Mataala kandi khandi kali Zenani, Hatasha, Migudalagadi, 38Dilehani, Mizipa, Yokutseli, 39Lakishi, Bozikatsi, Eguloni, 40Kaboni, Lahumamu, Chitulishi, 41Gederotsi, Betsi-dagoni, Nahama, nende Makeda: mataala likhomi na sita, nende michitsi chiako.
42Khwali na mataala kandi khuli Libuna, Etseri, Ashani, 43Ifuta, Ashuna, Nezibu, 44Kehila, Akuzibu, nende Maresha: mataala makali tisa, nende michitsi chiako.
45Khwali ni litaala lia Ekuroni nende michitsi chialio, 46nende mataala koosi khandi michitsi chili himbi Ashidodi, khurula mu litaala lia Ekuroni, khutsia khutukha khu Inyanza ya Meditarenia.
47Khwali na mataala ka Ashidodi nende Gaza, nende tsisomo tsiako nende michitsi chiako, katukhanga khu muchela kuli khu mupaka kwa Misri, khandi khuluchinga lwi Inyanza ya Meditarenia.
48Khwali na mataala yaka mu shivala shi vikulu: Shamiri, Yatiri, Soko, 49Dana, Kiriatsi-seferi, (inoho Debiri), 50Anabu, Eshitemoha, Animu, 51Gosheni, Holoni, nende Gilohi: mataala likhomi na lilala, nende michitsi chiako.
52Khwali na mataala ka Arabu, Duma, Eshani, 53Yanimu, Betsi-tapuha, Afeka, 54Humuta, Heburoni, nende Zihori: mataala tisa, nende michitsi chiako.
55Khwali na mataala ka Mahoni, Karameli, Zifu, Yuta, 56Yezireli, Yokudehamu, Zanoha, 57Kainu, Gibeha, nende Timuna: mataala likhomi, nende michitsi chiako.
58Khwali na mataala ka Haluhuli, Betsi-zuri, Gedori, 59Maharatsi, Betsanotsi, nende Elutekoni: mataala sita, nende michitsi chiako.
60Khwali na mataala kandi, khuli Kiriatsi Baala (inoho Kiriatsi-yeharimu) nende Rabaha: mataala kavili, nende michitsi chiako.
61Mataala ku mu shiangalangwi kali Betsi-araba, Midini, Sekaka, 62Nibushani, litaala li ichumbi nende litaala lia Engedi: mataala sita, nende michitsi chiako.
63Navutswa vandu vuluhia lwa Yuda, vavula tsingulu tsiu khukhunga Vayeebusi, vamenyanga mu litaala lia Yerusalemi. Vayeebusi vashimenyayo khali nunundi, halala na vandu vuluhia lwa Yuda.
© The Bible Society of Kenya, 2013